Sangalubongan a Panagbaliw iti Panagsigarilio
Nupay umad-adu ti bilang dagiti Europeo ken Americano a mangsulsul-oy iti maudi a sigarilioda, ti umad-adu a grupo dagiti agtataeng iti Maikatlo a Lubong ti mangisuksuko metten ti bassit a masapsapulanda tapno maramananda ti umuna a sigarilioda. Aniat’ makagapu iti daytoy sangalubongan a panagbalbaliw ti panagsigarilio?
Dagiti kampania ti impormasion iti Makinlaud a lubong a mangibutbutaktak kadagiti makadangran nga epekto ti panagsigarilio ti nangbalbaliwen iti kababalin dagiti tattao iti panangusar iti tabako. Kas resultana, ti nabiit pay a panagsirarak nga indaulo ti American Cancer Society ken dadduma pay nga organisasion ti salun-at ipakitada nga iti nasurok a 20 a tawen ti bilang dagiti mannigarilio idiay Estados Unidos ket agtultuloy a nagpababa.
Maisupadi iti dayta, ti panagsigarilio kadagiti pagilian iti Maikatlo a Lubong ket agsaksaknap kas maysa nga uram. Ti rason? Sigun iti WHO (World Health Organization), ti kangrunaan a makagapu isut’ agresibo a kampania ti panagipablaak nga idadaulo dagiti “awan prinsipiona nga industria iti tabako.“ Dagitoy nga ahensia ti mangikabkabil kadagiti pangabbong iti asuk tapno ilingedda ti kinapudno nga, iti sangalubongan, sangamilion a tattao ti matmatay iti kada tawen gapu kadagiti saksakit a nainaig iti panagsigarilio. Ti magasin nga Olandes nga Internationale Samenwerking (Internasional a Panagtutunos) kunana a ti industria ti tabako ket nangbusbosen ti dua ket kagudua a billion a doliar iti panagipablaak idi laeng 1984—ngangngani pito a milion a doliar iti inaldaw! Dagiti pablaak kas ti “‘Varsity’: For That Fine Clear Head Feeling” wenno “‘Cold Leaf’: Very Important Cigarettes for Very Important People” ti mangkumbinsir kadagiti tattao kadagiti rumangrang-ay a pagilian a ti panagsigarilio ket mainaig iti idudur-as, wayawaya, ken kinalalaki ken “isimbolona ti kinabaknang.”
Mainayon pay, dagiti tar ken nikotina a linaon dagiti sigarilio a mailaklako iti Maikatlo a Lubong ti naigagara a nangatngato ti rukodna ngem dagiti mailaklako iti Makinlaud a dagdaga, kuna ti libro a Roken welbeschouwd (Smoking—All Things Considered). Apay? Iti daytoy a pamay-an, nalaklaka a masiluan dagiti tattao tapno inton in-inoten nga ipababa dagiti kompania ti tabako ti rukod ti tar ken nikotina, dagiti managsigarilio mapilitanda a gumatang ti ad-adu a sigarilio tapno mapennek ti panagtarigagayda iti nikotina. Ti resulta? Isu ti agpangato a paglakuan iti sigarilio. Ti tinawen a tabako kadagidiay a pagilian ket ngimmato iti 2.1 porsiento. Kaskasdi, ti sungbat dagiti gobierno iti Maikatlo a Lubong ket ‘nakalamlamiis.’ Apay? Agpaay kadagiti adu a gobierno, ti produksion iti tabako ket dakkel a panguartaan.