Baro a Pasilidad dagiti Saksi ni Jehova iti Panagipatulod
DAYTOY a nagdakkelan a patakder nga adda laeng iti igid iti puerto manipud iti pinansial a distrito iti nalatak a Wall Street iti Nueva York, ket maysa a prominente a paset iti puerto iti Brooklyn. Masarakan idiay 360 Furman Street, iti sumagmamano laeng a bloke kadagiti paktoria a pagimprentaan dagiti Saksi ni Jehova, daytat’ nasayaat ti pannakaisaadna a maipaay a pagipatulodan kadagiti literatura iti Biblia iti sangalubongan.
Naibangon idi 1928, ti patakder iti Furman Street ti ginatang dagiti Saksi ni Jehova idi Marso 15, 1983. Nanipud idi, dayta naglasaten iti kangrunaan a panagbalbaliw. Idi Enero daytoy a tawen, ti maudi kadagiti dati a mangab-abang iti patakder pimmanawen, gapuna dagiti Saksi ni Jehova mausardan ti intero a lugar.
Ti patakder addaan iti maysa a milion a kuadrada pie (93,000 kd m) a daplat, wenno ngangngani 23 acres (9 ha), ngangngani kakatlo ti naituding iti baro a Shipping Department. Ti dakkel a maikadua a grado—373 pie por 345 pie (agarup kas iti kadakkel iti tay-ak ti soccer a 1 1/2)—ti nanglaon kadagiti opisina ken ti moderno a conveyor system a mamagbalin a posible ti panangipaay a dagus kadagiti pedido a literatura.
Sakbay ti pannakaiyakar ti Shipping Department idiay Furman Street idi otonio iti 1985, masansan nga alaenna iti innem a lawlawas ti panangipaay kadagiti pedido a literatura idiay nailet a pagipatulodan idiay 30 Columbia Heights. Ngem itan, babaen iti sistema ti kompiuter, maysa a baro a sistema ti pagawit ken ti adu a kuarto a pagrikosan, ti maysa a pedido ti gagangayen a maipatulod iti uneg ti pito nga aldaw kalpasan ti pannakaawat iti dayta. Kumitatayo iti apagbiit idiay departamento ken ti panagandarna.
Ditoy dagiti liblibro ken polieto iti nasurok a sangagasut a nagduduma a pagsasao ket maurnongda. Binulan, agarup sangaribo a tonelada a literatura ti maipatulod iti isuamin a daga, manipud man idiay Furman Street wenno manipud iti asideg a pagimprentaan a mapan kadagiti pantalan a pakaipatulodanna. Agarup 2,000 a pedido a literatura iti linawas ti maipaay idiay Furman Street ket maipatulod iti nasurok nga 8,400 a kongregasion dagiti Saksi ni Jehova idiay Estados Unidos.
Ti moderno a conveyor system ti nagatang a tumulong a mangurnong, mangimpake, ken mangipatulod a sipapartak kadagiti literatura. Dayta ti imbangon dagiti Saksi ni Jehova. Daytoy a panangibangon innalana ti ngangngani uppat a bulan ket nakompleto idi nasapa a paset iti Oktubre 1985. Adda ngangngani tallo a kakapat iti maysa a milia (1 km) nga aparato ti conveyor a ramanenna ti 54 a motor a mangpapaandar kadagiti nadumaduma a belts ken kable ken 30 a photoelectric a matmata a mangtengngel iti panagayus ti literatura.
Ti panagandar iti panagipatulod addaan iti uppat a paset. Ti umuna a paset, ti opisina ti pagipatulodan, isu ti pakaawatan dagiti pedido ket maisaganada. Mausar ti maysa a kompiuter a mangisagana iti invoice ken ti listaan dagiti literatura a maurnong a maipaay iti tunggal pedido. Ti maikadua a paset isu ti sistema ti panangurnong a mangipaay kadagiti pedido a literatura. Ti maikatlo a paset isu ti lugar a pagimpakean a sadiay dagiti literatura ti masukimat ken sisasayaat a maimpake kadagiti karton. Ti maikapat isu ti estasion a pakarukodan iti seliona, a sadiay tunggal karton ti matimbang ken maikabil ti umiso a seliona. Dagitoy a karton ngarud ti maipanen kadagiti paradaan ti trak tapno maipatulod.
Ti patakder iti 360 Furman Street, nupay kasta, ti ayan saan laeng a ti Shipping Department. Dayta addaan pay kadagiti adu a dadduma a departamento.
[Ladawan iti panid 16]
[Ladawan iti panid 17]
[Dagiti ladawan iti panid 18]
Dadduma Pay nga Ar-aramid Idiay Patakder ti Furman Street
Iti daytoy a dakkel a Carpenter Shop, a saklawenna iti 56,000 kuadrada pie a daplat, maaramid dagiti muebles a maipaay kadagiti adu nga opisina ken maipaay kadagiti kukuarto dagiti kamkameng iti hedkuarter
Ti Braille Department mangpataud kadagiti nasurok a 48 a publikasion, agraman dagiti intero a ruar iti “Pagwanawanan” a maipaay kadagiti nasurok a 600 a suskritor. Dagiti bambanag a naisurat iti Braille ti maipakoreo a mapan kadagiti nasurok a 35 a pagpagilian
Agingga iti 35,000 libra a tubtubo ken dagiti mairaman iti dayta a pedaso a metal ti mapataud ditoy ken maibangon iti binulan kadagiti patpatakder iti Sosiedad idiay Brooklyn ken idiay Watchtower Farms
Kadagiti napalabas a tallo a tawtawen, ti Tape Duplicating Department nakapatauden iti nasurok nga 11 milion a cassette recordings iti Ingles, Español, Pranses, ken Portuguese
Dagiti aluminum a kaha ti tawa ken dagiti sarming a naikkan iti insulasion a thermopane mapatpataudda ditoy a maipaay kadagiti patpatakder iti Watchtower Society ket makaekonomia iti dakkel unay iti gastos. Ti gasto a maekonomia iti panagpapudot babaen kadagiti kabbaro a tawa ket dakkel ti maitulongna iti daytoy a proyekto iti saan a mabayag
Daytoy a shop ti mang-upholster kadagiti muebles a maipaay kadagiti adu a lobby ken opisina idiay hedkuarter dagiti Saksi ni Jehova. Daytoy mangaramid met kadagiti personal a trabaho a maipaay kadagiti 2,500 a miembro iti kameng ti hedkuarter
Ti trabaho nga spray-painting ti mangileppas kadagiti amin a muebles iti Sosiedad, dagiti bangko a mausar iti trabaho, pallets, ruruangan, ken dadduma pay.