Manipud Managbasatayo

Pannakibagay kadagiti Dadduma

Pagyamanan iti artikuloyo nga “Agimtuod dagiti Agtutubo . . . Apay a Nakarigrigat ti Makibagay kadagiti Kakabsatko?” (Hulio 22, 1987) Maysaak a 16 años, ket masansan a makiringgorak kadagiti kakabsatko a babbai. Sumagmamano laeng nga aldaw a napalabas nakiapaak iti maysa kadakuada, ket mariknak a kayatko a danogen. Pudno nga induronko ngem nateppelak ti bagik. Ammok a dagiti Kristiano rebbeng a saanda nga agaapa a kas kadakami. Ti artikuloyo ti nangtulong kaniak a makakita no kasano a tenglen ti kasasaad ken mangtaginayon iti talna iti pamilia. Ikagumaak nga aramiden ti amin a kabaelak a mangiyaplikar iti singasing ken tumulong iti panagkaykaysa ti pamilia.

R. A. G., Brazil

Atap a Biag iti Africa

Naan-anay a tinagiragsakko dagiti artikuloyo maipapan iti Atap a biag iti Africa. (Setiembre 22, 1987) Dagiti artikulo pinagkatawanak, ken kasta met no dadduma maladingitanak iti nakaro a panangpapatay kadagitoy a nadumaduma nga an-animal a maipaay iti komersio. Pagyamanan kadagitoy a makalawlawag a kinapudno maipapan iti mapaspasamak kadagiti an-animal.

S. R., Virgin Islands

Hielo Maipaay iti Sakit ti Ulo

Basbasaek ti Setiembre 22, 1987, a ruar ket simmakit ti ulok kalpasan ti panangbasak ti “Panangmatmat iti Lubong.” Inukagko ti panid 31. Kumarkaro ti sakit ti ulok, ngem adda ti artikulo a “No Agsakit ti Uloyo” a mangibagbaga maipapan iti no kasano a ti narumek a hielo makatulong iti sakit ti ulo. Gapuna bimmabaak ket nangalaak ti hielo. Daytoy ti maysa a pamay-an ti panangtulong ti Agriingkayo! kaniak, ken adda ad-adu pay. Maysaak a siam ti tawenna. Itultuloyyo ti nasayaat a trabahoyo.

M. M., United States

Panagsao iti Dildila

Nakaawatak kadagiti kopia iti artikuloyo a sadiay di umiso ti pannakaadawko. (Abril 8, 1987, “Panagsao kadagiti Dildila​—Naggapu Aya iti Dios?”) Di umiso ti pannakaawatyo kadagiti sasaok a pinagparangyo a nabainanak babaen iti panagsaok kadagiti dildila, idinto a saan a kastoy ti kaso. Kinapudnona ad-adawek ni C. S. Lewis, isu a nagkuna a nakababain ti panagsao kadagiti dildila. Kalpasanna intuloyko nga imbaga ti nabileg a kinapateg iti panagsao iti dildila historia ti iglesia, isut’ gapuna a dayta saan a rumbeng a pakaibabainan ti iglesia. . . . Daytoy a di umiso a panangadaw ti pudno a mamagbalin a kasla busorek ti panagsao kadagiti dildila isu a saan a pudno.

Vinson Synan, United States

Ladingitenmi ti panagbiddutmi nga impabiangmi ken Vinson Synan ti sasao ni C. S. Lewis a, “Ti panagsao kadagiti dildila ket maysa a pakaibabainantayo.” Nupay kasta, umiso ti panangadawmi ti sasao ni Dr. Synan a nagparang iti publikasion “One in Christ”: “Nupay no nakababain, ti glossolallia [panagsao kadagiti dildila] ket maysa a sagut a pinili ti Dios kadagiti umiso a tiempo iti historia tapno palawaen ken pabaruen ti Iglesia.” Saanmi nga inadaw ni Dr. Synan tapno ipamatmat nga isut’ bumusor iti panagsao kadagiti dildila no di ket tapno ipakita nga isu bigbigenna a ti panagsao kadagiti dildila ket maysa a parikut kadagiti dadduma a napasnek a managdaydayaw itatta. Iti dayta nga artikulo ni Dr. Synan impamatmatna a posible a maysa a parikut dayta kadagiti dadduma: “Umanamongak ken ni Larry Christenson a nagkuna . . . ‘Ti Dios kas agturay pinilina nga usaren ti sagut iti dildila a kas mangtignay iti panagbalbaliw . . . .mabalin a saan a nainkalintegan kadatayo . . . ngem kumatok dayta iti sadinoman a pilienna . . . ’” Inanamaenmi a daytoy ti manglawlawag iti sasaaden ni Dr. Synan maipapan iti panagsao kadagiti dildila, isu a naiduma iti panangmatmatmi.​—ED