Ti Panangikagumaanko a Mangidian iti Naranggas a Panagbiag
BAYAT iti walo a tawtawen miembroak iti nalatak a klab ti motorsiklo. Kaaduan kadagitoy a grupo ti saan a nasayaat ti pannakilangenda kadagiti dadduma a klab iti motorsiklo, ket adda ti kankanayon a panagriribal. Maysa a rabii adu kadakami ti adda iti tengnga iti New Orleans a mangsapsapul iti karibal a klab nga adda iti ruar ti ili. Magagarankami a “mangdanog iti sumagmamano nga ul-ulo” tapno lintegen iti saanmi a pagkikinnaawatan.
Ti sabali a grupo saanen a masarakan, gapuna nagsisinakamin ket nagturongkamin iti nagsisina a dalan. Nupay kasta, dadduma ti nagtalinaed iti bar, a sadiay adda napasamak a pannakidinnanog kadagiti dua a nakapaisano a polis. Dagiti opisiales pimmaltogda ket sinugatanda ti maysa a gayyemko. Nakatugawak iti maysa a naulimek a bar iti sangakaarrubaan idi nangngegko no ania ti napasamak. Diak ammo no sibibiag ti gayyemko wenno natay, gapuna napanak iti ospital tapno ammuek. Idi nakagtengak sadiay, intudonak ti maysa a lalaki, nga agririaw, “Isut’ maysa kadakuada! Tiliwenyo!” Nupay no saanak a nairaman iti panagdadangadang, pagarupko a babaen iti atiddog a buok ken iming, agpapada ti langami kadakuada. Ket, tiniliwdak, ket nagtungpalak iti pagbaludan iti sumagmamano a lawas. Ngem kasano a nangrugiak iti kastoy a naranggas nga estilo iti panagbiag? Palubosandak a manglagip iti panagubingko.
Ayat iti Damo a Pannakakita
Kaaduan a nagannak ti maupay no dagiti annakda mairamanda iti daytoy a kita iti panagbiag, ket pudno daytoy ken nanang ken ni tatang. Naanusda ngem naistriktoda kaniak ket patienda ti disiplina.
Ti parikutko nangrugi idi naudi a tawen iti panagadalko iti high school idi rinugiak ti nagrebelda iti autoridad dagiti dadakkelko ken rinugiak ti naginum iti kasta unay. Maysa nga aldaw, idi nagtakderak iti makinsango a tukad iti high school, nakakitaak iti banag a nangipaay iti nauneg nga impresion kaniak iti umay nga adu a tawtawen. Limmabas ti puro a chrome ti kolorna, nakaranraniag ti pintana, a “Harley Chopper” a motorsiklo, a kasla simmippayut iti sanguanak. Ti nakasakay ket kasla awan ti panangikankanona iti lubong. Pagay-ayatko idin dagiti motorsiklo iti sadinoman!
Kamaudiananna iti dayta a tawen kalpasan iti panaggraduarko iti eskuelaan, inusarko ti nagbannogak iti kinaubingko a pundo ket gimmatangak iti 750 cc nga Ingles a motorsiklo. Iti dayta a kalgaw nagbiaheak a mangballasiw kadagiti Makintenga a laud nga estado, ket nagtungpalak idiay Iowa, isu a nagadalak iti kolehio.
Ti “Pamilia” iti Motorsiklo
Madama idi ti Gubat iti Vietnam, ket para kadagiti adu kadakami nga agtutubo, dayta ti nakarigrigat a tiempo iti panagbiagmi. Kagurak ti panangpanunot iti pannakigubat ken panangpapatay. Kaskasdi, no diak agtalinaed iti kolehio, daytanto ti papanak—a kapilitan. Inkeddengko ti agprotesta, agraman dagiti adu a dadduma a naupay nga agtutubo. Nakikaduaak iti grupo a mangbusor iti gubat, ngem saan nga organisado dagiti panaggigimongda. Kalpasan iti ababa a tiempo, nabigbigko a daytoy a grupo saanna a mabaliwan ti sistema ken mangiyeg iti nasaysayaat a kasasaad. Kalpasanna inusigko manen ti pannakikadua iti sabali a grupo ngem nasarakak a nairamanda iti dadduma nga ar-aramid iti kinaranggas. Daytoy kasla saan nga umiso kaniak—ti panangusar iti kinaranggas a mangprotesta iti kinaranggas.
Bayat ti kaaddak iti kolehio, nadlawko met ti kinamanaginsisingpet ti relhion. Kas maysa a Katoliko, naisuroak a dagidiay agaramid iti dakes agsagabada iti agnanayon iti impierno nga apuy no matayda. Para kaniak kasla sumagmamano laeng a tattao ti nakasansanto ti panagbiagda nga agtungpalto idiay langit. Dayta saan a nainkalintegan kaniak idi naammuak a ti iglesia nga interamente anamonganna ti pannakigubat ken mangpapatay kadagiti tattao. Gaput’ naupayak, saanakon a tumabtabuno kadagiti serbisio iti simbaan ket imbilangkon ti bagik a saanen a paset ti Iglesia Katolika. Iti panangsapulko iti ad-adda pay a pannakaawat, nangalaak iti kurso a pilosopia iti relihion. Ti mannursurok ket maysa nga ateista ket insuronakami a no kasano nga awan ti Santa Claus, kasta met awan ti Dios!
Dagiti laeng bambanag a nagtalinaed iti daytoy a tiempo isu ti nakaro a panagin-inumko ken ti panagluganko iti motorsiklo. Gaput’ pannakaupayko iti kaaduan a biag iti kolehio, immakarak idiay New Orleans, iti adayu nga Abagatan. Ditoy nakasabetak iti sabali a grupo dagiti dadduma a tattao a mangitantandudo met kadagiti bambanag a sursurotek. Adu kadakuada ti maup-upay met iti sosiedad. Insurodak kadagiti adu a bambanag a mainaig iti panangibangon iti motorsiklo; insapulandak iti trabaho ket tinarakendak no agsakitak. Daytoy a pannakaseknan ti nangawis kaniak iti grupoda.
Ti “pamiliami” dimmakkel tapno iramanna dagiti grupo manipud kadagiti siudad iti isuamin nga Estados Unidos. Iti kalgaw masarakandakami a nakalugan kadagiti motorsiklomi a bumallasiw iti intero a Makintengnga a laud, agingga iti amianan a kas iti Minnesota ken Wyoming, agingga iti laud a kas iti California, ken uray pay iti Mexico. Sarungkaranmi dagiti adu a parke ket tagiragsakenmi ti kinapintas ken ti kinatalna iti probinsia.
Ti wagas ti panagbiagmi iramanna ti panangbusbosmi iti adu a tiempo a panagin-inum kadagiti bar. Dadduma kadagiti lallaki tagiragsakenda ti makiap-apa, ngem saan kaniak. Nagbalinak a nalaing a mangsiput kadagiti kasasaad nga agturong iti panagaapa ket sidadayaw a pinadasko a liniklikan ida. Iti dadduma a tiempo, nupay kasta, dagiti tattao agaramidda kadagiti bambanag a diak kabaelan a tamingen, ket makiramanak tapno suruak ida ti leksion. Naminsan nakatakderak iti ruar iti bar idi adda limmabas a motorsiklo. Kitkitaek no sino dayta, idi a ti pasahero intutokna ti paltog kaniak ket pimmutok! No kasano a diak natamaan, diak ammo.
Dagiti Epekto iti Homicide
Nangrugin a nabigbigko nga awan ti pudno a kinaragsak iti kastoy a panangsapsapul iti naragsak a wagas iti panagbiag. Kabayatanna nagasawaak, ngem ti panagasawa saan a nagballigi; dayta nagpaut laeng iti tallo a bulan. Kamaudiananna, natakaw ti motorsiklok. Ket maysa a rabii, kalpasan ti kasta unay a panaginumko, nakisusikak iti kasta unay iti kasayaatan a gayyemko. Daytoy ti namagliday unay kaniak. Babaen ti panangpadasko a mangipatinggan iti isuamin, inalimonko ti sangapetpet a pildoras. Kalpasanna nagiddaak tapno matayen iti bangketa ti Karayan Mississippi. Nupay kasta, nariingak iti ospital. Iti dua pay a sabali nga okasion, nagtungpalak met iti ospital gapu iti parikutko a panagin-inum.
Kalpasanna dimtengen ti agsapa a diakto malipatan. Iti alas singko nakaawatak iti awag ti telepono a mangibagbaga kaniak a maysa kadagiti kasayaatan a gagayyemko ti napaltogan ket natay. Isut’ nakikuyog iti dua a miembro iti klab a napan nakiinum, ket pinadasna a pasardengen ti maysa a lalaki a mangmalmalo iti maysa a babai. Naammuan a dayta isu ti asawana. Pimmaltog ken pinatayna ti gayyemko. Nakigtotkami amin, ket binusbosko ti intero a sumaganad nga aldaw a kadua ti kabsatna a lalaki, a nangiyurnos iti pompon.
No agsolsoloak iti rabii iti puneraria, aprosak ti rupa ti gayyemko. Nalammiis, timmangken, ken awanan biag. Sadino ti napananna? Pudno aya a dayta—ti panungpalan ti isuamin? Sigurado a saan laeng a kastoy—agbiag iti sumagmamano laeng a tawen, ket kalpasanna ipatinggan amin ti ipapatay. Nabigbigko a diak naawatan iti biag a pulos, ket nanipud idin pinadasko a sinapul. Rinugiak ti nakinamin iti espiritismo, ket iti sumagmamano a daras kasla agparang a makasaritami ti gayyemko. Ngem dayta ket saan pay a nalawag ket kaskasdi a saanna a sinungbatan dagiti salsaludsodko.
Ania ti Panggep iti Biag?
Maysa a rabii nakainumak iti adu unay ket nakaturogak bayat a nakaluganak iti motorsiklok. Iti simmaruno nga aksidente, nakaro ti pannakasugat ti pingilko. Diak makapagna ket masapul ti panagtalinaedko iti pagtaengan iti dua a lawas. Bayat daytoy a tiempo, maysa a lalaki ken ti anakna ti kimmatok iti ruanganko. Kayatda ti makisarita maipapan iti Biblia. Inawisko ida a sumrek. Imbagada kaniak nga isuda dagiti Saksi ni Jehova. Gapu ta diak pay nangnangngeg dayta a nagan idi, inimtuodko no isuda ket maysa a baro a relihiuso a grupo. Ti lalaki siaasi nga impakitana manipud iti Biblia a ti nagan ti Dios ket Jehova ket makisarsaritada kadagiti tattao maipapan kenkuana. Dayta ket baro a banag kaniak. Ti Dios addaan iti nagan, Jehova. Ti relihiuso a pannakasanayko kas agtutubo dina insuro dayta. Nagpanunotak no ania pay ti saan a naisuro kaniak.
Sumaganad naipakita kaniak a ti Biblia saritaenna ti panungpalan iti lubong, wenno sistema dagiti bambanag, a pagbibiagantayo. Ti “panungpalan iti lubong”! Apay a saan a naibaga kaniak daytoy idi? Daytoy ti nangilukat iti dalan a maipaay kadagiti sumagmamano pay a panagsasarita a bayat dayta nagsaludsodak kadagiti nagadu a salsaludsod. Imbatida kaniak ti libro a Kastoy la ngatan ti Biag? Saan a napartak ti panangbasak iti dayta, ta kamaudiananna masarsarakak no ania ti kaipapanan iti biag.
Naammuak a saan a panggep ti Dios nga agbiagtayo iti nakaab-ababa a tiempo ket kalpasanna mataytayo. Naammuak ti umay a panagpatingga iti ipapatay ken ti inanama iti biag nga agnanayon iti maysa a paraiso a daga. No maipapan iti ingungotek a gayyem, naammuak nga isut’ saan a sipupuot wenno agsagsagaba iti sadinoman a lugar; imbes ketdi, nargaan ti turogna, nga agur-uray iti panagungar dagiti natay. Anian a naindaklan a namnama dayta! Nalabit isut’ makitakto manen!—Apocalipsis 21:4, 5; Eclesiastes 9:5; Juan 5:28, 29.
Maysa a Narigat a Pangngeddeng
Ti panagsasaritami maipapan iti Biblia, ket nasinga idi a pimmanawak a nakikuyog iti kadadakkelan a panagbiahe babaen ti motorsiklo a naiplano iti dayta a kalgaw. Imbagak iti Saksi a gayyemko, ni Daniel, nga isut’ awagakto no agsubliak. Intedna kaniak ti libro a Ti Kinapudno a Mangiturong iti Biag nga Awan Inggana. Bayat dagiti sumaganad nga uppat a lawlawas a panagbiahe, tunggal sumardengkami nga aginana mangbasaak iti paset iti libro. Idi nagsubliak, inawagak ni Daniel. Inyurnosmi ti agkadua nga agadal iti Biblia, ket kalpasan ti umuna a panagadal, inawisnak a tumabuno iti gimong idiay Kingdom Hall iti sumaganad a malem ti Domingo.
Itan, addaankami iti naiplano a panagbiahe ti klab iti dayta a Domingo, ket mainanama ti kaaddak sadiay a mangidaulo. Dimteng ti agsapa iti Domingo ket pimmanawkamin. Simmardengkami iti maysa a bar, ket tunggal maysa ti nangrugin nga uminum. Idi agarup ala una gagangay a rimmuarakon, pinaandarko ti motorko, ket nagawidakon iti siudad. Idi alas 3:00 t.m., addaakon idiay Kingdom Hall, a nakasuot iti T-shirt, asul a jeans, boots, kaim-iming, ken nakapungos ti buokko. Sibabara nga inawatnak ti Saksi, nga awan ti dinakdakamatna maipapan iti itsurak. Pinaregtadak nga agsubli. Inaramidko ti kasta, ket tumabtabunoakon kadagiti gimgimong nanipud idi.
Narigat ti kasasaad iti umuna a bulan, nupay kasta, agsipud ta tumabtabunoak pay laeng kadagiti linawas a gimong iti klab ti motorsiklo. Di nagbayag nakitakon a no itultuloyko ti makikadua iti klab, marigatanak a mangiyaplikar ken agbiag a maitunos kadagiti prinsipio iti Biblia. Gapuna inkeddengko ti agikkat iti klab. Narigat ti sumina kadagidiay a tattao. Bayat dagiti adu a tawtawen, napadasanmi dagiti adu a bambanag a nagkakadua, ket daytoy ti namagkaykaysa kadakami a nakasingsinged. Iti kasumbangirna, makabang-ar ti mangpanaw iti naranggas a lubong ken ti sumrek iti natalna a sangalubongan nga organisasion ni Jehova. Inlakok payen ti paltog nga adda a kanayon iti sibayko iti pagiddaan.
Dika Makiraman kadagiti Dakes nga Ar-aramid
Innem a bulan kalpasan ti panagadalko, nabautisaranak. Iti ababa a tiempo, babaen iti tulong ni Jehova, naparmekko ti panagin-inumko, ket ti kaaduan a kababalinko simmayaat. Itan tagtagiragsakekon ti sumarungkar kadagiti tattao iti pagtaenganda a kas ti isasarungkar ni Daniel kaniak idi iti pangrugian. Manipud iti Biblia, padpadasek nga ipakita kadagiti kaarrubak a ni Jehova a Dios addaan iti maysa a gobierno a mangiparit iti kinaranggas, a mangituray babaen iti kinahustisia, ken mangipaayto kadagiti amin kadagiti nalinteg a bambanag a saan a maipaay dagiti natauan a gobgobierno, ket din agbayag awanton dagiti nararanggas a tattao ditoy daga. Daytoy ti nangnangruna a nakaawis kaniak gapu kadagiti napalabas a kapkapadasak iti kinaranggas, gapuna ipagpaganetgetko dayta iti amin a kabaelak.—Apocalipsis 11:18.
Binendisionannak ni Jehova a Dios iti maysa a napasnek a Kristiano nga asawa ken dua a napipintas nga annak. Dakami nga uppat makapagtrabahokami a sangsangkamaysa iti panagsarungkar kadagiti ruruangan ken tumabuno kadagiti Nakristianuan a gimgimong ken kumbension. Naaddaanak iti pribilehio nga agserbi kas ministerial nga adipen iti kongregasion Kristiano. Kinapudnona, indiankon ti kinaranggas ket nakasarakak iti pudpudno a talna. Anian a maisuppadi dayta! Idi nagsubliakon idiay New Orleans, naammuak ti ipapatay ti dua kadagiti dati a gagayyemko. Nanipud iti kaaddak ditoy Louisiana, tallo pay ti napaltogan ken napapatay. No saan a gapu ken ni Jehova, sadino koma ti ayankon?
Kadagiti agtutubo, tarigagayak nga ibaga a nupay ti lubong kasla nakapimpintas ken nakaragragsak, dikay makiraman kadagiti dakes nga ar-aramid. Addaak idi iti lubong ket napadasak amin dayta. Dikay mapalpalabes ti aniaman. Ket kadakayo a mangsapsapul iti pannakirelasion ken ni Jehova ngem pagarupenyo a dikay maaramid dagiti nasken a panagbalbaliw, pangngaasiyo ta paliiwenyo dagiti makaparegta a sasao ni Jesus: “Iti Dios isuamin mabalin.” (Mateo 19:26)—Kas insalaysay ni David L. Wirges.
[Ladawan iti panid 20]
Kadagiti narangranggas pay nga al-aldaw ti panagbisekletak