Agnanayon a Pannakaagas Asidegen

TI MEDIKAL a siensia, agraman dagiti nakaskasdaaw a moderno a rinang-ayanna, ti mabalin a mangabak iti pannakidangadang​—ngem kaskasdi maabak iti gubat. Apaman a mariknatayo a nakapataudtayo kadagiti paglaingan ken kapadasan, mangrugi metten a pasardengennatayo dagiti an-anayen, ket di agbayag umayen ti ipapatay. Ngem ikari ti Dios a saan a kanayon a kasta. Babaen iti mammadtona a ni Isaias, kinuna ti Dios nga ‘alimonenna nga agnanayon ni patay, ket punasennanto dagiti lulua kadagiti isuamin a ruprupa.’​—Isaias 25:8.

Narigat kadi a patien dayta? Pagarupenyo kadi a ti biag a 80 a tawen atiddog unayen? Addada dagiti kaykayo nga agbiag iti rinibribo a tawtawen​—apay ketdin a dikay agbiag iti kasta? Inted ti Dios iti starfish ti pannakabalin a mangpataud iti baro a takkiag no dayta ti naisina. Dina kadi kabaelan nga isubli ti bagiyo iti naan-anay a salun-at ken kinakompleto?

Ngangngani 2,000 tawenen ti napalabas nangaramid ni Jesu-Kristo kadagiti nakaskasdaaw a datdatlag ditoy daga. Inagasanna saan laeng a dagiti agkukutel no di ket ti “isuamin a kita ti sakit ken isuamin a kita ti an-anayen kadagiti umili.” Kuna ti napaltiingan a rekord nga inagasanna “dagiti tattao a pilay, pawad, bulsek, ken umel . . . Ti bunggoy nasdaawda idi makitada dagiti umel nga agsao ken dagiti pilay makapagnada ken dagiti bulsek makakitada.” Ni Jesus dina kasapulan dagiti agidonar nga an-animal wenno dagiti panangimula kadagiti organo​—pinaimbagna dagiti organo a mismo wenno paspaset ti bagi nga addaan an-anayen. Dagus a mangpaimbag, no dadduma uray pay manipud iti adayo.a

Ni Jesus addaan saan laeng a ti pannakabalin a mangpaimbag no di ket isut’ addaan pagayatan a mangaramid iti dayta. Iti maysa nga okasion, maysa nga agkukutel ti nagkuna kenkuana: “No kayatmo, mabalinnak a dalusan.” Ni Jesus, idi simnek ti asina kenkuana, kinunana: “Kayatko. Madalusanka koma.” Pinagungarna pay dagiti natay​—ket iti naminsan idi a maruprupsan ti bagi.​—Marcos 1:40-42; Juan 11:38-44.

Ania ti ipakita dagitoy a nakaskasdaaw nga ulidan? A ni Jesus, a naitronon a nailangitan nga Ari, saan laeng nga addaan ti pannakabalin no di ket ti pagayatan a mangiyeg iti pudpudno ken agnanayon a pannakaagas. Aramidennanto ti kas iti ikarkari ti Biblia.

Dayta a libro, ti Biblia, deskribirenna ti nakaskasdaaw a panagbalbaliw a dumteng iti mabiiten iti natauan a paspasamak​—ti pannakibiang ti Dios a mismo iti ar-aramid ti lubong ken ti pannakaipasdek manen ti maysa a paraiso a daga nga awanan iti polusion, sakit, krimen, gura ken gubgubat. Dayta saritaenna ti pudpudno ken agnanayon a pannakaagas, agpadpada iti naespirituan ken iti pisikal. Ket ipamatmat ti padto ti Biblia nga addada dagiti tattao a nagbiagen kabayatan ti Gubat Sangalubongan I a sibibiagto pay laeng inton maaramid daytoy a sangalubongan a panagbalbaliw.​—Mateo 24:3, 14, 34.

Pudno a Salun-at

Ti pangserra a kapitulo ti Biblia saritaenna ti maysa a nalinteg a panangituray a “bumaba manipud langit nga aggapu iti Dios”​—a maipaay iti sangatauan a mismo ditoy daga. Ket ti Dios “punasennanto ti amin a lulua kadagiti matada ket awanton ni patay ket awanto metten ti sasaibbek wenno sangsangit wenno rigrigat. Ta dagidi immuna a bambanag napalabasdan.” (Apocalipsis 21:2-4) Iti literal ken kasta met iti naespirituan a pamay-an, “maluktanto dagiti mata ti bulsek, ken ti lapayag ti tuleng maluktandanto. Iti kasta aglagtonto ti pilay a kas maysa nga ugsa, ket ti dila ti umel agkantanto.” “Ket ti agtaeng dinanto kunaen: ‘Masakitak.’”​—Isaias 35:5, 6; 33:24.

Ngarud, saan laeng a ti medikal a tulong ken pannakaagas a maipaay iti ababa a tiempo, no di ket ti pudno a salun-at a maipaay kadagiti isuamin isu ti kari kadagidiay agbiag iti sidong ti Pagarian ti Dios iti daytoy a daga. Pudno a dayta ket maysa a napateg a kalat nga ikagumaantayo a gun-oden!

[Dagiti Footnote]