Apay a Mapasamak dagiti Dakes a Bambanag kadagiti Naimbag?
Iti sakaanan iti bulkan iti San Salvador idiay El Salvador naisaad ti ili iti San Ramón. Idi agsapa iti Setiembre 19, 1982, dayta ti linapunos iti tallo a dadakkel nga allon iti pitak. Babaen kadagiti napipigsa a tudtudo, ti damo nga allon ket ngangnganin dua a grado ti katayagna ket nagawit kadagiti batbato ken puon dagiti kaykayo. Babaen iti panangkurukorna iti abut a 50 metros ti kaunegna ken 75 metros ti kalawana, dayta ti nagayus a nagpababa iti sikigan ti bulkan, ket pimmegges pay ken dimmakkel bayat ti panagayusna. Iti pannakagtengna iti baba, dayta ti limmasat kadagiti ladrilio a balbalay iti madalananna.
Narbek ti balay ni Ana gapu kadagiti napegges nga allon iti maysa a nakaam-amak a kanito. Dagiti annakna a babbai kimpetda ken Ana, ket nagikkisda, “Ikararagandakami!” Kalpasanna ti pitak ti nanglapunosen kadakuada . . .
Naiparna, nupay kasta, maysa a pagatep a baldosa ti nagdisso iti mismo a sanguanan ni Ana, isu a nangipaay kenkuana iti lugar a makaanges. “Basta kankanayon laeng ti panangawagko iti tulong,” kunana. Agarup uppat nga oras kalpasanna, nangngeg dagiti kakaarruba dagiti ikkisna ket rinugiandan ti nangiyaon kenkuana. Isut’ nasarakan a nagaburan iti pitak agingga kadagiti kilikilina, a dagiti bagi dagiti annakna a babbai ti nakadekket kenkuana iti manglemmes a pitak.
DAGITI tattao iti San Ramón napakumbabada ken nainggayyeman. Nairaman kadagiti natay isu ti adu a dedikado a Kristiano, agraman ti kabbaro nga agassawa, da Miguel ken Cecilia, ken ti maysa a pamilia iti lima a nasarakan dagiti bagbagida a nagiinnarakup.
Ti kalamidad, nupay kasta, dina pagdumaen dagiti naimbag ken dakes a tattao, maysa a kinapudno a narigat nga itunos iti panamati iti maysa a naayat a Dios. ‘Ania a kita ti Dios,’ imtuodenda, ‘ti mangipalubos a mapasamak ti kasta nga awan ar-arnasna a pannakasayang iti biag? Wenno maipapan iti dayta, kasano a ti mannakabalin-amin a Dios buyaenna dagiti natataengan nga awan ti pagtaenganda, dagiti nagaget a pampamilia a makapukaw iti inurnongda a pagbiagda, dagiti agtutubo a lallaki ken babai nga adda pay laeng iti kabanuagan iti panagbiagda nga agsakit iti makapapatay a sakit—ket awan ti aramidenna?’
Ni Harold S. Kushner, maysa a mannursuro a Judio, inimtuodna dagita a salsaludsod idi naammuanna a ti anakna ket matayto iti mammano a kita a sakit. Ti makariro a kinaawan ti kinahustisia ti nangriribuk ken ni Kushner. “Maysaak idi a naimbag a tao,” linagipna. “Pinadasko ti agaramid iti naimbag iti imatang ti Dios. . . . Patiek a sursurotek ti daldalan ti Dios ken ar-aramidek ti aramidna. Kasano a mapasamak daytoy iti pamiliak?” Gapu iti panangsapsapulna kadagiti sungbat timmaud ti nalatak a librona a When Bad Things Happen to Good People.
Ni Kushner ket maysa laeng kadagiti adu a teologo a nangpadas a mangsungbat iti saludsod no apay a pinalubosan ti Dios ti kinadakes. Kaiyarigan dayta, inkabil ti Dios ti tao iti pannakasuot. Ania a pangngeddeng ti nagtengan ni Kushner ken dagiti dadduma a teologo? Ti kadi pangngeddengda isu ti nainkalintegan?
Ti kinapintas, panagdudumaduma, ken disenio iti panamarsua ti nangiturong kadagiti adu a mamati a masapul nga adda maysa nga intelihente a Namarsua. Kaskasdi, para kadagiti dadduma, ti kadadakkelan a pakaitibkolan iti panamatida iti Dios isu ti kaadda iti panagsagaba ken kinadakes iti lubong. No ti ‘Dios ayat,’ apay a pinalubosanna dagiti adu a dakes a bambanag a mapasamak kadagiti naimbag a tattao? Ket addada nainkalintegan a rason iti panangipalubos ti Dios iti dakes? Adda kadi rason iti panamati a ti dakes agpatingganto iti asidegen a masanguanan?