Panangaywan ti Saka a Maipaay kadagiti Ubbing

“MANGPAPAADUTAYO iti maysa a nasion dagiti pilay,” kinuna ti maysa a chiropodist a ni Adrian Grier iti ili ti Luton, Inglatera a buyogen ti panagdanag. Iti klinikana iti ospital, makitana dagiti ubbing nga innem laeng ti tawenna nga addaan kadagiti saksaka a di nasayaat ti panagdakkelna. Ti gapu: di nasayaat a pannakaisukat dagiti sapatos. Iti makatawen laeng, nasurok a 3,000 nga ubbing ti ineksamin ni Grier, 600 kadakuada ti addaan ti parparikut iti saka a gapu kadagiti saan nga umiso ti sukatna a sapatos. “No nasapsapa nga agusar dagiti ubbing kadagiti uso a sapatos, mabibiit met a mapasamak ti pannakadisporma ken dakdakes pay ti mapasamak,” kuna ni Grier iti Luton’s Herald. Ngem ti saan a nasayaat ti sukatna a sapatos saan laeng nga isu ti makagapu iti pannakadisporma ti saka. Madadael met dagiti saka dagiti maladaga no dagiti nagannak ti mangisuot kadakuada kadagiti pagturog nga adda aminen sadiay, ken dagiti medias a bassit unay ti mabalin met a makadadael, kuna ni Grier.

Ti panagbalin nga alerto kadagiti peggad ken ti panangala iti nainkalintegan a pamay-an iti panaggatang iti nasayaat ti pannakaaramidna a sapatos adu ti maitulongna a manglapped iti pannakadisporma, ti ingrown a kuko ti tangan, bunions, ken uray pay ti arthritis kadagiti kamaudianan a paset ti panagbiag. Isuhere ni Grier a dagiti sapatos para kadagiti ubbing ket 3/4 pulgada (2 cm) nga at-atiddog ngem iti saka ti ubing (tapno adda lugar ti panagdakkel) ket maaddaan iti nagbukel a tangan.

No maipapan met iti kawes, kasta met iti sapatos, daytoy a balakad a napaneknekanen a pudno babaen iti tiempo a naited kadagiti Kristiano a babbai ket makagunggona kadagiti amin: ‘Agkaweskayo a naemma ken nanakman.’​—1 Timoteo 2:9, Today’s English Version.