No Dakdakkel ti Karit, Dakdakkel ti Ragsak!

“DIKAMTO pulos mabaelan dayta!” Ti naalumamay, ngem prangka a sao ni tatangko ti nangupay iti kasta unay kaniak. Tarigagayak ti agbalin a mannakilumba iti motorsiklo ket kaibagbagak pay laeng dayta kenkuana. Manipud pay iti kinaubingko daytoyen ti kalatko iti biag. Ngem ni tatangko agbalbalin laeng a napudno, ket agtawenak pay laeng iti 14, agtutubo ken awan ti kapadasanna.

Ti panagayatko kadagiti motorsiklo nagtaud ken ni tatangko. Namin-adu a daras, impannak iti Isle of Man tapno agbuya iti TT Races.a Ngem iti daytoy a tawen, 1950, naiduma. Nagkaduakami a nakatakder sadiay a mangbuya ken ni Geoff Duke iti panangabakna iti damo a Senior Event, a panagluganna iti maysa a Norton, nga addaan iti rekord a kapartak a 93.33 mph​—ket kalpasanna nagun-odanna ti maikadua a lugar iti Junior TT!

Narubroban ti ambisionko a makikadua iti ragsak iti pannakisalisal iti Isle of Man. Determinadoak a mangaramid iti grado. Ngem diak nabigbig idi a sangapulo a tawen kamaudiananna pumudnonto ti arapaapko. Ngem ti karit ket saan a nalaka.

Panangadal a Naimbag iti Makina

Addada tallo a kangrunaan a kita iti panaglulumba iti motorsiklo. Ti speedway, iti maysa nga oval a natapuk a pagdalanan, kasapulanna ti adu a paglaingan no dagiti lugan masapul a patingigen iti nalawa a lugar tapno mangipalubos iti panaguyas dagiti makinlikud a dalig. Ti motocross, nga isu pay laeng ti matuktukoy idiay Inglatera a kas scrambling, ket mapataray iti lasonglasong, dagiti motorsiklo maipaayanda kadagiti naisangsangayan a nauneg ti getlengna a goma. Ti road racing iti Isle on Man, iti kasumbangima, ti mangisalisal iti laing ken kapadasan ti tunggal nagmaneho a maibusor kadagiti amin a makisalisal iti gagangay a kalsada. Dayta ket pannakisalisal nga inorasan, a ti kapartakan a nagmaneho ti mangabak.

Idi nangrugiak a makisalisal, ti gatad ti maysa a motorsiklo ket agarup £480 ($860, E.U.). Itatta ti maipada iti dayta a makina ket addan iti £15,000 ($26,800, E.U.). Ket addada dagiti nadumaduma a kapasidad ti makina, manipud 50 cc agingga iti 500 cc. Ngem ti sekreto iti balligi saan nga agpannuray iti kasta unay iti ngina ti makina wenno ti pannakabalin ti makinana kas kinasayaat ti pannakatarimaanna. Kadagiti adu nga okasion agtalinaedak agingga iti alas dos ti agsapa a mangtartarimaan iti makinak.

Ti pannakisalisal ket saan a nalaka a kas iti makitkita. Iti nakaparpartak a pannakisalisal adda ti kasta unay a pigsa kadagiti manibela. Tapno matengngel ti maysa a nabileg, nadagsen a motorsiklo nga agtartaray iti nasurok a 160 kilometros kasapulanna ti adu a pisikal a tured ken bileg. Gagangayen a lumag-anak iti lima wenno innem a libra iti pangrugian ti tunggal panawen ti salisal. Adda met ti nakaro a panagdanag a nairaman.

Ti Balligi ken dagiti Peggad

Idi 1963, nagbalinakon a propesional, a nagun-odak ti dua nga umuna a puesto iti dayta a tawen idiay Makin-amianan nga Ireland, a naglugan kadagiti Norton. Idiay Zolder, Belgium, Intemational Races, rimmuarak met nga umuna a puesto agpadpada iti 500 cc ken 350 cc nga okasion. Bayat iti 1966 ken 1967, tinagiragsakko ti makaparagsak a pannakikadua kadagiti motorsiklo a Paton, a nakapimpintas ti pannakaaramidda, nga inaramid ti ima a makmakina. Iti sidong ti panangsuportar ni Bill Hannah iti Liverpool, damo a nagluganak iti 350 cc a prototype kalpasanna ti 500 cc a modelo.

Dadduma kadagiti kasayaatan a nagun-odak iti aniaman a tiempo isu idi 1967, idi nagluganak kadagitoy a makmakina. Rimmuarak nga immuna agpadpada iti 350 cc ken 500 cc nga okasion idiay North West 200 idiay Ireland, maikadua iti 500 cc iti Austrian Grand Prix, maikatlo iti 500 cc iti Belgian Grand Prix, ken maikalima iti 500 cc iti Isle of Man TT.

Bayat iti siam a tawen nakisalisalak iti daytoy a nadayaw a TT ket rimmuarak a maikatlo iti dua nga okasion. Idi 1907, idi naaramid ti umuna a salisal, ti kapartakan ket 69.06 kilometros, ngem iti panagsasalisal idi 1957, ni Bob Mclntyre isu ti damo a managmaneho a nakapataray iti nasurok a 100​—agingga iti 162.73 kilometros. Daytoy ti ngimmaton iti ngangngani 193 kilometros.

Babaen iti kaadda iti sangagasut wenno ad-adu pay a managmaneho, ti Isle of Man TT ket pudno a napeggad a panaglulumba, ket daytoy ti maysa a rason no apay, a manipud 1977 a panagsasalisal, dayta ti naikkaten iti listaan iti Grand Prix iti motorsiklo. Kinapudnona, idi 1965 ti pannakapadasko iti kadadaksan nga aksidentek iti daytoy a kurso. Ti managmaneho iti likudak magagaran a manglabas kaniak, ngem ti makinlikud a prenok ket addaan ti parikut, ket masapul a pabannayatek ti kapartakko bayat ti pannakagtengko iti kannawan ken kannigid a panagsikko. Dina ammo daytoy, siempre, ket dina impalubos dayta. Kas banagna, sinagidna ti makinlikud a pilidko ket dayta ti nangipurruak kaniak.

Naipurruakak iti kalsada iti nakaad-adayu ngem nasugatanak laeng ken nagumradan. No koma no naidungparak iti beddeng a ladrilio a pader a nakaparpartak ti panagpatarayko, dikon mapanunot no ania ti napasamak kaniak. Maldaanganak a makaammo kalpasanna, a ti motorsiklok, a nagtaray nga immuna ngem siak, ti nangdungpar iti flag marshall, a nangtukkol kadagiti dua a sakana ken nangikabil kenkuana iti ospital iti adu a bulbulan.

Dagiti Ragsak ken Ipapatay

Iti daytoy a tiempo makisalsalisalak iti Motorcycle Grand Prix. Daytoy ramanenna ti itatabunok kadagiti 20 a gimong iti panaglulumba iti tinawen, a makisalisalak iti agingga iti 35 a panagsasalisal kadagiti pagpagilian iti adayu kas iti Canada ken Japan. Nagdaliasatak met iti kasta unay idiay Europa​—manipud Sweden ken Finland iti amianan agingga iti Espana ken Italia iti abagatan, ken ti listaan dagiti pagturongak ti masansan a mangipan kaniak iti Makindaya nga Europeo a pagpagilian. Anian a ragsak ti makikompetensia a maibusor kadagiti makmakina a MZ iti Makindaya nga Alemania, ti mabigbigbig a Jawas iti Czechoslovakia, ken ti Vosticks manipud iti U.S.S.R.!

Nupay dagiti premio a kuarta ket maited agingga iti maikasangapulo a lugar, ti kangrunaan a kalat iti Grand Prix isu ti pannakagun-od iti adu a puntos agingga a mabalin. Kalpasanna, iti ngudo ti 12 a bulan a pannakisalisal, dagiti puntos a nagun-odan manipud kadagiti napalabas nga okasion iti Grand Prix ti magupgop ket maipablaak ti maysa a listaan a mangipaay iti innem a kangatuan a managmaneho iti lubong iti dayta a tawen. Ti kasayaatan a resulta a nagun-odak ket idi 1965 idi nagun-odak ti maikapat a lugar iti 500 cc iti Kinakampeon iti Lubong.

Bayat dagiti napalabas a tawtawen adu a mannakisalisal ti natnatay iti aksidente. Ngem dayta ket paset iti karit iti panagay-ayam, ket dakam amin inawatmi dayta. Adda ti trahedia, nupay kasta, a nangkigtot kaniak iti kasta unay. Makilumlumbaak idiay Finland idi a ti nasinged unay a gayyemko natnag iti motorsiklona ket nabuong ti bangabangana. Isut’ saanen a nakapuot a pulos. Ti asawak, ni Grace, ken siak nakipagnaedkami kenkuana ken iti asawana agingga nga isut’ natay.

Managdaliasat a Pamilia

Siak ken ni Grace nagasawakami idi 1960. Pagay-ayatna met ti panaglugan iti motorsiklo ket tagtagiragsakenna ti panaglugan a kaduak, a kadkaduaennak kadagiti gimgimong iti pannakilumba agingga a naipasngay ti damo nga anakmi idi 1961. Kalpasanna nagdaliasatak nga agbukbukod a mapan kadagiti pannakilumba. No taliawek ti nalikudan, maysa nga inaagum a panagbiag ti ar-aramidek kalpasan ti pannakaipasngay ni Robert. Kankanayon a panawak ida iti adu a bulbulan agingga a ni Grace nagbalinen a malmaldaang unay ket pinilitkon a makikadua kaniak. Gimmatangkami ti maysa a van ket kalpasan dayta nagdaliasatkami iti sadinoman kas maysa a pamilia. Uray pay idi dimteng ti dua pay a sabali nga annak, saan a nagbalbaliw ti kasasaad.

Panagbalbaliw ti Panagpampanunot

Idi agngudo ti 1967, inkeddengko ti agikkat iti pannakilumba iti motorsiklo ket gimmatangak iti garahe idiay Southport. Ti pannakaawis iti pannakilumba iti motorcar ket, simmaruno, iti maysa a single-seater Lotus Formula Ford. Ngem di nagbayag nabigbigko a ti panaglugan iti pakilumba a motorsiklo ken ti panagmaneho iti pakilumba a kotse kasapulanna ti panangsanay iti naiduma unay a pamay-an.

Amin daytoy ti nangiparang kaniak iti makatignay, kabbaro a karit. Ni Grace, nupay kasta, ket saan a maragsakan maipapan iti kabbaro a pagayatak ket di pulos naginteres iti dayta. Gapuna kamaudiananna, gaput’ kinakurang ti panagtutunos ti pamilia isu a tinagiragsakmi a nakabaybayagen bayat a makisalsalisalak, inkeddengkon ti agikkat a namimpinsan iti panagay-ayam.

Maysa a nakaskasdaaw a banag, ngem iti laeng kamaudiananna a nakitak nga adda ti rason. Maysa a kabbaro nga interes ti mangrugrugi a mangipaay iti kabbaro a panangipateg. Ti panagpampanunot ni Grace​—agraman ti panagpampanunotko​—agbalbaliwen, a saanmi a madmadlaw.

Ti Kabbaro nga Interesmi

Ni Grace ken siak ket pudno a miembro iti Church of England, ngem gapu iti kasta unay a panagdaliasat, ti relihion ket maiwalwalin laeng. Gapuna idi nagbalin nga interesado ni Grace iti panangasaba dagiti Saksi ni Jehova idi pay laeng 1960, ti agakar-akar a panagbiagmi ti nanglapped met iti dayta. Sangapulo a tawenen ti napalabas sakbay a naaddaankami iti nakapatpateg a panagsasarita iti Biblia ken iti mensahena a maipaay iti kaaldawantayo.

Kalpasan ti kaadda ti tiempomi a nagpirmi, nakasabet manen ni Grace kadagiti Saksi ni Jehova ket inyurnosna ti nagtugaw a maipaay iti pannakisarita iti ‘pagilasinan iti panawen.’ Dayta ket paset iti maysa a naisangsangayan a kampania​—maysa nga innem a bulan a kurso ti libre a panangiyadal iti Biblia nga usaren ti maysa a bassit nga asul a libro a napauluan Ti Kinapudno a Mangiturong iti Biag nga Awan Inggana. Malaglagipko pay laeng ti panangpampanunotko bayat ti iyaadani ti damo a pannakitulagmi: ‘Ania ti nangipalubosanmi kadagiti bagbagimi? Ania ngata a makabannog a rabii ti pagbalinanto dayta!’ Ngem nagbiddutak.

Ti maysa a banag a malaglagipko pay laeng manipud iti damo a pannakasabetko kadagiti Saksi ni Jehova isu ti Nainkasuratan a rekord iti 2 Timoteo 3:1-5. Malaglagipko pay laeng ti pannakasdaawko iti pannakabigbigko a diak ammo a ti kasta nga umiso unay a ladawan iti ‘pagilasinan iti panawen’ ket nailanaden iti ngangngani dua ribon a tawtawen. Ni Grace ken siak agpada ti kapanunotanmi, magagaran a makasuro, ket iti uneg ti makatawen agpadpadakamin a nabautisaran.

Addaanak pay laeng iti agtutubo a pamilia iti uppat nga annak nga aywanan, ngem ni Grace ken siak ket determinado a mangiyun-una kadagiti umuna a bambanag. Gapuna, babaen iti pammaregtana, inlakok ti negosiok, nangalaak iti paset-tiempo a pagtrabahuan, ket rinugiak ti nangasaba iti amin-tiempo kas payunir a ministro. (Mateo 6:33) Dagiti adu a tawtawen ti panagmotorsiklok ti nangipaay kaniak iti ragsak a di maartapan. Ngem itan, babaen iti nalawlawagen a panangmatmat iti kinasagrado iti biag, nasarakak iti bagik a mangsangsango iti dakdakkel pay a karit. Diak nabigbig idi a daytanto ti mangiturong kaniak iti dakdakkel pay a ragsak.

Ti Nakaragragsak a Karit

Di nagbayag ni Grace ken siak nasarakanmin nga adda ti naiduma a karit iti tunggal tiempo a makasabetkami iti maysa a tao iti Nakristianuan a ministerio. Umuna masapul a maawatanmi dagiti naespirituan a kasapulanna ket kalpasanna sapulenmi ti panangipaaymi kadagidiay a kasapulan babaen iti nasigo a panangusar iti Biblia. Mapanunotyo kadi ti ragsak iti pannakakita iti napeklan nga ateista nga agbaliw iti panunotna tapno agbalin a dedikado nga adipen ti Dios? Ni Grace ken siak addaankami iti kasta a kapadasan. Innalana ti adu nga or-oras a naanus a pannakirinnason ken ti sistematiko a panangiyadal iti Biblia kenkuana ken iti asawana, ngem anian a rag-o ti pannakakita kadakuada a dua a mabautisaran!

No makilumlumba, adu unay ti agpannuray kaniak, ti kapadasak, ken ti kinalaingko. Ngem masapul a sursuruek a ti panagtalek iti bukodko a gagangay a kabaelan iti ministeriok ket saan nga umdas. Ti panagtalek iti espiritu ni Jehova a mangiwanwan babaen iti kararag ket nasken.​—2 Corinto 4:7.

Bayat dagiti adu a tawtawen ti pamiliak tinagiragsakna dagiti adu a nagsasayaatan a pribilehio iti panagserbi a sangsangkamaysa ket nabaelanmi a tinulongan ti adu a gagayyem, kakabagian, ken kakaarruba nga umawat iti kinapudno ti Biblia. Bayat iti uppat a tawen inawatmi ti makakarit a destino a mangbusbos iti tinawen a bakasionmi nga agdaliasat kadagiti kaadayuan ti makin-amianan a daya a Scotland. Nangibatikami kadagiti adu a katulongan iti panagadal iti Biblia kadagiti managpadagos a tattao sadiay ken nangirugi kadagiti panagadal iti Biblia.

No taliawen, nalawag a babaen iti panangala iti umuna nga addang nga agpayunir nangipaayak iti kasayaatan nga ulidan a maipaay kadagiti uppat nga annakko. Aminda pinilida ti sumrek iti amin-tiempo a serbisio idi makaturposdan iti panageskuela ket intultuloyda dayta nanipud idi. Dagiti tallo a naasawaanen ket addaanda iti assawa a makiraman met iti dayta a trabaho.

Dua a tawenen ti napalabas, idi nakaturposen ti inaudi nga anakmi a babai iti panageskuela, nabaelanen ni Grace ti nakikadua kaniak kas ti parehak iti kinapayunir. Idin nabaelakon nga inawat ti sabali a pribilehio, ti panagserbi kas kasuno a manangaywan iti sirkito. Gapuna itan, babaen iti panagdaliasat manipud iti pagtaenganmi, masansan a bumisitakami kadagiti asideg a kongregasion a tumulong ken mangparegta kadakuada.

Addaankami ti naan-anay a panagbiag, a ni Grace saan laengen a mangsupsuportar kaniak ken mangbuybuya kaniak, kas iti kaso idi makilumlumbaak pay. Itan, agkaduakamin, makiramankami iti trabaho a panangaramid-adalan, ket ti ragsakmi kas maysa a pamilia naan-anay. Inaldaw, agyamankami ken ni Jehova gapu iti karit ken ti nakaragragsak a pribilehio a panagbalin nga aktibo a Sasaksina.​—Kas insalaysay ni Fred Stevens.

[Dagiti Footnote]

[Ladawan iti panid 18]

Ni Fred ken ni Grace Stevens