Aniat’ Namnama iti Lubong nga Awanan Igam?

ANIAN a bang-ar no maikkat la koma ti makairarem a problema ti negosiot’ armas agraman ti sangalubongan nga abasto dagiti igam! Aniat’ pangnamnamaan ti kasta a masanguanan? Ipakitat’ historia a dagiti nasion dida aramiden dayta iti bukodda a nakem. Sa, dagiti armas maysa la a sintoma. Tapno naan-anay a maagasan ti problema masapul a marisut manipud iti ramutna. Mabalin kadi a biruken ti ramutna, ket no wen, asinot’ mangtaming iti dayta?

Ti negosiot’ armas agbiag gaput’ maysa kadagiti kakaruan a lunod ti sangatauan, ti gubat. Ngem ti gubat saan a timmanor manipud negosiot’ armas. Imbes ketdi, ti negosiot’ armas timmanor manipud gubat. No kasta, gubat kadi ti ramut dayta a kinadakes? Saan, ti gubat maysa la a sanga nga isut’ mangbibiag iti negosiot’ armas. Ania ngad ti mangbibiag iti dayta a sanga?

Asinot’ addaan pannakabalin a mangideklara iti gubat? Amin a konstitusion isaadda dayta a pannakabalin kadagiti ima ti gobierno, a masansan nga isudat’ mangirugi iti gubat tapno maparang-ayda wenno masalaknibanda dagiti interes ti nasionda. Dagiti gobierno supsuportaran dagiti umili. No kasta ti problema isut’ nainaig iti daytoy intero a natauan a sistema dagiti banag, nga inimpluensiaan ti nasionalismo, panagsisinnalisal iti ekonomia, imperialismo iti teritoria, ken rasismo. No kasta, daytoy kadi a sistema isut’ ramut? Saan. Ti nasingsinged a panangusig ipakitana a daytoy a dakes a sistema bibiagen ti nailimed a ramut, gubuayan a di ikankanot’ kaaduan.

Naipannayag ti Nailimed a Ramut

Dayta a ramut naibutaktak idiay Biblia. Daytoy a kadaanan a libro ipalgakna nga adda mannakabalin a naespirituan a parsua, a nasugsogan gaput’ inaagum nga ambision, a bimmangon a maibusor iti Dios. (Job 1:6-12; 2:1-7) Naawagan Satanas (kayuloganna, Kabusor) a Diablo (kayuloganna, Manangpabasol, Mammardaya). Inserreknat’ basol ken ipapatay iti natauan a pamilia. (Genesis 3:1-7) Gapuna, naawagan “daydiay nadangkes.” Isut’ nangsugsog iti immuna a makapapatay nga iraraut sigun iti historia ti tao, ti panangraut ni Cain ken Abel.​—1 Juan 3:12; Genesis 4:8.

Ti Biblia lukaisanna pay ni Satanas bilang “dios daytoy a sistema dagiti banag,” ti dakkel a “dragon” a ‘nangted pannakabalin, trono, ken dakkel nga autoridad’ iti dayta sangalubongan a napolitikaan a sistemat’ panangituray. Ni Jesu-Kristo situtured nga intudona a “ti Diablo . . . nakapapatay idi damo” ket dineskribirna kas “agturay iti lubong.”​—2 Corinto 4:4; Apocalipsis 12:9; 13:1, 2; Juan 8:44; 14:30.

Nupay kasta, daytoy makapapatay a ramut saanto a manayon. No adalentay ti Biblia itudona a ti agdama a makadidigra a periodo ti historia ti tao isut’ maudi nga aldaw ti sistema dagiti banag ni Satanas, a kaipapananna nga isut’ “addaan bassit a tiempo” a natda sakbay nga isut’ maparmek agraman kadagiti pangallilawna. Daytoy probision a pannakapabang-ar manipud impluensia ni Satanas nadeskribir iti simboliko a wagas babaen ken Juan nga apostol ni Jesus: “Nakitak ti maysa nga anghel a bumaba manipud langit nga adda kenkuana daydi tulbek ti mangliwengliweng ken ti maysa a dakkel a kawar iti imana. Ket tiniliwna daydi dragon, ti orihinal nga uleg, nga isu ti Diablo ken Satanas, ket pinarautanna iti bayat ti sangaribo a tawen. Ket isu inggarangugongna iti mangliwengliweng ket inrikepanna ket sinelioanna ti rabawna, tapno dina iyaw-awanen dagiti nasion agingga a naturpos ti sangaribo a tawen. Inton maturpos dagitoy a banag masapul a maluk-atan iti bassit a kanito.”​—Apocalipsis 12:12; 20:1-3.

Panangikkat iti Problema dagiti Armas

Inton masigpaten ti ramut, agsardengton amin a dakes nga impluensiana. Tapno pumudno daytoy sangaribo-tawen a pannakaisublit’ talna ditoy daga, ni Jehova, a Dios a Mannakabalin-amin, ikkatennanto ti mangirarem a problemat’ armas: “Umaykayo, dakayo a tattao, imatanganyo dagiti aramid ni Jehova, no kasano a nangaramid kadagiti nakaskasdaaw a pasamak ditoy daga. Pasardengenna dagiti gubat inggana iti ungto ti daga. Rungrungduenna ti bai ti pana ket gupdenna a pirpirsayen ti gayang; puoranna dagiti lugan iti apuy.”​—Salmo 46:8, 9.

Minilion a tattao dagiti agsagsaganan nga agbiag iti sidong ti kasta a natalna a kasasaad. Tugtungpalenen dagiti Saksi ni Jehova daytoy a padto: “Ti nasion saannanto nga itag-ay ti kampilan a maibusor iti nasion, didanto met adalenen iti pannakigubat uray kaano.” (Isaias 2:4) Gapuna, didan makiraman iti aniaman a porma ti negosiot’ armas. Kas ken Jesus agraman kadagiti disipulona, taginayonendat’ nainget a takder ti neutralidad kadagiti napolitikaan a salisal ket dida makiraman iti aniaman a nailubongan a gubat wenno rinnisiris, aniaman ti mapasamak.​—Juan 17:16.

Sigun kadagiti natungpalen a padtot’ Biblia, asidegen ti panawen inton awanen igam a mapanday para iti gubat, inton amin a kinabaknang toy daga mausarton a paglaingan dagiti agnaed kenkuana. Ti Prinsipe ti Kappia, a ni Jesu-Kristo, ti Ari ti amin a daga, isut’ manggarantia itoy: “Ispalennanto ti napanglaw inton umkis, ken ti naparigat nga awan mangarayat kenkuana. Mangaasinto kadagiti nanumo ken kadagiti napanglaw, ket dagiti kararua dagiti napanglaw isalakannanto. Subbotennanto dagiti kararuada iti panangirurumen ken iti panangranggas, ket napategto ti darada iti saklangna.” Gapuna, agragsakkayo! Asidegen a pumudno ti lubong nga awanan kadagiti igam!​—Salmo 72:12-14.

[Dagiti ladawan iti panid 10]

Asidegen ti panawen nga awanton ti gubat. Imbes ketdi, ti daga agbalinton a natalna a paraiso

[Credit Line]

U.S. Marine Corps photo

Tahiti Tourist Promotion Board