Ti Tiempo ti Ay-ayam ket Tiempo ti Panagdakkel

Maipaay itoy nga agsursuro a magna nga ubing dayta ket tiempo iti panagsirarak. Marubroban babaen iti kinausiusona, guyodenna ti isuamin iti balay. No ti balay saan nasalakniban manipud iti ubing, ti ina agikkisto nga agkuna “saan-saan” ken sipatenna dagiti babassit nga im-ima, ket dayta a pamay-an lapdanna iti kinausiuso​—ti isu met laeng a kinausiuso a mamagbalin iti ubing a naballigi iti eskuelaan ken kamaudiananna iti biag. Agbalinkayo a manangsalaknib ngem saan a nakaro ti panangsalaknibna. Ad-adu ti wayawaya a dumteng iti parke iti ruar, a sadiay ti maysa a tubo ti mabalin nga agbalin nga usok a lumasat iti bantay wenno maysa a kueba a maipaay a pagnaedan ni Mama nga uso ken Urbon nga uso.

Sumagmamano a tawtawen kamaudiananna, rumang-ayen ti panagar-arapaap. Ti pagipempenan a kahon agbalinen a pagtaengan a pagay-ayaman iti ay-ayam a balay, ti maysa a tugaw agpaay a tugaw ti tsuper iti kotse, ti sagad ti agpaay a lumabaga a kabayo nga agtaray a mangisalakan iti maysa a tao. Ti kahon ti darat, nga addaan kadagiti bangbanga ken pariok ken maysa a lata a danum, mangipaay iti awan patinggana a gundaway. Nupay no ti panangaywan ti nagannak iti panagay-ayam ket napateg, saan a kasapulan a kanayon ti pannakaiplano ken pannakaorganisar ngem mabalin a maibagay iti pagayatan iti dayta a kanito. Babaen iti rikna dagiti babassit nga ubbing mabalin nga agbalinda a cowboys, agtaytayab nga eroplano, dodoktor ken nars, amma ken inna, astronaut, ken ti umung-ungor a bulldoser​—amin ket adda iti baet iti kagudua nga oras.

Ti panagay-ayam ket nasken iti panagdakkel ti ubing. Ti panangikkat iti umiso a tiempo ti panagay-ayam ti ubing ken dagiti materiales a maipaay iti dayta isu ti pananglimitar iti panagdakkel ti isip ken bagina, emosionna ken espirituna.