Manipud Managbasatayo
Panangpasayaat iti Panagbasayo
Pagyamanan iti artikuloyo a “Mabalinyo ti Agbalin a Nasaysayaat a Managbasa!” (Enero 22, 1985) Naaddaanak ti parikut iti panagbasa iti adu unay ket bassit laeng ti matandaanak. Babaen ti panangsurotko kadagiti singasing iti artikuloyo, mariknak a rimmang-ayak iti 70 porsiento iti pananglagip kadagiti impormasion a nabasak, nangnangruna no iyaplikar dagiti singasing nga adda iti kahon iti sidong ti paulo a “Lagipenyo ken Repasuen,” iti panid 11.
J. H., Brazil
Tulong Idiay Eskuelaan
Maysaak a mannursuro iti matematika ken siensia iti eskuelaan segundaria. Dagiti estudiante ammoda a maysaak a Saksi ni Jehova. Itoy napalabas a Disiembre tunggal estudiante ti masapul a mangaramid iti theme maipapan iti talna. Maysa nga aldaw, dua nga estudiante ti immay iti balayko a nagsaludsod no addaanak iti material a pangrepaso maipapan iti tema iti talna. Maragsakanak a nangipaay iti pammaneknek kadakuada ket intukonko kadakuada ti ruaryo maipapan iti talna. (Abril 8 ken 22, 1985) Sumagmamano nga aldaw kalpasanna, ngangngani tunggal estudiante ti immayen idiay pagtaengak a mangala kadagitoy a ruar tapno maisaganada ti naituding a theme nga aramidenda. Maysa nga estudiante ti nakaawat ti gunggona.
G. C., Italy
Panaginum ken Panagmaneho
Adda napasnek a panangapresiarko iti serie dagiti artikuloyo maipapan iti panaginum ken panagmaneho. (Agosto 8, 1986) Kas maysa a direktor iti talged makalikagumanak iti mamin-ano a daras iti tinawen a mangipaay kadagiti organisasion ti iglesia maipapan iti di umiso a panangusar iti alkohol ken dagiti epektona. Ti reperensia manipud iti Bibilia a nausar iti intero nga artikulo maiyaplikarto iti intero a programa. Manen, agyamankami iti panangipablaakyo itoy a paset iti makaisuro ken napasnek unay a pamay-an.
R. W., Nebraska, E.U.A.
Kabasbasak pay laeng dagiti artikuloyo maipapan iti panaginum ken panagmaneho. Mangisursuroak iti panagmaneho iti maysa a senior high school ket nasarakanmi a dagiti artikulo ti nagsayaatan ti pannakaisuratna ken mangipaay iti umiso a salaysay maipapan iti parikut. Sinaklawko ti topiko maipapan iti panaginum ken panagmaneho kadagiti estudiantek bayat ti umuna a semestre. Dagiti artikuloyo agserbidanto kas nagsayaatan a repaso iti daytoy nasken a tema. Tarigagayak ti pammalubos a mangaramid iti photocopies dagitoy nga artikulo a maiwaras iti ngangngani 515 nga estudiante iti klase ti panagmaneho.
R. D., Pennsylvania, E.U.A.
Naipaay ti pammalubos babaen iti panagsurat a mismo.—ED.
Makipagriknaak ken Shirley Ferrara ken ti asawana a ni Steve. Ti asawak ken siak napukawmi ti anakmi a lalaki iti maysa nga aksidente iti kotse idi Setiembre 1982. Isut’ kakaisuna nga anakmi a lalaki ket 18 a tawenna laeng. Isut’ pasahero iti maysa a kotse a ti agtutubo a lalaki nga agmammaneho ti nabartek unay. Gapu iti teknikalidad, ti Korte Suprema iti Colorado binaybay-andan dagiti pammabasol a panangpapatay gapu iti panagmaneho a maibusor iti agtutubo a lalaki a nagmaneho, uray pay no ti BAC ti darana ket nangatngato ngem 0.10 porsiento isu a maibilangen a nabartek. Iti naudi a nadamagko isut’ agin-inum pay laeng iti kasta unay ken agmammaneho pay laeng. Tarigagayak nga isu ti matulongan sakbay a makapapatay pay ti sabali.
J. G., Colorado, E.U.A.
Ti asawak ken siak napukawmi ti 16-años nga anakmi a babai gapu iti nabartek a tsuper idi 1983. Isut’ kakaisuna nga anakmi. Uray pay no dagiti autoridad padpadasenda nga aramiden ti amin a maaramidda a mangpabassit iti panagmaneho a nabartek, adda iti tunggal indibidual a mangaramid iti pasetna. Ngem ti asawak ken siak ammomi nga itinto laeng baro a sistema ni Jehova a mapukawto ti parikut maipapan iti panagmaneho a nabartek ket dagiti inay-ayatmi ti maisubli iti panagungar.
R. E., Indiana, E.U.A.