Karkararag a Maipaay iti Kappia—Siasino ti Dumngeg Kadakuada?
ANIA ti ar-aramiden ti American Indian, a nabalangatan iti napno ti dutdot, iti isu met laeng nga entablado a kadua ti padi a Greek Orthodox? Apay a ti Buddhista a Dalai Lama nakatugaw a kadua ti Arsobispo iti Canterbury? Ania ti mabalin a pagpadaan ti Judio a rabbi iti arsobispo ti Russian Orthodox Church iti siudad? Ket apay a ni Papa Juan Paulo II ti mangidaulo iti kasta a panagtitipon?
Di pay nabayag kasla saan a mapasamak a ti papa ti makiraman iti panagkararag iti isu met laeng nga entablado a kadua dagiti papangulo iti dadduma a kangrunaan a relrelihion. Ngem, idi naladawen a paset ti 1986, iti Italiano a siudad iti Assisi, isut’ nakikadua kadagiti amin a dadduma a relrelihion iti panangselebrar iti “Aldaw ti Kararag iti Lubong a Maipaay iti Kappia.” Ti panagtitipon ti indauluan ti papa a maitunos iti panangituding ti Naciones Unidas iti 1986 a kas ti Internasional a Tawen iti Talna.
Idiay Assisi, addada dagiti nadumaduma a karkararag a maipaay iti kappia. Ngem sino ti nagimdeng kadakuada? Ti Trinitariano a Dios iti Kakristianuan? Wenno ti Dios dagiti Judio? Ni Allah dagiti Muslim? Ti Great Thumb ken Roaring Thunder dagiti animist? Adda kadi aniaman kadagitoy a didios a nagimdeng kadagitoy a karkararag? Itan ta limmabasen ti sumagmamano a tiempo nanipud ti pasamak idiay Assisi, nabataden dagiti sungbat.
Ania ti Napasamak
Dagiti karkararag dagidiay a relihiuso a papangulo isu ti pagnguduan ti internasional nga aldaw iti kararag a naaramid idiay Assisi iti Makintengnga nga Italia idi Oktubre 27. Maysa a dakkel nga entablado ti naibangon, a ti sao a “KAPPIA” a naisurat kadagiti 14 a pagsasao ti adda iti likudan. Naurnosda iti maysa a nalawa a sinan-sirkulo, a ti papa ti adda iti tengnga, nasurok a 60 a papangulo iti kangrunaan a relrelihion ti nagsusublat a nagkararag manipud iti rostrum. Dagiti kamera iti telebision ti nangsaklaw iti seremonia a makuna a buybuyaen ti 500 a milion a tattao.
Ti immuna a nagkararag isu dagiti Buddhista, a nangkalikagum iti “baybay iti kinaragsak ken rag-o.” Kalpasanna dagiti Hindu nagdawatda iti “kappia kadagiti amin a nabiag.” dagiti Muslim nagkararagda: “Dayaw iti Dios, Apo iti Uniberso.”
“Ikkannakami iti kappia,” isu ti dawdawat dagiti Africano nga animist bayat ti panagdawdawatda kadagiti didiosenda. “Idatonmi ti Suako iti Naindaklan nga Espiritu, iti Ina a Daga,” kuna dagiti American Indians bayat ti panangtabakoda iti suako iti kappia. “Ipaaymo ti kappia iti daga,” indawat dagiti Judio.
“Iti talna ken panagkaykaysa agdawattayo iti Apotayo a Dios,” dayta ti kararag dagiti pannakabagi ti Katoliko, Anglicano, Luterano, ken Greek Orthodox. Dagiti Sikhs, Zoroastrians, Shintoists, ken Jains nagkararagda met a maipaay iti sapasap a kappia.
Okasion a Naipaayan iti Kinalatak
Iti damdamo unay, nagkomento ti pagiwarnak, a ti kasta a nangato ti saadda a klero iti relrelihion iti lubong ti nagtitipon iti maymaysa a lugar tapno agkararag. Maipaay iti daytoy a rason ti panagtataripnong ti naawagan maysa a “historiko nga okasion.”
Dadduma ti mamati a ti padto ti Biblia natungpal sadiay. Agsipud ta ti Assisi ti naisaad iti maysa a turod, ibilangda dayta a simbolo ti bantay iti Mikias kapitulo 4, bersikulo 2. Maysa a report ti nagkuna a ti panagtitipon idiay Assisi ket “maysa a panagtitipon nga impadto ti mammadto a ni Mikias 2,700 a tawenen ti napalabas: ‘Iti [panawen iti] panungpalan ti bantay a sadiay ti nagtakderan ti templo ti Apo isunto ti katatayagan . . . Amin a tattao aguurnongdanto iti sakaananna ket kunaendanto: Umulitayo iti bantay iti Apo. Isuronatayonto iti aramidentayo.’”—Voce delle Contrade.
Ti pagiwarnak nga Il Sabato ti sigaganetget a nagkuna: “Dayta ti damdamo unay nga adda napasamak a kasta nanipud idi pasamak ti Torre iti Babel. Kalpasanna, gaput’ tarigagayda a makagteng iti langlangit, dagiti tattao nabingaybingayda. Itatta, iti nagan ti relihiuso a kapanunotan a nangilukat kadakuada iti sagut ti Dios, ti talna, agkaykaysa dagiti tattao.”
Naibangon dagiti Serioso a Salsaludsod
Ti pasamak di pagduaduaan nakaskasdaaw. Nupay kasta, dayta ti nangibangon iti nainkalintegan a salsaludsod. Ti inaldaw a pagiwarnak a La Nazione imtuodenna: “Dayta kadi a mensahe naserbianna ti panggepna? Nakagteng kadi iti puspuso iti nasurok a kagudua a bilion a managbuya? Nakaipaay kadi dayta ti di pannakaibanag iti napnuan lapped a saad dagidiay a mangikeddeng ken mangiturturong iti paspasamak, direkta wenno saan a direkta, ken ti pagtungpalan iti lubong?”
Dagiti managpanunot a tattao agimtuodda kadagiti dadduma a makasukisok a salsaludsod: Awaten kadi ti Dios dagiti amin a karkararag aniaman a kita ti panagdayaw nga ar-aramidenda? Umdasen kadi ti agkararag a maipaay iti maysa a banag a di siguraduen ti panangmatmat ti Dios iti dayta? Naallukoy kadi dagiti tattao babaen iti daytoy a panagtataripnong tapno agtrabaho a maipaay iti talna? Ania ti isuro ti napalabas kadatayo? Ken kangrunaan iti amin, ania ti kunaen ti Kasuratan maipapan iti no kasano ti pannakaibanag ti sangalubongan a talna?
Masapul nga imtuodentayo met: Ti kadi panagtataripnong dagiti relrelihion iti lubong idiay Assisi iti kinapudnona maysa a moderno a Torre iti Babel?