Nailako iti Sekso

“IDIAY Francia,” kuna ti magasin a “Time,” “dagiti managipakaammo ti ad-addan nga agturturong iti panangisingasing iti sekso.” Babaen iti panangadaw iti maysa a managipakaammo a taga Londres, intuloy a kinuna ti artikulo: “Ti pannakatignay babaen iti sekso ti kanayon a paset iti armas dagiti managipakaammo, ngem idiay Europa dandanidan makagteng iti nakalablabes.” Idiay Brazil, idi naipabuya ti kinalabos iti telebision tapno ipakaammo ti jeans, maysa a 30-porsiento nga irarang-ay ti paglakuan ti naipadto a buyogen ti panagtalek. Maisupadi iti dayta, ti parliamento ti India, ti nanganamong ti maysa a linteg a manglapped ti panangusar kadagiti babbai kas simbolo iti sekso iti aniaman a porma iti panagipakaammo. Idiay Estados Unidos kasla adda ti panagbalbaliw​—siempre kadagiti komersial ti telebision. “Dagiti managipakaammo tarigagayanda a tingayen nga ad-adda ti panagkatawatayo ngem ti panangtignay iti sekso,” kuna ti “Daily News,” nga isitarna kas panangsuportar ti maysa a surbey dagiti managusar a mangipalgak a kadagiti sangapulo a paborito a pakaammo iti telebision, lima ti nakakatkatawa ket awan ti naglaon kadagiti seksual a tema.