Sadinot’ Nangrugianna?
PANUNOTENYO laengen ti pannakasdaawko idi nangngegko ti karkarna a timek ti panagkalangiking dagiti kampana, maysa a biolin, ken dagiti tattao agsalsalada iti ruar ti maysa a pagdagusan idi ugma idiay bario ti Cotswold iti Broadway, Inglatera. Bayat nga umasidegak, nakitak dagiti grupo dagiti lallaki nga agsalsala a nakakawes iti puraw, a nakakallugong iti straw, a napnapno kadagiti sabsabong ken ribbon, nga addaan kadagiti babassit a kampana nga agkalkalangiking nga agtutunos manipud kadagiti gurong da. Dagitoy dagiti managsala a Morris. Buybuyaek ti maysa nga ugali a ginasgasut a tawenen. Gaput’ panagusiuso, inkeddengko nga ammuen ti ad-adu pay maipapan iti daytoy puro-lallaki a panagsala.
Maysa a gubuayan ti nagkuna a ti nagan a Morris agtaud iti Español a morisco, a kaipapananna “Moorish.” Dadduma ti mamati a dayta ti timmaud manipud sala a morisco, wenno ti pandango ti Español. Nupay idiay Inglatera dayta ti agsubli idi panawen ni Henry VII (1457-1509), daytat’ nagbalin a nalatak kadagiti pipiesta ti bario bayat ti panagturay ni Henry VIII (1509-47). Dagiti umasping a salsala ti gagangay met kadagiti dadduma a paspaset iti Europa, ti Makintengnga a Daya, India, ken dagiti dadduma a paspaset iti Central ken Sud America. Ngem ania ti irepresentar dagiti salsala a Morris?
Ti The New Encyclopædia Britannica ilawlawagna a ti gagangay a paset dagiti adu kadakuada isu ti maysa a grupo a panagsala dagiti lallaki “a mangay-aywan iti maysa a pagano a dios a mangramrambak iti panagsublina manen kalpasan ti ipapatayna. Masansan dagiti managsala agkawesda iti puraw ken ti sala addaan kadagiti naikabit a kampana kadagiti saka ken bagbagida. Adda rikna a dagiti salsala ti addaan kadagiti pannakabalin ti mahika wenno mangisubli iti gasat ti agtalinaed no dagitoy ti naipaugalin a masalsala.”
Ti dadduma a kita ti sala a Morris isu ti horn dance a maaramid a tinawen idiay Abbots Bromley idiay Staffordshire, Inglatera. Ti isu met laeng nga enciclopedia ilawlawagna: “Daytoy a prusesion ti sala iramanna dagiti innem a lallaki a kasla animal nga addaan kadagiti nagsanga a sara . . . maysa a lalaki-babai, wenno Maid Marian, maysa a maag, nga agaw-awit kadagiti phallic symbols.”
Nupay kadagiti adu a Morris ti panagsala ti mabalin nga awan aniamanna a paglinglingayan, nainsiriban para kadagiti managpanunot a Kristiano ti agannad kadagiti nagtaudanna.—Kameng a mannurat iti Agriingkayo!