Tinengngeldak dagiti Demonio

MAYSAAK a medium, managsalamangka, lalaki a baglan. Usarek ti panagpadles. Mammuyonak. Tenglek dagiti dadduma babaen iti panaganito. Agaramidak iti black magic ken voodoo. Kaaduan kadagiti espiritistiko nga ar-aramid a kondenaren ti Biblia idiay Deuteronomio 18:10-12, ar-aramidek.

Ti kadua ni apostol Pablo nga agbambaniaga a ni Lucas nagsurat: “Ket naaramid nga idi mapmapankami iti disso a pagkararagan sinabatnakami ti maysa a balasang nga adda espirituna a mammadles, nga adu ti it-itedna kadagiti apona a masapulanna iti panagpadpadlesna.” (Aramid 16:16) Kas iti kaso dayta a babai, maysa a demonio ti nangipaay iti pannakaammo kaniak kadagiti bambanag a di mabalin a maammuan babaen iti gagangay a pamay-an.

Kas pangarigan, sakbay ti ipapatay ti apongko a baket, ammok nga asidegen ti ipapatayna. Ket no maysa a kabagian ti agsikog, maammuakon dayta sakbay ti pannakaammo dagiti dadduma. Dagitoy ket saan a basta arapaap a pimmayso; ti pannakaammok kadagita a bambanag ti kankanayon nga umiso. No tarigagayak nga agsakit ti padak nga estudiante, mannursuro, wenno kabagyan, agsakitda.

Naminsan naupayak ken apongko a baket ket kayatko a masugatna ti bagina. Inawagak ti demonio, a dinawatko nga espisipiko a sugatenna koma ti bagina​—iti dayta a malem nasugatna ti bagina met laeng babaen iti kutsilio.

Iti panagaramidko iti voodoo, agusarak iti lupot ket mangaramidak iti ladawan ti kabsatko. Kayatko a dinak rirriribuken. Kalpasanna, no makaasidegen kaniak iti sangapulo a pie (3 m), isut’ makariknan iti ut-ot iti barukongna ket marigatanen nga aganges. Gapuna nasursurona ti immadayo kaniak.

Kamaudiananna, maysa nga am-ammok ti nanglais iti abilidadko a mangayab kadagiti demonio. Ammok nga agus-usar iti droga. Gapuna imbagak kenkuana nga isut’ maaresto ket kalpasanna mawayawayaan. Inaramid dagiti demonio ti dinawatko. Iti uneg ti dua a bulan isut’ naaresto. Kalpasanna nabaybay-an ti pammabasol, ket nawayawayaan. Ti lalaki pulos a dinan pinagduaduaan manen dagiti abilidadko.

Pannakaigamer iti Okultismo

Napeklan ti pamiliak iti ritual ti relihion ken paganismo iti Ozark Mountains idiay Estados Unidos, a sadiay dagiti tattao managusarda kadagiti sapsapo ti ayat, ken dagiti pumada iti dayta. Naipasngayak kalpasan ti iyaakar dagiti dadakkelko idiay San Francisco. Pudno a dida tarigagayan dagiti annak; dayta ti lapped iti siwayawaya nga estilo ti panagbiagda. Gapuna nabaybay-anak, saan a naipakitaan iti ayat, nasaktan ti riknana. Nagbalinak a managsolsolo, gumurgura kadagiti tattao.

Iti nasapa nga edad naawisak iti okulto. Buyaek amin dagiti sine ken programa iti TV a mangipabuya iti dayta. Ket idi agarup innem ti edadko, kanayonen nga agusarak iti Ouija board. Silulukat ken, kinapudnona, magagaranak a makisarita kadagiti adda iti naespirituan a lugar. Ammok nga adda dagiti demonio ket komportableak a makisasao kadakuada. Ket inikkandak kadagiti naisangsangayan a pannakabalin ken pannakaammo.

Rinugiak ti nagbasa kadagiti amin a liblibro maipapan iti okultismo a maiggamak, a gun-odek ida manipud kadagiti libraria publiko ken, nangnangruna, kadagiti paglakuan ti liblibro. Maysa a tiendaan, nga imatmatonan ti maysa a medium, ti mangilaklako a nangnangruna kadagidiay nga agar-aramid iti panagbaglan, wenno black magic. Iti panagbasbasa kadagita a liblibro maipapan iti okultismo, naammuak dagiti nagnagan dagiti demonio a nakiumanen idi napalabas kadagiti tattao a nagar-aramid iti espiritismo.

Kalpasanna, iti pannakisaritak kadagiti demonio, rinugiak nga inusar dagitoy a nagnagan no makisaritaak kadakuada. Ket no makiumanak iti partikular a demonio, ti personalidad dayta ken ti pamay-an ti panagtrabahona naiduma manipud iti sabali a demonio nga awagak. Gapuna naam-ammok dagiti pinulpullo a demonio babaen iti nagan.

Manipud iti panagbasbasak maipapan iti okultismo, naammuak a dagiti demonio isuda dagiti angheles a nakapukaw iti anamong ti Dios ket dagitoy saan nga isu dagiti espiritu, wenno kararua, dagiti natnatayen a tattao. Naaddaanak iti pannakipagrikna kadagitoy nga angheles, ket nangnangruna a maladingitanak ken Satanas. Nagbalinak a managdayaw ken Satanas, ngem, maisupadi iti dayta, agkararagak pay met laeng iti Dios. Ket no masungbatan dagiti karkararagko, patiek a ti Dios ti nangsungbat kadakuada. Naan-anay nga inallilawnak ni Satanas.​—2 Corinto 11:14.

Nupay no mangipapaayda kaniak iti naisangsangayan a pannakabalin, dagiti demonio didak tinulongan a nagbalin a naimbag a tao. Maisuppadi ketdi, tiniritirda ti panunotko tapno gumuraak imbes nga agayat. Kabayatanna nagbalinak a mannakiabig, mannanakaw, mammartek, manangabuso ti droga, ken homoseksual.

Idi Enero 1974 natay ni apongko a baket. Daytoy ti nangpaladingit kaniak iti kasta unay, ta isu ti kakaisuna a tao nga inay-ayatko. Idi ubingak pay isut’ mangibasa kaniak iti Biblia ket sasawenna ti maipapan iti panagungar. Itan kayatko a maammuan ti ad-adu pay maipapan iti panagungar. Manipud kinaubingko a nagtultuloy tinarigagayak ti agbiag nga agnanayon, ket inkari dagiti demonio nga agbiagak nga agnanayon. Ngem saan a nalawag no kasano a maibanag daytoy.

Maysa a Nagpateg a Panagsabet

Di nagbayag kalpasan ti pompon ni apongko a baket, nadakamatko iti babai a managan Gwen, a katrabahuak, a ti panungpalan ti lubong umay ngem awan ti mamati iti dayta. Kuna ni Gwen a patienna dayta ket nasdaaw ta ammok. Naammuak daytoy manipud kadagiti demonio, ngem impakita ni Gwen kaniak manipud iti Biblia.

Kanayon a sawen ni Gwen ti maipapan ken Jehova ket imbagana nga isu Daydiay mangiyeg iti panungpalan daytoy a sistema. Imbagak kenkuana a kagurak ti pannakangngegko iti nagan, a Jehova, ket dinawatko a dinanto usarenen dayta. Nasaktan ti nakemna ket imbagana a no dina mabalin nga usaren ti pagay-ayatna unay a nagan, nasaysayaat a din makisarsarita kaniak, ta ti Jehova isu ti nagan ti Dios.

Nasdaawak. Gapuna iti dayta a rabii nagawidak, ket innalak ti King James Version, a Biblia ti natay nga apongko a baket, ket rinugiak nga inukag dayta, a sapsapulek ti nagan a Jehova. Ammok a no masarakak dayta iti daytoy a Biblia, umiso ni Gwen, a ti Jehova ket nagan ti Dios. Ngem siguradoak nga awan sadiay. Nakigtotak idi nakagtengak iti Exodo 6:3, isu a mabasa: “Ket siak nagparangak ken Abraham, ken Isaac ken Jacob, kas Dios a Mannakabalin-amin, ngem iti naganko a JEHOVA saandak a naammuan.”

Nabigbigko a dagus a ni Jehova ti pudno a Dios ket no idilig kenkuana ni Satanas awan ti pannakabalinna! Ti pannakakitak iti kagurak a nagan idiay Biblia, agraman ti pannakangngegko iti namnama a panagungar, ti nangisuron kaniak a mangrugi a makipagadal kadagiti Saksi.

Ilalapsut iti Panangtengngel ti Demonio

Di nagbayag kalpasanna intugotnak ni Gwen iti maysa a gimong dagiti Saksi ni Jehova. Ti palawag ket maipapan iti atap nga animal a nadakamat idiay libro ti Biblia nga Apocalipsis, daydiay addaan bilang a 666. Adda bassit pannakaammok a natiritir nga impormasion maipapan iti daytoy manipud kadagiti demonio, ket itan pudno a nagsiddaawak a dagitoy ti naisurat iti Biblia. Interesadoak, gapuna iti sumaganad a lawas rinugiak ti regular a pannakipagadal ti Biblia kadagiti Saksi.

Siempre, dagiti demonio, dida kayat nga agadalak. Ngem ammok a ti maad-adalko isu ti kinapudno, ket diak baybay-an dayta uray pay no padpadasendak a lapdan dagiti demonio. Tungpaendak iti pannaturogko. Naminsan ti pang-orko iti ulo nakaro unay ta innalana ti adu nga or-oras a napukaw ti ut-otna. Nagkararagak ken Jehova a maipaay iti tulong, ket kalpasan dayta iyadayona ida iti kuartok.

Nupay kasta, saan a sumardeng dagiti demonio. Iti ruar ti kuartok, kiratenda dagiti tawa. Agpatpatnag nga aramidenda dayta, ta makaturogak laeng iti dua nga oras. Padpadasendak a pakapsuten. Ngem kankanayon ti panagkarkararagko ken ni Jehova ken ipapanko kadagiti amin a gimong dagiti Saksi, ket tinulongannak ni Jehova.

Pudno, dagiti demonio addaanda ti dakkel a pannakabalin. Mangpapatayda pay kadagiti tattao, kas kadagiti sangapulo nga annak ni Job. (Job 1:18, 19) Ket siguradoak a tarigagayandak a papatayen, ta adipendak nga inikkanda ti naisangsangayan a pannakabalin ket panawak idan tapno agserbiak iti kabusorda, ni Jehova a Dios. Gapuna ti abilidad ni Jehova a mangsalaknib kaniak isut’ pammaneknek a ditay agbuteng kadagiti demonio.

Idi kalgaw iti 1974 timmabunoak iti kumbension distrito dagiti Saksi ni Jehova idiay Oakland-Alameda County Stadium. Sadiay inkeddengkon nga iti sumaganad a kasta a kumbension agbautisarakton. Gapuna, iti dayta met laeng nga stadium, idi Hulio 18, 1975, nabautisaranak, ket nangasawaak iti padak a Saksi iti dayta nga Oktubre.

Uray pay kalpasan ti panagasawamin ken ni Mari, dagiti demonio riniribukdakami, a nangbutbuteng iti asawak no dadduma. Ni Mari ket kameng ti kongregasion a nangrugiak a timmabuno kadagiti gimgimong. Ammona ti nalikudak sakbay ti panagasawami. Kinunana pay a ti suspetsana ket maysaak a lalaki a baglan idi damo a napanak idiay Kingdom Hall. Pudno a nakabutbutengak. Naan-anay a nangisit ti kawesko ket diak makisarita iti siasinoman, basta mapanak kadagiti gimong ket agtugawak sadiay.

Naminsan impagarupmi a dikam makalapsut kadagiti demonio agingga a dagitoy ken ni Satanas ti maigarangugong iti mangliwengliweng nga abut. (Apocalipsis 20:1-3) Gaput’ iyaadanimi ken ni Jehova babaen iti kararag ken ti pananggundaway iti tunggal probision nga ipapaayna babaen iti organisasionna, adu a tawtawenen a dagiti demonio didakam riniribuken a kas idi damo.

Nabendisionankami a naaddaan kadagiti tallo a napipintas nga annak a babbai, ket bayat ti napalabasen nga uppat a tawen, ni Mari agserserbin iti ministerio kas regular a payunir. Pudno a kumitkitakami iti tiempo inton ni Satanas ken dagiti demoniona mapukawdanton iti agnanayon! Kabayatanna, nupay no dikam mapadpadasanen ti direkta a panangriribuk dagiti demonio, dikamto pulos maliplipatan ti pannakidangadangmi a maibusor kadakuada, kas insurat ni apostol Pablo: “Ta ti pannakidangadangtayo saan a maibusor iti lasag ken dara, no di ket . . . kadagiti agturay iti lubong daytoy a sipnget, kadagiti espiritu ti kinadakes idiay nailangitan a disso.” (Efeso 6:12)​—Kas insalaysay ni Ralph Anderson.

[Blurb iti panid 12]

No makiumanak iti partikular a demonio, ti personalidadna naiduma iti sabali a demonio