Manipud Managbasatayo

Di Naipasngay nga Ubbing

Addaanak ti uppat a makaay-ayo nga annak. Diak pay pulos naguyugoy iti personal a kas ti naadda kaniak iti “Surat Manipud ti Ina ti Di Naipasngay nga Ubing.” (Nobiembre 22, 1986) Nangkettelak kadagiti inosente a biag manipud dua a tattao nga awan pulos makaam-ammo. Ket no panunotek a ni Jehova ti kakaisuna a gayyemda masaktanak, ket diakon maibturan. Makipagad-adalak itan iti maysa kadagiti Saksi ni Jehova, ket ikagkagumaanak nga iyaplikar dayta iti bagik. Daytoy a surat ti nangipabigbig kaniak nga anian a nakaam-amak a banag ti inaramidko. Kayatko a maammuan daydiay nga ina a ti suratna ti nangted kaniak ti naimpusuan a kinatured ken determinasion tapno sursuruak dagiti sibibiag nga annakko iti isuamin a naadalko maipapan ken Jehova tapno maisalakan ti biagda. Maawatak itan no aniat’ kayat a sawen ti kasuratan nga, ‘umawatda kadagiti bagbagida met laeng ti maikari a gunggona.’ [Roma 1:27] Agyamanak unay.

T. S., Estados Unidos

Kabasbasak pay laeng ti “Surat Manipud ti Ina ti Di Naipasngay nga Ubing,” ket nasarakak a makaburibor. Makaburibor agsipud ta siak, maysaak met nga ina ti di pay naipasngay nga ubing. Addaanak met ti tallo a napipintas nga annak ket no mingmingak ida masdaawanak no kasano a naaramidko daytoy a nakaam-amak a banag. Nupay awanak pay idi iti kinapudno iti dayta a tiempo ti aborsion, marikriknak pay laeng ti pannakabasolko. Itan ta naammuakon maipapan ti nakaskasdaaw a Namarsua, ni Jehova, ad-adu pay ti pannakatutuokko gaput’ panangaramidko iti daytoy nakaal-alinggaget a banag iti maysa kadagiti pinarsuana. Uray siak, kayatko a dagulliten ti kinuna ti ina iti suratna. No adda asinoman dita nga agpampanunot nga agpaaborsion, pangngaasiyo ta isardengyo. Ti pannakalaglagip iti dayta isuntot’ pudno a mangbutbuteng kenka iti natda pay a panagbiagmo. Birukenyo ni Jehova ken ti nalinteg a danana ken agtalekkayo kenkuana a tumulong kadakayo. Pangngaasiyo ta dikayo mangaramid ti isu met laeng a panagbiddut kas ti naaramidmi.

Maysa pay a Napnot’ Panagbabawina nga Ina, Estados Unidos

Kayatko nga iyebkas ti panangapresiarko ti “Surat Manipud ti Ina ti Di Naipasngay nga Ubing.” Siak met, matutuokak babaen iti daytoy adda a kankanayon a pannakabasolko. Saanak a kas ti babai iti artikulo nga addaan ti tallo a napipintas nga annak, ket ita diakon mabalin ti maaddaan ti aniaman nga anak. Ti konsensiak dinanto malipatan a pinatayko ti anakko. Naadalkon ti kinapudno ket ti panagtalekko ken Jehova ti tumulong kaniak tapno maibturak daytoy. Addaanak ti kauunegan a panagbabawi.

C. D., Estados Unidos

Diak maawatan no apay pay laeng nga iprintayo ti “Surat Manipud ti Ina ti Di Naipasngay nga Ubing.” Maawatak a nairanta tapno maliklikan dagiti maaramid nga aborsion, nga iti daytoy ket umanamongak unay. Nupay kasta, adun kadakami ti dimteng iti kinapudno a nangpanawen kadagiti estilo ti panagbiag a mangipalubos kadagita a bambanag. Idi naammuanmi ni Jehova ken ti naayat a kinamanangngaasina, imbilangmi a pinakawannakamin iti daytoy nakaal-alinggaget a basol. Ti artikulo ket kasla impariknana kaniak a masapul nga awitek daytoy a kankanayon.

Mangpadpadas nga agserbi ken Jehova nga addaan ti nadalus a konsensia, Estados Unidos

Ti surat ket maysa a panangiyebkas ti nagsurat ti rikriknaenna, ket di nairanta tapno padagsenanna ti asinoman babaen ti rikriknana a nakabasol. Agpayso a makapagtalektayo a no ipudnotayo dagiti basbasoltayo iti Dios ket palintegentay dagiti daldalantayo, saan laeng a pakawanen ti Dios dagiti basbasoltayo no di ket ugasannatayo pay manipud amin a kinakillo. (1 Juan 1:9) Nupay no napudno ti panangpakawan ti Dios, dina mabalin iti daytoy agdama a sistema dagiti bambanag nga ikkaten dagiti amin a pisikal ken emosional a bunga dagiti ar-aramid ti maysa. Mainanamatayo nupay kasta, nga idiay baro a sistema dagiti bambanag ti Dios, dagiti immun-una a bambanag didanto malagipen, didanto mapanunoten. (Isaias 65:17) Ti surat ket naipablaak tapno ipakita dagiti naliday a bungbunga ti panangkettel ti biag ti tao.​—ED.