Inton Agpatinggan ti Kanser
“Inton tawen 2100 dagiti irarang-ay kadagiti pamunganayan a panagsukimat iti biolohia ti mabalin a mangipalubos iti pananglapped ti kanser babaen kadagiti pamay-an nga itan di pulos napakpakadaan.”—The Causes of Cancer.
SIGUN iti padto ti Biblia, ti kanser agpatingganto pay iti nasapsapa, ket siempre daytat’ “babaen iti di pulos naripripirip,” dagiti mannurat kadagiti libro a naadaw iti ngato. Apay a kunaentayo dayta?
Agsipud ta ni Kristo Jesus, a naibaon ditoy daga nasurok a 1,900 a tawtawen ti napalabasen, ti naikkan ti pannakabalin a mangisubli ti biag ken salun-at ti sangatauan. Iti naminsan, uray no dina pay nakitkita ti pasiente, inagasanna ti adipen ti maysa a pangulo ti buyot a Romano a “naidalit idiay balay a di makagunay, ket matuokan unay.” (Mateo 8:5-13) Iti naminsan manen nga okasion, inagasanna ti katugangan a babai ni adalanna a Pedro, a naggurigor. Kasanot’ panangaramidna iti dayta? “Ket sinagidna ti ima daydi babai, ket ti gurigor pimmanaw kenkuana, ket isu bimmangon.”—Mateo 8:14-17.
Ti panangusig iti ministerio ni Jesus ipakitana nga isut’ nangpaimbag iti nagduduma nga an-anayen dagiti tattao iti agpadpada a sekso ken iti nagduduma nga edad. Insublina ti salun-at dagiti pilay, dagiti pawad, bulsek, ken umel, dagiti managkissiw, ti paralitiko, ti babai a nabayagen nga agpadpadara, maysa a lalaki a nagango ti imana, ken ti sabali pay a lalaki nga umbal ti bagina. Isu met ti nangpagungar kadagiti tattao manipud ken patay. Kasano ti panangaramidna iti dayta? Babaen kadi ti maysa a naisangsangayan a kita ti panangagas?
Kinapudnona, daytat’ saan a hipnoterapia, sikoterapia, wenno dadduma a kita ti medikal a panangagas. Daytat’ saan met a gapu iti personal a kinasirib, pannakaammo wenno pannakabalin ni Jesus. Daytat’ namilagruan a panangagas manipud iti sobrenatural a Gubuayan. (Mateo 8:17; Isaias 53:4) Dayta isut’ espiritu ken pannakabalin ni Amana a nangpataud ti pannakaagas. Nupay kasta, daytat’ naiyaplikar laeng iti minoridad kadagiti masakit idi kaaldawan ni Kristo ket daytat’ nanglapped kadagiti naagasan manipud ipapatayda iti kamaudiananna. Ngarud aniat’ panggep a pudno a sinerbian dayta?
Ti panangagas nga inaramid ni Jesus ti mangitudtudo iti aldaw inton amin a natulnog a sangatauan magunggonaandanto manipud pannakaisubli ti inted-Dios a sagsagut ti salun-at ken biag. Gapuna addaantayo iti makaparegta a kari ti Biblia: “Adtoy! Ti tabernakulo ti Dios adda kadagiti tattao, ket isu makipagnaedto kadakuada, ket isudanto dagiti tattaona [ditoy daga]. . . . Ket punasennanto ti amin a lulua kadagiti matada, ket awanton ni patay ket awanto metten ti sasaibbek wenno sangsangit wenno rigrigat. Ta dagidi immuna a bambanag napalabasdan.”—Apocalipsis 21:3, 4.
Maysa kadagidiay immuna a bambanag a napalabaston isu ti kanser agraman kadagiti pagtataudanda. Iti sidong ti panagturay ti gobierno ti Pagarian ti Dios babaen ken Kristo, dagiti makapapatay nga aglawlaw ti mapunaston. Dagiti makapakapuy a panagdandanag maikkatdanton, ket ti sistema a pangsarapa iti sakit iti tao agandarton kas iti nakairantaanna. Ti nasalun-at a bagbagi makitunosdanto iti nasalun-at nga is-isip, a naisentro kadagiti pudpudno a naespirituan nga ipatpateg—Isaias 33:24; 35:5, 6.
Kasla aya aglablabes ti kinapudno amin daytoy kadakayo? Kaskasdi, kas kuna ti Biblia addaantay to garantiya ti Dios: “Ket Daydi situtugaw idi trono kinunana: ‘Adtoy! Pagbalinek a baro dagiti isuamin a bambanag. . . . Isuratmo, ta dagitoy a sasao papatien ken napudnoda.’” (Apocalipsis 21:5) Isu daytoy ti sibibiag a namnama a mangpappapigsa kadagiti Saksi ni Jehova a mangibtur kadagiti panangdadael ti kanser, dadduma uray pay agingga ken patay. Ammoda a ni Jehova ti nangikari iti “baro a langlangit ken ti maysa a baro a daga.”—Isaias 65:17, 18.