Panangmatmat iti Lubong
Panangpaay ti Iglesia
“Iti tiempo a dagiti koma Obispotayo ken dagiti papangulo ti Iglesia masapul a mangiwanwanda kadatayo maipapan iti seksual a moralidad, pinaaydatayo iti kasta unay,” insennaay ni Peter Thomson, vicario iti Cobham, Inglatera. Kasano? Sigun iti maysa a report iti North Kent Weekly News, ni Thomson inlawlawagna: “Masdaawak iti kasta unay nga adda maysa nga espesialista iti Londres a mangtamtaming iti agarup 20 a klero nga agsagsagaba iti AIDS ket ti Childwatch ti mangim-imbestigar kadagiti lima a makuna a kaso iti seksual a panangabuso ti klero kadagiti ubbing.” Inyebkasna met ti panagleddaangna maipapan iti pannakaiduma ti kunaen ti Biblia ken ti maisursuro itatta. Kas sungbat, “maysa a pannakangiwat iti Rochester Diocese ti nagkuna a ti Iglesia iti Inglatera addaanda kadagiti adu a papadi nga addaan iti nagduduma a panangmatmat,” impadamag ti pagiwarnak.
Nasaysayaat a Papel
Tinawen 12 milion a tonelada a papel ti magun-odan manipud iti bagasi ti kayo ti mausar a maipaay iti panangpataud iti pagiwarnakan idiay Estados Unidos. Agsipud ta mammanon ti pannakagun-od ti suplay a kayo, naiturong ti atension iti kenaf, maysa a mula a naammuan idi nabayagen a tiempo nga agtayag iti nasurok a 5 metros iti uneg laeng iti tallo a bulan. Sigun iti inaldaw a pagiwarnak a Pranses a Le Figaro, ti papel a magun-odan manipud iti linabag iti kenaf ket “nalaglagda, nalamlamuyot, ken napudpudaw” ngem ti papel a magun-odan manipud iti bagasi ti kayo, ken “agpaut.” Kasta met, “saan a umamarilio.” Kas maysa pay a pagimbaganna, ti kenaf mabalin a mangipaay iti maminsiam a daras nga ad-adu a bagasi iti tunggal 0.4 hektaria ngem ti kabakiran a saleng. Nupay adda dagitoy a pagimbagan, napattapatta nga iti 1988 ti linabag ti kenaf iparangarangnanto laeng ti “1 porsiento iti paglakuan iti pagiwarnak.”
Parikut dagiti Bogus a Piesa
Apay a marbek dagiti eroplano ken dagiti helicopter? Ti kumarkaro a pakaseknan isu ti panangsuspetsa a ti adu nga aksidente ti mabalin a gapu iti pannakausar iti bogus ken nakapuy a piesa iti panangtaginayon iti eroplano. Dagiti babassit, eroplano iti rehion a mangsango iti nakaro a kompetision ken mangusar kadagiti daanen nga eroplano a dagiti suplay ti piesana ti bassiten ti ad-adda a maapektaran. Agsipud ta ti saan a tumaytayab nga erolpano mabalin a paggastuan ti maysa a kompania ti eroplano iti $50,000 iti inaldaw iti napukaw a sapul, dagiti agsolsolo a managlako a mangitukon iti nalaklaka a presio ken naparpartak a panangitulod ti sapulenda no dadduma. “Kas banagna, dagiti eroplano no dadduma agtungpalda kadagiti bogus a piesa a magatang a dida ipagpagarup kadagiti nakusit nga aglako,” kuna ti magasin a Fortune. Dagiti piesa, a nakasigsigo a nakopia ta narigat a madlaw, ti mabalin a naaramid iti nakapkapuy a material wenno addaanda kadagiti depekto ket saanda a maandoran ti panangsubok. Ti laeng makina ti maysa a jet addaan iti 3,600 a piesa.
Nangina nga Addang!
Managusiuso—umadayokayo! Maysa nga enheniero a napan iti maysa a subasta gapu laeng iti panagusiuso ti kaskasdi a mangpampanunot pay laeng iti dayta a rekomendasion. Ti inaldaw a pagiwarnak a Pranses a Le Monde impadamagna a “bayat ti subasta, ti enheniero ti aksidente a nanggaraw iti takiagna, maysa a tignay nga impapan ti subastador a kas ti panangtawarna iti kangatuan a presio.” Ti enheniero ti kellaat a nakasarak iti bagina a makinkukua iti sangapulo a balbalay iti Ingles nga agturay isu a nakaobligaranna nga agbayad iti $3,000,000! Kinuna ti pagiwarnak a ti panangikagumaanna a mangkanselar iti pananggatang ket awan ti mamaayna.
Kasano ti Kinaumisoyo?
Maysa a relo a makuna nga umabante wenno maudi laeng iti maysa a segundo iti uneg ti 30 milion a tawtawen ti pinataud ti maysa a grupo dagiti pisiko idiay University of Western Australia. Sigun iti pagiwarnak a The West Australian, ti relo addaan iti sentro a “purpuro a sapiro a kristal” ket napataud dayta iti uneg ti tallo a tawen. Dayta ti nadisenio nga agpaay nga umiso a pagorasan iti ababa a tiempo. Nupay kasta, dayta ket maysa laeng nga addang nga agturong iti kalat ti grupo a mangibangon iti umiso unay a relo iti lubong—maysa a maysanto laeng a segundo ti pannakaudina iti sangapulo bilion a tawtawen!
Napeggad a Panangusar iti Telepono
Nupay no ti telepono ti kotse ket makita a kas ti kamaudianan a pamay-an iti napartak a komunikasion, maysa a dibision iti Automobile Association of America ti namakdaar kadagiti posible a peggad. Namakdaar a “no mangusar iti cellular phone bayat ti panagmaneho, bigbigenyo a mabalin a pagpeggadenyo ti bagiyo met laeng, dagiti pasaherosyo ken dagiti dadduma a motorista,” sigun iti maysa a report iti The Toronto Star. Dagiti naririkut nga alikamenna, ti di nasayaat a puestona, ken ti panagmaneho babaen iti maysa laeng nga ima ti nailista a kas dagiti kangrunaan a peggad kadagiti managusar. Nasurok a 100,000 a cellular car phones ti maus-usar idiay Canada, ket adda napattapatta a 200,000 a managusar ti naipadto inton agngudo ti 1991. Nupay dagiti nangangato ti ranggoda nga opisial ti polis irekomendarda ti panangusar kadagiti telepono iti kotse, aw-awaganda dagiti managusar nga umawagda laeng “no natalged ti panangaramid iti kasta.”
Nuklear nga Aksidente iti Brazil
Ti kasla nakapatpateg a nasarakan dagiti dua a lallaki nga agkolkolekta kadagiti daanen a metal ken papel idiay Goiânia, Brazil, ti nagbanag iti serioso a nuklear nga aksidente, kuna ti magasin a Veja. Iti maysa a nabaybay-anen a patakder, dagiti dua nakasarakda iti maysa a daanen a makina ti radiotherapy, isu nga inlakoda iti managgatang ti scrap a metal a ni Devair Alves Ferreira. Iti uneg nasarakan ti maysa a bassit a kapsula a naisangsangayan ti silengna. Kamaudiananna, ti kapsula a mismo nalukatan, a nangiruar iti maysa a bato a nalaka a marmay. Ti saanda nga ammo ket dayta ti radioactive cesium 137. “Dayta nangiruar iti asul a silnag iti kasipngetan. Napintas,” kuna ni Devair. Gaput’ maragsakanda, impakita dagiti lallaki dayta kadagiti pamiliada ken gagayyemda, a kamaudiananna nangmulit kadagiti agarup 244 a tattao, nga agarup 20 ti serioso. Ti asawa ni Devair ken ti innem-tawenna a kaanakanna ti immuna a dua a biktima a natay kas resultana. Gapu iti bilang dagiti naapektaran a tattao, ti aksidente ti naibilang a maikadua a kaseriosuan a nuklear nga aksidente, kalpasan ti Chernobyl.
Panangbang-ar iti Migraines
Ti maysa a lagis nga acrylic a siuumiso a naikabit iti ngipen iti makimbaba a panga ti mabalin a mangikkat iti nakaro a migraine a sakit ti ulo, kuna ti The Medical Post iti Canada. Ti lagis ti makuna a mangkorehir iti di nasayaat a panaglilinea dagiti ngipen, isu a “maipagarup a manggargari iti migraines babaen ti panangpataud iti panagkebbet ken panagsakit dagiti piskel a temporalis,” kuna ti Post. Ni Dr. Phillip Lamey iti Glasgow Dental Hospital inagasannan dagiti 19 a pasiente a nakabalballigi. Nupay no saan nga amin dagiti agsagaba iti migraines ti maagasan iti kastoy a pamay-an, inlawlawag ni Dr. Lamey a dagidiay nga addaan iti “ngipen a manggargari iti sakit ti ulo” mabalin a mabang-aranen. Dagiti tattao nga addaan iti kasta a gagangay a sintomas iti migraines a kas ti nakaro a sakit ti ulo a mapakuyogan iti panagulaw ken ti panagbakuar ti mabalin a magunggonaan manipud iti kasta a panangagas. Dagita a sintomas ti gagangay a mapasamak apaman a makariing ti tao wenno di agbayag kalpasan ti panagriingna.
Irigasion iti Desierto
Ti radar a maawit iti espasio nailasinnan dagiti nagsaadan iti karayan ti kadaanan nga Egipto a nagaburanen kadagiti tambak ti darat iti Desierto ti Sahara. Dadduma kadagitoy a pagayusan iti danum ti kas iti kalawa iti karayan Nilo a mismo, kuna ti maysa a report iti The Times iti Londres. Pito a bubon ti naeksperimento a nasunda idiay Selima Sand Sheet, a paset ti ngangngani saanen a mapagnanaedan a desierto iti asideg ti beddeng ti Sudan, ti makuna a nakapataud iti nabaknang a suplay iti danum. Kas banagna, ti nadam-eg idi a daga a nangsaknap iti lugar a 121,500 hektaria, a sadiay ti eksperimental a talon ket nagsayaatan ti kasasaadna, ti matalonton ken mapagnaedan manen.
Agdama a Pagay-ayatan
Dagiti kriminal a gakat a manggun-od iti koriente ti mangkuskusit iti kamkameng ti koriente ti Britania iti napattapatta a £50 milion iti tinawen, kuna ti The Sunday Times iti Londres. Dagiti saan a legal a koneksion nakasaksaknap ta makuna a busbosenda ti 5 porsiento a ganansia ti kompania iti koriente. Ngem dagiti mannanakaw a makisingit kadagiti linea ti koriente tapno agtakaw iti koriente ti mangal-ala iti dakkel a risgo. Maysa a kompania ti koriente ti namakdaar iti maysa a komersial iti TV a ti “panagtakaw iti koriente madusa iti ipapatay.” Ti panagtakaw iti koriente, nupay kasta, saan laeng a limitado kadagiti indibidual. Iti maysa a kaso, ti suplay ti koriente iti lokal nga estasion ti tren ti makuna a nasingitan tapno ipaayanna ti koriente ti intero a paraangan ti pagpabuyaan. Sino ti agbayad iti gasto? “Dagiti 18m[ilion] a managusar ti koriente iti Britania,” kuna ti Times.