Dagiti Ig-igam​—Ania ti Gatadda?

TI BADYET dagiti nasnasion iti militaria ita kellaatenna ti panunot. Laisenda met ti naimbag a kapanunotan, no dagita a gastos maipaay iti igam ti ad-adda a maipangpangruna ngem ti kasapulan unay ti sangatauan. Impadto ti Biblia nga iti daytoy “tiempo ti panungpalan” dadduma nga “ari” (wenno agturay a pannakabalin) ti mangipaayto iti “balitokna” ken “napapateg a batbatona” (dagiti kinabaknangna wenno gamengna) a mangidayaw “ti dios dagiti sarikedked” (militarismo). Dadduma a pannakabalin ti tumuladto. Daytoy bulsek a panagtaklin iti ig-igam ti masansan a mangpukaw iti gagangay a suplay dagiti umili kadagiti bambanag a kasapulan. Dagiti kinakurang ken ti kanayon nga adda a panagpilada kadagiti pagtagilakuan ti gagangayen.​—Daniel 11:35-38.

Usigenyo ti gatad daytoy a naganat a panaggasto iti ig-igam, kas impadamag ti Pranses a pagiwarnak a Plus, idi Marso 30, 1985, a naipablaak idiay Montreal, Canada.

◻ Iti tunggal segundo a lumabas, gumasgasto dagiti nasnasion iti lubong iti nasurok a $37,000 (E.U.) kadagiti ig-igam.

◻ Nasurok a 50 milion a tattao ti direkta wenno saan a direkta a naiyempleo iti panagpataud kadagiti ig-igam.

◻ Idiay Estados Unidos ti America, 62 sentimos iti tunggal doliar a magasto iti panagsirarak ti maipaay iti panagsirarak a mainaig iti militaria, ket 27 porsiento kadagiti amin a gastos ti gobierno ti maipaay iti panggep a pangdepensa; uray pay idiay Switzerland, nasurok a 25 porsiento iti amin a gastos ti gobierno ti maipaay iti depensa.

◻ Kadagiti 12 a dadakkel a nasnasion a mangilaklako ti igam, ti Union Soviet ken ti Estados Unidos ti mangipaay iti 73 porsiento kadagiti amin a paglakuan ti ig-igam, maipabiang iti Francia ti agarup 9 porsiento, ken ti Canada idi 1984 nakailako iti agarup $1.3 bilion nga alikamen iti militaria.

Dagiti pagpagilian a nailumlumen iti utang ken marigatan nga agbayad kadagiti utangda manipud kadagiti dadduma a dagdaga isuda dagiti adu ti gasgastuenna iti ig-igam.

◻ Iti nasurok a $350 bilion nga utang dagiti nasnasion iti Latin America kadagiti banko iti Laud, ngangngani $90 bilion ti maipaay iti gastos ti militaria.

◻ Ti Peru, nga addaan utang a $13 bilion, gimmasto iti $4 bilion a maipaay iti ig-igam idi 1983.

◻ Dagiti pagpagilian iti Central America nga aggugubat nakitada ti iyaadu ti gastosda iti militaria iti 50 porsiento iti nagbaetan ti 1979 ken 1983.

◻ No usigentayo ti kasasaad ti ekonomia a di magawidan ti implasion kadagiti dadduma a dagdaga, ti tinawen a gasto iti tunggal tao a mangtaginayon iti militaria ti nakangatngaton: Argentina, $210; Chile, $120; Venezuela, $67; Mexico, $19; Brazil, $17,

Panunotenyo laengen a nagdakkelan koma a bendision ken pakabang-aran no daytoy a makaparigat a gasto iti militaria ket sumardeng! Nupay kasta, dagiti nasnasion didanto sumardeng a bukbukodda. Ni laeng Jehova ti Mannakabalin-amin a Dios ti makapasardeng kadakuada, ket pasardengennanto ida. Daytoy ket sigurado a kari: “Pasardengenna dagiti gubgubat inggana iti ungto ti daga,” wen, “Pasardengennanto ti gubat iti isuamin a lubong,” ket “puuranna pay dagiti luglugan iti gubat iti apuy.”​—Salmo 46:9; The Psalms for Today, ni R. K. Harrison.

Dagitoy a sasao pudno ken mapagtalkanda agsipud ta “ti Dios a mangipaay iti talna” saan nga agulbod!​—Roma 16:20; Hebreo 6:18; Apocalipsis 21:1-5.