Manipud Managbasatayo

Di Pay Naipasngay nga Annak Ti artikulo a “Mangrugi iti Aanakan ti Panagsuro” pinaragsaknak. (Enero 22, 1992) Maysaak a doktor ti medisina, ket nabiit pay a nasabetko ti agassawa a dimmawat iti balakadko maipapan iti panangiregreg. Iti panangitedko iti komentok, inramanko dagiti rason iti artikuloyo. Inkeddeng dagiti agassawa a maipasngay ti ubing. Yaman pay, mabalin nga agbiagen ti bassit a maladaga.

G. U., Ecuador

Dagiti Motorsiklo Binasak ti artikuloyo a “Dagiti Motorsiklo—Kasano Kapeggadda?” a buyogen ti panaginteres. (Abril 8, 1992) Sumsumrekakon iti maika-55 añosko iti negosio ti motorsiklo ket kankanayon nga interesadoak iti kinatalged dagiti motorsiklo. Masansan a no nairaman ti maysa a motorsiklo ken kotse iti aksidente, ti kotse ti makimbasol; iti adu a daras basta di makita dagiti tsuper ti motorsiklo. Itultuloyyo ti naimbag a trabahoyo a mangiyeg kadakami kadagita a makapainteres a tema.

M. H., Estados Unidos

Sipapasnek a sinurotkon dagiti amin a panagannad a dinakamatyo tapno natalged. Ngem daytoy dina matupagan ti kadadaksan a peggad iti kinatalged ti siklista: DAGITI SABALI A TSUPER! Dandani pinaatalannak ti maysa a tao a di pay pulos simmardeng sumagmamano a tawen ti napalabasen. Natnagak iti bisikletak ket, nupay adda mangsalaknib a kabalko, nakaro ti pannakadangranko. Kas asawa ken ama dagiti dua a napipintas nga ubbing, inkeddengko a nasaysayaat nga ilakokon ti bisikletak.

J. B., Estados Unidos

Pinadasmi ti mangipaay iti natimbeng a panangiladawan agpadpada kadagiti ragsak ken peggad iti panaglugan iti motorsiklo. Naparegta dagiti managbasa a “mangtingiting kadagitoy a pakaawisan ken talged” no pampanunotenda ti aglugan iti motorsiklo. Ditay ipato dagiti dadduma no maipapan iti pangngeddengtayo a mismo.—ED.

Ti Uniberso Kalkalpasmi kadagiti annakko a binasa dagiti artikulo maipapan iti “Panangibutaktak kadagiti Palimed ti Uniberso.” (Marso 22, 1992) Dagitoy nga artikulo impakitada no kasano a pudno a makakayaw ti naglawaan a panamarsua ni Jehova. Agyamanak iti naglawag ken simple a panangilawlawagyo kadagiti nadumaduma a kita dagiti nailangitan a bambanag. Tunggal tema a sinaklawyo ket nakalawlawag ti pannakaisalaysayna, nakaun-uneg, ken nakalalaing.

N. B., Italia

Kankanayon nga iwalwalinko daytoy nga isyu ti Agriingkayo! agsipud ta diak interesado dita a tema. Ita naiduman ti panangmatmatko. Impaawatyo ti nakarikrikut a tema para kaniak ket—kas ti kankanayon nga ar-aramidenyo—imparangyo dayta iti pamay-an a maawatan dagiti sabsabali. Diak kayat a maturpos ti artikulo apaman a narugiak a basaen!

S. J., Canada

Mananglinteg ti Lansa Gaput’ nakapuy ti salun-atko, diak kabaelan ti makiraman a direkta iti proyekto a panagbangon a maar-aramid idiay sanga ti Watch Tower Society idiay Selters/Taunus, Alemania. Ngem ti artikulo maipapan ken Adams Akuetteh, a naawagan “ti mananglinteg ti lansa iti sanga idiay Ghana” (Mayo 22, 1992), pinagsangitnak!

T. R., Alemania