Baro a Nainayon iti Pannakapalawa ti Panagimprenta
NAISAAD iti nagbaetan ti pagserkan dagiti rangtay iti Brooklyn ken Manhattan isu ti kangrunaan a pagimprentaan iti sangalubongan nga organisasion dagiti Saksi ni Jehova. Makitayo daytoy innem a patpatakder iti ladawan iti ngato ken iti kannawan. Maysa a 49 metros a rangtay ti mangisilpo kadagiti dua a kabbaro a nainayon, a masarakan iti 175 Pearl Street ken 160 Jay Street (Numero 1), nga addaan iti immuna nga uppat-siudad a bloke iti ballasiw dagiti kalkalsada (Numero 2).
Daytoy a 4.3 metros por 4.9 metros a mangisilpo a rangtay, 16 metros iti ngatuen iti kalkalsada, ti nakompleto idi kalgaw iti 1986. Daytat’ mangipaay iti pannakagteng iti maikanem a grado iti 175 Pearl Street manipud kadagiti grado a pagimprentaan.
Ti patakder ti Pearl Street, a dati a naibangon idi 1917 ken nanayonan idi 1947, ket nagatang dagiti Saksi ni Jehova idi Enero 7, 1983. Idi Hulio 1985 ti naudi kadagiti dati nga agnanaed immakardan. Ngem uray pay sakbay ti ipapanawda amin, ti maysa a grupo dagiti managbangon a Saksi rinugiandan a balbaliwan ti patakder.
Umuna, naikabil ti maysa a baro nga atep, ket naibangon iti 114,000 litros a tangke iti danum. Tapno mataming ti pannakaiyakar dagiti materiales iti uneg ti patakder, maysa a baro a 5,400 kilogramo ti maawitna nga elebeytor ti nainayon, ket nasukatan ti elebeytor a pagluganan dagiti pasahero. Kaaduan kadagiti grado ti patakder ti naparabawan iti baro nga epoxy. Dagiti daanen a makin-ruar a diding a saanen a makasabet kadagiti sapulen ti Building Code iti siudad ti nasukatan iti addaan insulasion a pader a ladrilio. Dagiti pasamano ti tawa nga aluminum ken ti addaan ti insulasion a thermopane a sarming ti naikabil. Ket napinturaan ti baro ti intero a patakder iti uneg ken iti ruar.
Kabayatanna, idi Disiembre 11, 1986, ti patakder idiay 160 Jay Street, a kabangibang ti 175 Pearl Street, ket nagatang met. Agarup kakatlo iti patakder, isu a naibangon idi 1928, ti mapagnanaedan pay laeng. Bayat ti iyaakar dagitoy, ti panagdalus ken ti panangbaliw iti daytoy a patakder maaramiden. Kamaudiananna, no mabalin, maaramidto ti dalan iti nagbaetan daytoy dua a patakder, ket, iti kasta, maisilpo ti 160 Jay Street kadagiti dadduma a lima a patakder a paktoria.
Dagiti dua a nabiit pay a nainayon iti paktoria (Numero 1), nga agarup agpada ti kadakkelda, ket mangipaay iti kanayonan a 33,000 metros kuadrado wenno ad-adu pay nga espasio. Dagiti dadduma nga uppat a patakder ket addaan iti agtitipon a kalawa a 61,500 metros kuadrado. Gapuna dagiti kabbaro a nainayon manginayonda iti agarup 55 porsiento nga ad-adu pay nga espasio—ti nakagupgopan a 94,900 metros kuadrado! Dayta ket nasurok a 9 hektaria!
Ngem ania ngay no uray pay dagitoy kabbaro a nainayon a pasilidad ket mapaneknekanto a di umdas a mangaywan iti kankanayon ti iyaaduna a panagkalikagum kadagiti ad-adu a literatura iti Biblia? Bueno, madlawyo iti ladawan iti panid 16 ti lugar a nanumeruan iti 3. Dayta a daga a nasurok a 5,600 metros kuadrado ti nagatangen dagiti Saksi ni Jehova. No kasapulan, daytoy a probision ti mausar a maipaay iti panangpalawa iti panagimprenta.
Naisaad idiay igid ti baybay iti Nueva York, dagiti pasilidad a pagimprentaan ket nasayaat ti pannakaisaadda a maipaay iti panagipatulod kadagiti literatura iti Biblia iti intero a lubong. Kas makitayo, dagitoy ti asideg met kadagiti opisina iti hedkuarters dagiti Saksi ni Jehova, isu a makita iti naipakuyog a ladawan. (Numero 4) Mainayon pay, dagiti patakder a pagnanaedan dagiti nasurok a 2,500 a boluntario a trabahador a kamkameng ti hedkuarters ti adda iti mapagpagna laeng a kaadayu iti opisina, paktoria ken dagiti patakder a pagipatulodan.—Kitaenyo ti Agriingkayo! nga Agosto 22, 1987, maipaay kadagiti ladawan ken deskripsion iti pasilidad ti panangipatulod.
Bayat iti napalabas a sumagmamano a bulbulan, adu nga alikamen ti paktoria ti naiyakar a naipan idiay patakder ti 175 Pearl Street. Daytoy ti nangipaay iti lugar iti pagimprentaan a maipaay a pagipempenan iti papel iti asideg dagiti makina a pagimprenta, isu a pakasapulan iti dayta. Kitaentayo ti dadduma kadagiti ar-aramid iti paktoria a naiyakar idiay 175 Pearl Street.
[Kahon/Dagiti ladawan iti panid 18]
Ar-aramid iti Pearl Street Building
Ti 49-metro-kaatiddogna, 159-metriko tonelada a rangtay ti mangipaay iti di masingsinga nga agsabet a pagnaan iti nabiit pay a nagun-odan a patpatakder. Ti rangtay addaan met kadagiti steam lines a mangpapudot iti patakder iti 175 Pearl Street, agraman ti linea ti impormasion ken komunikasion a maipaay nga agpadpada kadagiti patpatakder iti 175 Pearl Street ken 160 Jay Street.
Ti trabaho nga slitter/rewinder nangrugi idi 1980. Nanipud idin, pinulpullo a ribo a doliar ti maekonomia iti tinawen babaen ti panangaramidtayo iti panangtabas kadagiti material iti akkub ti libro a maipaay iti bindery.
Nanipud idi pannakairugi ti Departamento iti Panagaramid iti Karton idi Hunio 1982, nasuroken a maysa a milion a karton ti maar-aramid iti tinawen iti nasurok a sangagasut a nagduduma a kadakkel. Ti panangaramidtayo iti bukodtayo a karton mangipaay iti nasaysayaat a nagpintas ti kalidadna, naekonomia iti kuarta a karton, ken punnuanna a naimbag ti pakasapulan kadagiti karton.
Dagitoy a karton, a naaramid iti napuskol a cardboard, mausarda a pagaramid kadagiti akkub ti libro. Dagitoy ti tabasen ti naisangsangayan a makina iti umiso a kadakkelda. Ti promedio a 6.5 metriko tonelada a karton, a natabas iti lima a gagangay a kadakkel, ti maipaay iti bindery iti inaldaw.
Iti Machine Shop addada 19 lathes, 17 a milling machines, 6 a drill presses, ken 11 a grinders. Kasapulan ti panangusar kadagiti makina tapno agtultuloy ti panagandar ti pagimprenta ken ti alikamen ti bindery. Malaksid iti nagdakkelan a maekonomia no idilig iti panangipatrabaho iti dayta iti komersial a shop, ti shoptayo mangipaay pay iti naparpartak a serbisio a maipaay iti panagimprenta, opisina, ken kadagiti patakder a pagtaengan.