Makin-annak? Makin-pangngeddeng?

IDI 1982, kinuna ti Medical Protection Society iti Britania: “Naan-anay a nainkalintegan ti mangikuna a masapul a panunotenyo met ti [relihiuso] a pammati dagiti nagannak. Ngem pudno a saan a nainkalintegan ti mangikabil iti peggad iti biag ti ubing.” Dayta ti natibker a pangngeddeng dagiti dodoktor a mangiyalison iti dara kadagiti annak dagiti Saksi ni Jehova a saandan a manggun-od iti bilin iti korte.

Nupay kasta, ti nabiit pay a panagadu ti AIDS ti nangparikut iti daytoy a kasasaad, ta ti Justice of the Peace impadamagna idi Marso iti daytoy a tawen: “Ti nakaam-amak a sakit nga AIDS (Acquired Immune Deficiency Syndrome) ti mangiparang iti kabbaro a rason. No dadduma kadagiti maiyalison a dara ti naimpektaran ti nangidonar iti dara, daytoy mabalin a teknikal . . . nga agbanag iti pannakagun-od ti ubing iti sakit, ket matay iti makariribuk a pamay-an iti di mabayag a tiempo kalpasanna. Addadan dagiti napasamak a sadiay ti kadadaksan ti napasamak . . . Aniaman a makapapatay a sakit nakaam-amak manipud iti panangmatmat dagiti nagannak wenno dagiti dadduma a nasinged iti ubing, ngem ti epekto ti AIDS ti nalawag a nakaam-amak a di nakapapati.”

Sumagmamano a lawas kalpasanna, maysa nga ubing a dua ti tawenna ti pudno a natay manipud iti AIDS iti maysa nga ospital idiay Londres. Maysa a “nakalkaldaang a biktima iti panangyalison iti narugitan a dara,” kuna ti Daily Mail. Ti panagsukimat ipalgakna nga ad-adu pay nga ubbing idiay Britania ti mabalin a makaala iti AIDS “nupay adda ti nainget unay a panangsagat iti dara a mausar iti panangyalison.” Naammuanen a dagiti banko iti dara iti Britania narugitandan. Itan dagiti kadi dodoktor ken dagiti korte palubosanda dagiti nagannak a mangikeddeng iti medikal a pannakaagas dagiti annakda ket bigbigenda ti legal a kalinteganda a mangbusor iti inkapilitan a panangyalison iti dara? Tiempo laeng ti makaibaganto.