Manipud Managbasatayo

Kinaawan ti Pagtaengan

Nasdaawak a dagiti artikulo maipapan iti kinaawan ti pagtaengan (Marso 8, 1988) saanda nga ipaganetget ti nangnangruna a makagapu​—ti sobra a populasion ti lubong wenno ti di pannakabael ti tao a mangtengngel ti kapartak ti panagpaaduna met laeng. Kas kadagiti amin a dadduma a kaso, ti tao ti mangiyeg iti rigat iti bagina met laeng babaen ti panangkontrana kadagiti pagayatan ti Dios a maipaay kadagiti annakna iti dadduma a pamay-an.

J. A., Japan

Pudno a ti sobra a populasion ket maysa a kangrunaan a makagapu iti kinaawan ti pagtaengan. Nupay kasta, dagiti awan pagtaenganna masarakanda met kadagiti paspaset iti lubong a sadiay ti sobra a populasion ket saan a maysa a dakkel unay a parikut; gapuna inkagumaanmi nga imparang dagiti makagapu iti natimbeng a pamay-an. Ti sobra a populasion ti lubong ket maysa a tema nga addaan ti bukod a kalintegan ket naisalaysay dayta iti bilangmi nga Enero 8, 1984.​—ED.

Iti maysa kadagiti klasek, mangar-aramidkami kadagiti report maipapan kadagiti parparikut iti lubong itatta. Pinilik ti mangaramid iti reportko maipapan iti kinaawan ti pagtaengan. Manipud kadagiti amin a magasin nga inusarko kas reperensia, ti Marso 8 nga Agriingkayo! ti nangipaay kaniak iti kaaduan ken kasayaatan nga impormasion. Dayta laeng ti kakaisuna nga addaan ti pudpudno a solusion.

S. C., Estados Unidos

Panangliklik iti Panangrames

Idi napalabas a Disiembre, naatakeak. Maysa a lalaki ti nangtengngel kaniak manipud iti likudan. Nalagipko a ti magasin (Disiembre 8, 1980) ti nangbalakad kadagiti babbai nga agriawda kadagita a kasasaad. Agsipud ta ti imana ket nakaapput iti ngiwatko, pinadasko a kinagat dayta tapno makapagriawak, ngem imposible dayta. Kankanayon ti panangibagana kaniak a papatayennak no diak agtalna. Ngem agduaduaak no ania ti aramidek. Nabaelak nga innganga ti ngiwatko ket nasarakak nga adda ti paladna iti nagbaetan dagiti ngipenko. Kinagatko iti isuamin a pigsak, ket pinalukayanna ti panangiggemna kaniak. Kinagatko manen, ket inyadayok ti imana kaniak babaen kadagiti kukok, nagriawak iti nakapigpigsa unay a kabaelak. Ipangpangtanak, dinanognak iti napigsa iti ngiwatko ket kalpasanna timmarayen. Anian ti panagyamanko! Pulos a diakto palpalabesen ti maysa nga artikulo dagitoy a nagsayaatan a magasin.

D. P., Italia

Masapul nga agyamanak kadakayo maipaay iti paset iti “Panangmatmat iti Lubong” a “Kasayaatan nga Igam: Panagriaw” a nangipaay iti balakad maipapan iti panangliklik iti panangrames. (Enero 22, 1981) Bayat a magmagnaak iti maysa a bario nga agturong iti sabali di pay nabayag, maysa a lalaki ti nangsaruno kaniak ket nangaramid iti naranggas a panangikagumaan a mangrames kaniak. Nagriawak ken nagpukkaw a maipaay iti tulong. Dua a lallaki ti rimmuar manipud iti karuotan a nangalaw kaniak, ket timmaray ti mangrames. Agyamanak manen.

E. A. A., Nigeria

Panangdayaw kadagiti Nagannak

Maysaak a 17 años ket kalkalpasko pay laeng a nangbasa iti “Agimtuod dagiti Agtutubo . . . ” maipapan iti panangdayaw kadagiti nagannak iti Abril 8 ken 22, 1988, a bilang ti Agriingkayo! Dagitoy nga artikulo ti nangnangruna a maipaay kaniak. Babaen iti panangsurot iti balakad a saan a ‘panangsagat iti brilliante tapno sapulen ti rugit,’ nagtugawak ket insuratko iti maysa a papel dagiti punto a pagsayaatan dagiti dadakkelko. Adda nakaad-adu.

Dagiti artikulo ti nangtulong kaniak a makaawat no kasano koma ti panangapresiarko nga addaanak kadagiti dua nga ingungotek a nagannak a, nupay addaanda kadagiti pagbiddutan, inturongdak iti kasayaatan a wagas iti panagbiag. Nabigbigko a masansan a narigatak a pakibagayan, ngem saanda a maikari iti daytoy. Kankanayon a basbasaek daytoy a papel a nakailistaan dagiti nagsayaatan a kualidadda. Pagyamanan kadagitoy a nagsasayaat nga artikulo.

R. P., Italia