Manipud Managbasatayo

Panangabuso iti Ubing

Pagyamanan iti ruar a mangtaming iti panangabuso iti ubing. (Hunio 22, 1985) Siguradoak a tulongannanto dagiti adu a nagannak a mangsalaknib kadagiti annakda iti daytoy dakes a sistema dagiti bambanag. Dagiti nagannak kaniak pulos a dida nangipaay iti aniaman a balakad maipapan iti sekso. Iti maysa nga okasion seksual nga inabusonak ti maysa a kaeskuelaak a natataengan ngem siak. Uray pay ita a 28 ti tawenkon addaanak pay laeng kadagiti sikolohikal a parparikut a mainaig iti dayta. Anian a panagtarigagayko a naaddaanak koma idi ti impormasion manipud kadagiti artikuloyo.

R. S., Brazil

Saan a Mannakipagrikna nga Artikulo?

Kayatko a maammuanyo koma no kasano ti panagriknak maipapan iti artikuloyo a panagkugit ti babai agraman dagiti dadduma nga umarngi nga artikulo a nagparang iti napalabas. Tarigagayak a liklikan ti pannakasakit ti riknak iti panangbasak kadagiti nakaam-amak ti kinalawagna nga artikulo. Masapul kadi a basaentayo dagitoy a bambanag, kas iti artikulo a kadakdakamat pay laeng wenno ti salaysay iti panagtutuok kadagiti kampo konsentrasion? (“Manipud Ipapatay a Nagturong iti Biag Idiay Dachau,” Hulio 8, 1985) Saan kadi a daytoy maikontra iti balakad iti Filipos 4:8, a masapul nga itultuloytayo a panunoten dagiti bambanag a nalinteg, nadalus, makaay-ayo, nadayaw?

B. D., Canada

Dikam kayat a saktan ti rikna ti siasinoman a managbasami. Bigbigenmi a dadduma nga artikulo ti saan unay a makaay-ayo a basaen, ngem addada dagiti kinapudno iti lubong a masapul a sanguen dagiti tattao, sangsanguendan, wenno sanguendanto pay laeng. Mariknami nga obligasionmi ti pangiparang iti impormasion kadagiti kakasta a tema a maipaay a pakagunggonaan. Awan ti inkabilmi kadagiti kakasta nga artikulo ti saan a nainkalintegan, nalawag a detalye a mangtignay iti rikna, ti kinaranggas, ti kinarugit, wenno manggargari iti kinarugit. Inkagumaanmi ti mangiparang iti nadayaw, makatulong a pannakaiparang dagiti kakasta a tema, ken kankanayon nga addaan iti natibker a takder a maipaay iti nalinteg. Ikagumaanmi met ti mangipaay iti makaparegta ken makapabileg a balakad. Iti artikulomi maipapan iti panagkugit ti babai, nangipaaykami iti umdas nga impormasion tapno dagidiay a masapul a makaammo maawatanda no ania ti maisalsalaysay ket iti kasta dagiti amin malapdanda iti panangaramid kadagiti kakasta nga ar-aramid.

Addaankami iti ulidan iti napaltiingan a Sao ti Dios, ti Biblia, isu a napanayag ken espisipiko no kasapulan. Kitaenyo ti Genesis kapitulo 19, 34, 38, 39; Levitico 15:16-33; 18:19-24; Oc-ocom kapitulo 19; 2 Samuel kapitulo 13; Jeremias 5:7-9; Ezequiel kapitulo 23. Awan kadagitoy a deskripsion ti addaan iti panggep a nanggargari iti narugit a kababalin wenno mangpasakit iti nakem ti siasinoman, no di ket agserbida a maipaay iti nasken, makatulong, ken makapabileg a panggep.​—ED.

Nagsuratak tapno iyebkasko ti panangapresiar iti artikuloyo a “Manipud Ipapatay a Nagturong iti Biag Idiay Dachau.” Nasabetko ti maysa a lalaki a marurod unay maipapan iti kapadasanna idiay Dachau ken maipapan met iti kinapudno nga addada dagidiay adda idiay Canada nga agkuna a ti holocaust ket maysa a parparbo. Innalana dayta a ruar ket binasana. Immanamong a ti insuratna ket pudno, malaksid ti saanna a panangibaga kadagiti adu a nakaam-amak a paspasamak. Isut’ nangiyebkas iti kasta unay a pannakarurod kadagiti nangtutuok kenkuana, gapuna intudok ti balakad ni Else: “Dika guraen ida. Dikanto dangran ida. Dangramto laeng ti bagim met laeng!” Di pay nabayag daytoy a lalaki saan unayen a marurod. Ti salaysayna natulongannan dagiti adu a makasarak iti namnama ken pannakaparegta manen.

D. R., Canada

Nangnangruna a natignayak idi nabasak ti artikulo a “Manipud Ipapatay a Nagturong iti Biag Idiay Dachau.” Naasianak unay kenkuana. Maragsakanak ta simmayaat dagiti bambanag a maipaay kenkuana, pagyamanan laengen ken Else! Ngangnganin saan a makauray ti maysa a maipaay iti iyaay ti aldaw inton ti Dios ipatinggana dagiti amin a kinadakes ditoy daga a maipaay kadagiti tattao a di umiso ti pannakapabasolda. Pagyamanan ti nagsayaatan a magasin.

S. V. A., Zimbabwe