Ti Kinatangsit Ti Kadaksan a Lappedko

SAAN a nalaka ti addaan ti lapped ken agbalin a naragsak. Kaaduan a tattao a madagdagsenan kadagiti pisikal a lapped ket malidayda, siempre iti sagpaminsan. Kadagita nga okasion masansan nga imtuodenda dagiti bagbagida: “Apay a siak?”

Saanak a mailaksid. Naipasngayak nga addaan iti nakaro a pisikal a lapped a manglapped kaniak a magna, agtakder, wenno uray mangusar kadagiti im-imak. Daytoy a kasasaad kaawatan ket addaan iti nagdakkelan nga epekto iti personalidadko. Malaglagipko pay laeng ti panagimon ken ti pannakapaay a nariknak kas maysa nga ubing no mabuybuyak dagiti dadduma nga ubbing nga agtartaray ken aglaglagto.

No dadduma bisitaek ti asideg a simbaan a dumawat iti tulong ti Dios. Sipapasnek nga ulit-ulitek iti 20 wenno 30 a daras ti kararag a “Padre Nuestro” (“Amami”) ken ti umasping a kaadu dagiti “Ave Maria” (“Hail Mary”), nga ibalballaet kadagitoy a panagdawdawat ti maysa a naimpusuan a dawat a, “Pangngaasim Apo, agasannak!” Inkarik iti Dios ti adu unay no maagasannak laeng.

Dagiti Bukel iti Kinatangsit

Naipasngayak idiay Granada, maysa a napintas a siudad iti umabagatan nga España idiay arisadsad ti nakataytayag a Kabambantayan iti Sierra Nevada. Kas maysa nga ubing, ti kaadda ti lappedko ti nangtignay kaniak a makapataud kadagiti dadduma a paglaingan, ket idi agtawenakon iti pito, ad-adda nga adelantadoak iti edukasion ngem dagiti dadduma a kaedadko. Iti dayta a tiempo gagangay a makilangenak kadagiti dadduma nga ubbing, makiay-ayam kadakuada ken aggaraw iti aglikmut a buyogen ti kinasiglat bayat ti panagtugawko iti bassit a tugawko. Nasursurok pay ti agdrowing ken agsurat babaen iti makannigid a sakak babaen ti panangpetpetko ti lapis iti nagbaetan dagiti ramay ti sakak.

Iti maysa nga okasion ti lokal a pagiwarnakan ti nangipablaak ti maysa nga artikulo maipapan kaniak, agraman dagiti ladladawan a mangipakpakita kaniak nga agsursurat babaen iti sakak. Daytoy a publisidad ti nagbanag iti pannakaawatko kadagiti adu nga award ken panagbiahe, agraman ti pannakaidayaw manipud kadagiti dadduma. Amin daytoy ti nagserbi a mangparang-ay kaniak ti ubbaw ken natangsit nga espiritu. Ringringbawannak ti kinatangsit.

Dagiti Epekto tí Inkapilitan a Panagsolsolo

Di nagbayag masapul a sumardengak nga ageskuela. Dumakdakkelakon, ket imposiblen ti panangipan ni nanang kaniak iti eskuelaan manipud iti maikadua a grado nga apartmentmi ken ti panangiyawidna kaniak. Gapuna, manipud iti edad a 13, intultuloyko ti edukasionko babaen iti kurso ti koresponsal. Nasarakak a nalaka ti agadal ket rimmang-ayak a naimbag, ngem ti kapilitan a panagsolsolo ti nangapektar kaniak. Nupay no nalabit agparang a naragsakak ken mannakilangen, rinugiak ti nagmennamenna maipapan iti pisikal a kasasaadko ken ti pakainaigannanto iti masanguanan.

Idi 1971, nagun-odak ti panagadal kas maysa nga eskolar nga agadal iti makatawen iti maysa a sentro ti rehabilitasion nga imatmatonan dagiti mamadre a Katoliko idiay Madrid. Sadiay a nasursurok ti agmakinilia a mangus-usar ti pluma iti ngiwatko, isu a napaneknekan a nausar unay. Siempre, ti relihion ket inkapilitan a paset iti linawas nga eskediolmi. Tunggal Domingo iti alas 7:00 t.b. aguurnongkami a tumabuno iti Misa. Nupay no ti ritual ti kasla saan a nasken kaniak, simamatalek a tumabtabunoak, ta tarigagayak nga ay-ayuen dagiti mamadre a mangay-aywan a naimbag kaniak.

Kalpasan ti makatawen idiay Madrid, nagsubliak idiay Granada. Kimmaro a nagbalinak a managbabain, naikulong iti uneg ti uppat a diding ti pagtaengak. Kaaduanna, binusbosko ti tiempok nga agbasbasa kadagiti nobela ken dagiti dadduma a liblibro a maiggamak. Sinurotko met ti pagannayasan ti tiempo: Nagpatuboak ti iming ket pinaatiddogko ti buokko. Ngem dayta ket saan a naragsak a paset ti panagbiagko.

Dumawdawat iti Pagilasinan

Masansan makarurodak gapu iti panagliday ken ti rikna iti kinaawan gawayna. Nagkararagak iti Dios, a dumawdawat kenkuana iti pagilasinan nga ipakitana ti kaaddana ken ti pannakaseknanna kaniak.

Sigurado, nangipaay ti Dios ti pagilasinan​—ngem saan nga iti pamay-an a ninamnamak. Dayta ket idi pagnguduan iti 1973. Maysa a Saksi ni Jehova ti simmarungkar iti ruanganmi, bayat ti kaadda ni nanang iti ruar a napan naggatang, linukatak ti ruangan ket immimdengak iti ibagana. Iti pagnguduan ti panagsaritami, intukonna kaniak ti libro a Ti Kinapudno a Mangiturong iti Biag nga Awan Inggana. Pudno nga inawatko dayta, ta iti dayta a tiempo situtulokak a mangbasa iti aniaman. Binasak ti intero a publikasion iti dayta met laeng a malem. Dagiti linaonna ti pudno a nangpasiddaaw kaniak, nangnangruna dagiti dua a Nainkasuratan a panangiparit: ti panangusar kadagiti ladladawan iti panagdayaw ken ti di umiso a panangusar iti dara.​—Exodo 20:4, 5; Aramid 15:28, 29.

Ti Saksi nagsubli maysa a lawas kalpasanna, ket bayat ti panangipakitana kaniak no ania ti isursuro ti Biblia, impakitak kenkuana no kasano ti panangsindik ti maysa a sigarilio nga usarek laeng ti sakak! Intukonna kaniak ti libre a panagadal iti Biblia iti uneg ti innem a bulan. Dagdagus nga inawatko a diak nabigbig idi a daytoy ti pudno a pagilasinan a dawdawatek.

Dagdagus nga inawatko ti pannakaammo iti Biblia. Nupay kasta, maysa a dakkel a banag ti mangaramid iti nasken a panagbalbaliw iti biagko tapno agbalin a maysa a pudno nga adalan ni Kristo. Ti kadadakkelan a parikutko isu ti personalidadko.

“Mamagtangsit ti Pannakaammo”

Ti ababa a kapadasan ti mangiyilustrar iti mentalidadko. Kalpasan ti panagadalko iti Biblia iti uneg ti innem a bulan, maysa nga agbambaniaga a ministro dagiti Saksi ni Jehova ti simmarungkar kaniak ket sinaludsodna ti panagrang-ayko. “Adu ti rinang-ayak. Nakaikabisadoakon kadagiti 500 a teksto ti Biblia,” simmungbatak a buyogen iti isem iti pannakapnek. “Pudno, 500 a teksto ti Biblia?” inulitna a kasla di mamati. “Wen, 500! Kitaem, insuratko ida amin ditoy kuadernok,” intangsitko.

Gaput’ natignay ti interesna, pinadasnak iti Proverbio 18:1. Dagdagus nga inulitko ti teksto a sao por sao: “Ti suminsina birukenna ti tarigagayna met laeng, ket karungsotna ti amin a natarnaw a kinasirib.” Kalpasanna inimtuodnak: “lyap-aplikarmo kadi daytoy a teksto? Makigimgimongka kadi a regular a kadua dagiti Kristiano a kakabsatmo a lallaki ken babbai?” “Bueno, wen, makigimgimongak,” kinunak, ta dagiti kakabsat a lallaki iti kongregasion siaasi a nangaramidda iti praktikal nga urnos tapno makatabunoak kadagiti gimgimong.

Kalpasan ti dua pay a salsaludsod nabigbig ti bisitak a pudno a naikabisadok amin dagidiay a teksto. Iti dayta met laeng a tiempo, naawatanna nga ad-adda ti panangasikasok iti pananggun-odko iti pannakaammok iti Biblia ngem ti panangiyaplikarko iti kasta a pannakaammo iti panagbiagko. Impalagipna kaniak ti teksto idiay 1 Corinto 8:1, “Ti sirib mamagtangsit, ngem ti ayat mamaglaing.” Tinulongannak a makakita ti pannakasapul iti panagbalbaliw iti personalidadko.

Kabayatanna simmardengakon nga agsigarilio, pinarang-ayko ti itsurak, ken inikkatko dagiti pagbasaan a saan a makapabileg. Sangapulo ket walo a bulan kalpasan ti damo a pannakakaskasabak, nagbautisarak idi Hunio 1975.

Panangparmekko iti Kinatangsitko

Nupay kasta, kaskasdi a diak pay laeng naparmek ti kinatangsitko. Dagiti kasasaadko ti nangipalubos kaniak nga agadal iti tallo wenno uppat nga oras iti inaldaw, ket di nagbayag nakaurnongak iti adu a Nainkasuratan a pannakaammo, isu a sigagagar a kayatko nga idemostra. Dagiti Saksi iti kongregasion a nakainaigak ti nangrugi nga immay kaniak kadagiti salsaludsodda iti Biblia ken uray pay kadagiti personal a parparikut. Maragsakanak laeng a mangusar iti abilidadko a tumulong kadagiti dadduma, ngem no dadduma daytoy met ti nangpataud iti kinaubbawko a maidaydayaw.

Kabayatanna saan unayen a madlaw dagiti pagilasinan iti kinatangsitko. Tunggal mabigbigko a mangipakpakitaak ti natangsit nga espiritu, agkararagak ken Jehova, a dumawdawat kenkuana a tulongannak. Nangnangruna a dumawatak ti tulong a maaddaan iti umiso a motibo: ti panangtulong kadagiti dadduma babaen iti pannakaammok, imbes a ti mangidayaw iti bagik met laeng.

Gubuayan iti Pudno a Kinaragsak

Ti panangasaba iti tunggal maysa a masabetko ket nagbalin a gubuayan iti pudno a kinaragsak. Ti panangiraman kadagiti dadduma iti nasursurok saan laeng a nangpataud iti makin-uneg a pannakapnek no di ket pinilitnak a rummuar iti balayko ken namagbalin kaniak a makilangen kadagiti dadduma ken makatulong kadagiti dadduma kadakuada. Nangnangruna a maragsakanak a tumulong iti maysa a lakayen nga addaan ti parparikut nga umasping iti parikutko.

Damo a nasabetko idi mangaskasabaak iti dua a lallaki iti kalsada. Bayat ti panagsasaritami diak naibturan a saan a madlaw ti lalaki, a magmagna babaen iti tulong ti sarukod, isu a lumablabas a kankanayon. Isut’ sumardeng iti sumagmamano a kanito iti tunggal ilalabasna, a kasla tarigagayanna ti umimdeng iti ibagbagak. Kamaudiananna, isut’ simmardeng iti sanguanak ket nagimtuod: “Pudno aya, amin daytoy maipapan iti sangalubongan a Layus?” Simmungbatak iti wen ket intultuloyko nga inlawlawag ti kaipapananna para kadatayo itatta. Kabayatanna nabaelak ti nakipagadal iti Biblia a kaduana.

Nupay no lakayen ken addaan kadagiti pisikal a parparikut, isut’ rimmang-ay ken inyaplikarna ti Biblia iti panagbiagna. Isut’ nabautisaran idi agedad iti 80. Ti asawana, nga idi damo isut’ nanglalais kenkuana, ket nabautisaran idi agedad iti 85.

Ti pannakabael a tumulong kadagidiay nga addaan iti lapped wenno makasapul iti tulong iti dadduma a pamay-an ti mamagbalin kaniak a nalaklaka a makalipat kadagiti pakarigatak. Iti dagupna, nabaelak ti timmulong kadagiti sangapulo a nagduduma a tattao a makaammo iti kinapudno iti Sao ti Dios. Daytoy ti pudno a gubuayan iti pammaregta kaniak.

Naparmeken ti Kinatangsitko

Ti kapapatgan, naammuak a ti pisikal a lapped dina lapdan ti pannakasarak iti kinaragsak iti biag. Ti panangammo iti Namarsua ti nangtulong kaniak nga agbalin a napudno ket sinangok dagiti lappedko, agraman ti kinatangsitko. Pinadasko ti nagbiag iti gagangay a panagbiag no mabalin. Itan kabaelakon a suportaran ti bagik, isu a nangipaay kaniak iti dakkel a pannakapnek. Tagtagiragsakek ti panagserbi kas maysa a panglakayen iti lokal a kongregasion, ket padpadasek ti maaddaan iti aktibo a pannakiraman iti panangikasaba iti naimbag a damag ti Pagarian. (Marcos 13:10) Awan duadua, ti pannakabael a tumulong kadagiti dadduma ti nangipaay kaniak iti dakdakkel a kinaragsak. Maigiddato iti dayta, nasursurok ti mangsapul iti pakaidayawan ni Jehova, saan a ti bukodko a pakaidayawan.​—Lucas 17:10.​—Kas insalaysay ni José Martín Pérez.

[Ladawan iti panid 15]

Panangaskasaba iti kalsada babaen ti tulong ti sabali a Saksi