Manipud Managbasatayo

Panangabuso iti Ubing

Pagarupek a dagiti artikuloyo maipapan iti “Panangabuso iti Ubing“ (Hunio 22, 1985) ad-adu ti maaramidanda a pakadangran ngem pagsayaatan. Kunaenyo a dagiti nagannak masapul nga ibagada kadagiti ubbing maipapan kadagiti “di umiso” a paspaset iti bagida a saan a sagsagiden dagiti ganggannaet. Pagarupek a daytoy mangipaay kadagiti ubbing iti naan-anay a saan a gagangay a kapanunotan maipapan iti bagbagida. Saandanto kadi nga agbalin a di naragsak ket riribukenna ti ar-aramidda iti sekso inton dumakkelda. Dagiti ubbing sigud nga ammoda ti dakes ket saan a masapul ti panangibaga kadakuada iti daytoy.

S. Aa. N., Denmark

No maibaga kadagiti ubbing iti umiso a pamay-an a dadduma a paspaset ti bagida ti pribado ket saan a mabalin a sagiden dagiti dadduma a tattao, daytoy saan a mangipaay kadakuada iti di gagangay a panangmatmat iti bagida met laeng. Dayta saan a masapul a lapdanna ti nasalun-at a panangmatmat iti ar-aramidda iti sekso bayat a tumaud ti kasta, ngem masalaknibanna ti ubing manipud iti pannakaabuso. Ti panangabuso, saan a ti umiso a panangisuro, ti mangipaay iti pakariribukan iti sekso. Ti panangipaay iti umiso a pannursuro iti ubing iti kastoy a pamay-an ti irekomendar ti ngangngani amin nga autoridad maipapan iti tema ti panangabuso iti ubing.​—ED.

Agyamanak unay maipaay iti artikulo maipapan iti panangabuso iti ubing. Pudno a dayta ket maysa a nagsayaatan a panangisalaysay, direkta ken napudno. Kas biktima daytoy a naagum a krimen, mariribukak kadagiti adu a rikrikna. Dagitoy nga artikulo ti nangtulong kaniak a makapagballigi. Maragsakanak ta impaganetgetyo ti pannakasapul iti panangtulong kadagiti ubbing a makakita nga awan ti siasinoman nga addaan iti kalintegan a mangsagid kadakuada iti di umiso a pamay-an. Daytoy ti mabalin koma a nangisalakan kaniak iti nakaam-amak a rigat a napadasak. Ti artikuloyo tinulonganna ti asawak ken siak a mangisalaysay iti daytoy a naan-anay kadagiti annakmi.

T. C., Ohio

Maysaak a babai ket 13 ti edadko. Naabusoak bayat ti adu a tawtawen. Kayatko ti agyaman maipaay iti ruaryo maipapan iti panangabuso iti ubing. Dayta tinulongannak a mangibaga iti dayta kadagiti dadakkelko. Itan simmardengen ti panangabuso. Ti artikuloyo ti nangisalakan iti biagko ta ngangngani pinapataykon ti bagik. Diak ammo ti aramidek. Maamakak unay.

H. H., Tennessee

Panangsapul iti Kinaragsak

Iti ruaryo nga Agosto 22, 1985, nangipakitakayo iti ladawan ti pudpudno a pagragsakan (panid 8). Mairaman iti dayta isu ti ladawan ti maysa a lalaki a mangisursuro iti maysa nga ubing a lalaki nga agkalap. Adda kadi nagdumaan ti panagkalap a maipaay a pagay-ayaman ken ti panagkalap a maipaay a pagragsakan?

W. H., Alabama

Sigurado a dikam panggep ti mangparegta iti panagkalap a maipaay a basta pagay-ayaman. Sinirmatami a ti lolo ti ubing a lalaki ti nagkalkalapen iti ikan a maipaay a sidaen ti pamilia. Itan sursuruannan ti apona iti kinalaing a mangappan iti banniit, agkalap, ken mabalin a no kasano ti mangdalus iti ikan. Agpada ti lakay ken ti apona maragsakanda iti daytoy a simple a kapadasan a pagrinrinnamananda iti sibay ti danum iti linong ti maysa a kayo iti maysa a nabara nga aldaw iti kalgaw. Ditay makita a nailadawan a ti lakay isursurona ti ubing a lalaki iti ragsak ti panaganop ken pannakidangadang, ken ti panangitangsit iti nakalapan ken ti kamaudiananna ti tropeo, isu a mairaman iti basta panagay-ayam a panagkalap.​—ED.

Agyamanak unay iti ruar a “Kinaragsak​—No Aniat’ Kasapulan Tapno Mabirukan.” (Agosto 22, 1985) Dayta addaan iti naisangsangayan a kinauneg iti pannakaawat a mangilasin iti maysa nga artikulo a pudno a naisangsangayan. Ti kinaragsak ti pudno a marukod babaen iti panagayat a makisarita ken makiraman. Dayta nga artikulo ti pudno a tumulong kadatayo amin a mangsapul iti gundaway a mangipaay ken mangiraman iti tiempotayo iti maysa ken maysa.

S. N., England