Manipud Managbasatayo
Kasano a Nangrugi ti Biag Ditoy Daga?
Basta kayatko laeng ti agyaman kadakayo iti nagsayaatan nga artikulo a “Kasano a Nangrugi ti Biag Ditoy Daga?” (Enero 22, 1987) Daytat’ nakalawlawag, ababa, ken simple. Kalpasan ti panangbasak iti artikulo, awanen a pulos ti panagduaduak—ti ebolusion ket saan a kinapudno. Ti artikulo sinungbatanna dagiti napapateg a salsaludsod, kas iti: Kasano ti pannakagtengtayo ditoy? Adda kadi pateg ti biagtayo? Pagyamanan iti kasta unay iti panangipablaakyo kadagiti artikulo a mangtulong kadakami nga agtutubo a mangliklik iti pannakaallukoy iti lubong ken kadagiti pammatina.
E. A., France
Naisangsangayan a Kinasirib Para iti Edadna
Naparegtaak a naimbag babaen iti artikulo a “Naisangsangayan a Kinasirib Para iti Edadna.” (Oktubre 22, 1987) Nupay no kaedadko laeng ni Lisa, bayat ti panangbasak iti artikulo pampanunotek no maiyebkasko ti pammatik kas iti nagsayaatan a panangiyebkasna iti pammatina. Mariknak a tunggal sao a sinaritana impakitana ti makaringbaw a panagtalek ken ni Jehova. Tarigagayak a tuladen ti pammati dayta nga ubing. Inanamaek ti panagungarnanto.
M. S., Japan
Mariknak a masapul ti panangalak iti plumak ket agsuratak kadakayo. Maysaak a 14 años, ket kankanayonak nga agreklamo. Maysa nga aldaw nabasak ti artikulo maipapan ken ni Lisa. Iti intero nga artikulo, pulos a diak nakasarak ti sao ti panagreklamo. Kadagiti amin nga agtutubo a kas kaniak a kanayon nga agreklamo, kayatko nga ibaga a ni Jehova ti kanayon a mangipaay iti amin a pudno a kasapulantayo, ket masapul nga agyamantayo kenkuana. Addaanak iti parparikut iti salun-at, ket mabalin a mapukawko ti panagkitak ngem saanko a mapukaw ti biagko. Kunaentayo ‘bravo!’ ken ni Lisa maipaay iti nagsayaatan nga ulidan iti kinatarnaw nga imbatina kadatayo amin!
C. F., France
Agsuratak kadakayo tapno ibagak kadakayo a natignayak idi nabasak ti estoria ni Lisa. Basta diak mamedmedan ti luak. Pagarupek nga adu a tattao, agraman kaniak, ti naupay idi masapul a sanguenda ti pakarigatan, ngem manipud itan ken agtultuloy kanayonto a laglagipek ti determinasion nga impakita ni Lisa iti sango dagiti dadakkel a rigat.
V. L., Italy
Maipapan kadagiti An-animal
Daytoy ket maysa a nota ti panagyaman a maipaay iti makapainteres ken makatignay rikna nga artikulo dagiti animal! Napagbasada ti 13-añosko nga agbasa kadagiti magasin no awan ni Nanangna. Dagiti nagraranga a ladladawanna ken dagiti makaay-ayo a kinapudno ti tumultulong kadagiti annakko ken ti di mamati nga asawak a makakita iti dadduma kadagiti di makita a kualidad ni Jehova. Pangngaasiyo ta mangikabilkayo iti uray maysa laeng nga artikulo maipapan kadagiti animal iti tunggal bilang tapno agtultuloy ti panangukagda ken panangbasada!
P. M., United States
Inapresiarko iti kasta unay ti impormasion a naipablaak maipapan iti biag dagiti animal idiay Africa. (Setiembre 22, 1987) Naammuak dagiti adu a detalye a mangipakita no kasano a ni Jehova ti kadadakkelan kadagiti amin a diseniador. Pampanunotek no kasano a nagsayaat no dagiti naganna, imbes a basta mangipakita kadagiti annakda iti ladawladawan dagiti animal, tulonganda ida a mangammo kadagiti karakter dagitoy nga an-animal tapno rumang-ayda iti ayat ken panangapresiar iti Namarsuatayo.
S. C., Brazil