Surat Manipud ti Ina ti Di Naipasngay nga Ubing
MAYSAAK a 37 años, nga addaan kadagiti tallo a nagpipintas nga annak. Sangapulo ket innem a tawenen a napalabas naisaadak iti maysa a lamisaan iti kusina bayat a maik-ikkat ti biag ti maysa a tao a saanto a pulos a maam-ammo ti siasinoman.
Dayta a tao ti nagbiag laeng iti tallo ket kagudua a bulan. Pagarupek a ti laeng gayyem dayta a tao isu ni Jehova a Dios. (Salmo 139:13-16) Kasla awan ti siasinoman a mangayat iti dayta.
Iti dayta a tiempo, 16 a tawenen a napalabas, maysaak nga estudiante iti kolehio, nga agtartrabaho iti paset-tiempo ken agbukbukod nga agbibiag iti dakkel a siudad iti West Coast. Arapaapko ti “agbalin a natan-ok” a maikadua kadagiti “nasasayaat a tattao.”
Addaanak kadagiti nagsasayaat a panggep iti masanguanan. Ti maysa nga ubing ket basta saan a maibagay iti estilo ti panagbiagko. Ti ama ti ubing insingasingna ti panangiregreg, ket dikam nagsaritaan ti sabali a pamusposan. Diak kayat a panunoten ti maipapan iti pudno nga ik-ikkatenmi—ti biag ti maysa a sibibiag a kararua. Saan laeng a namnaminsan a pinanunotko ti panangmatmat iti Dios iti dayta.—Exodo 21:22, 23; Roma 14:12.
Siempre, ti panangiregreg iti dayta a tiempo saan pay a “legal.” Ti ama ti ubing nangngegna a ti dadduma a doktor ti mangar-aramid iti panangiregreg iti rabii.
Gapuna, addaak iti apartment ti nobiok a mangipalubos iti daytoy a lalaki a mangikkat iti “pakalappedak” iti biagko. Diak kayat a tamingen ti kasasaad ket, ngarud, napagballigiak ti panunotko. Iti pisikal, saan a nasayaat ti isuamin. Naddaanak ti impeksion iti uneg ta iti tallo nga aldaw naggurigorak iti kasta unay. Kalpasan ti panangsapulko iti pudno a pannakaagas, naimbaganak a saanak a nadangran.
Ket pinanunotko. Siasino ti makaammo iti naaramidan ti timmangken ti kasta unay a pusok iti personalidadko tapno maaramidko dayta nakaam-amak a krimen?
Diak pay naibaga dayta a nagdakes a napalabasko iti asawak. (Adu a tawenen a napalabas ti panagsabetmi.) Diak ammo no adda aniaman a pagimbagan ti panangibagak kenkuana. Idi naammuak ti kinapudno (nasuroken a sangapulo a tawen a napalabas) sinapulko ti pammakawan ni Jehova kadagiti amin a basbasolko, agraman ti panangikkat iti biag ti di pay naipasngay nga ubing. Agtalekak nga Isu impaayna ti asina babaen iti daton ni Jesus a mangabbong kadagiti basbasolko. Gapu ta nadalusanen ti biagko babaen iti panangiyaplikarko kadagiti nasursurok manipud iti Saona a ti Biblia, diakon agar-aramid iti nakaro a basol. Ngem diakto pulos mapakawan ti bagik.—1 Juan 1:7.
No pinatayko ti anakko idi isut’ sumagmamano a bulanna laeng, 6 a tawenna, 20 a tawenna, isu koma ti addaan iti namnama ti panagungar idiay baro a sistema ti Dios. (Lucas 23:43; Apocalipsis 20:12, 13) Ngem daytoy nga ubing pulos a di pay naipasngay, di pay immanges iti damo nga angesna. Tinakawko dayta a biag ken ti posibilidad nga agbiagto manen. Awanen ti pamusposan.
No bumakbaketak, ad-adda a riribukennak ti pannakalagipko. Bayat dagitoy amin a tawen diakon pampanunoten. No malagipko basta lipatekon dayta. “Balbaliwak ti tema” a dagus. Diakon maaramid dayta. Pudno a makariribuk ti agbiag iti kankanayon nga adda a basol. Dayta nga ubing di pulos naaddaan ti gundaway nga ayaten ti siasinoman. Mabalin nga adda pay sabali nga ubing a pakaaramidan dayta.
Dayta ti makagapu no apay nga insuratko amin dagitoy isu nga inlimedko iti adu a tawtawen. No addanto makabasa itoy a surat nga agpangpanggep a mangiregreg, nalabit baliwannanto ti panggepna ket palubosanna dayta nga agbiag. Bay-anyo ti ubing a maikkan ti gundaway nga agbiag ken maayat. Addada rinibo a tattao a mangayat ken mangtagibi iti ubing. Malaksid iti dayta, kamaudiananna, no daytanto ti mangsair iti pusoyo ken konsiensiayo, saanyonto a sanguen ti kinapudno a pinapatayyo ti anakyo met laeng. Mabalin a dikay makarikna ti basol itan; ngem mariknayonto ti basol iti masanguanan nga aldaw. Ket pulosto a di maikkat dayta iti panunotyo!—Isaias 1:18; 55:6, 7.
Buyogen ti nauneg a panagbabawi,
Ina ti Di Pay Naipasngay nga Ubing