Ti Paglaingan ti Panangallukoy
ANIA ti panggep ti komersial nga anunsio? Kuna dagiti negosio a ti anunsioda pagserbianna ti publiko ta pakaammuandatayo maipapan kadagiti produktoda. Kuna ti International Advertising Association: “Masapul dagiti Aggatang ti anunsio tapno umiso ti pannakaammoda. Naibatay iti impormasion ti addaan pannakaammo a panagpili. Ti anunsio—kaaduanna—ket nasken a kalasugan dayta nga impormasion iti nagbaetan ti Agpatpataud ken ti Aggatang.”
Siempre, ammotay amin a saan laeng nga agipakaammo iti kasta nga anunsio—ti panggepna ket aglako. Saan laeng a mangimpormar wenno neutral. Ti naballigi nga anunsio pagpanunotenna ti aggatang ket allukoyenna a gumatang iti produkto a nayanunsio.
Kasta met, ti anunsio saan laeng nga aglako kadagiti produkto; impluensiaannaka a gumatang iti adda markana a produkto. No agpatpataudka iti adu a sabon, dika mangbusbos iti minilion a doliar iti anunsio tapno paregtaem laeng dagiti tattao a gumatang iti aniaman a kita ti sabon. Kayatmo a gatangenda ti sabon a patpataudem. Kayatmo dagiti anunsio nga uray kaskasano ket mangkombinsir iti publiko a kaykayatda ti patpataudem a sabon ngem ti sabali a sabon.
Ti Puntiria a Tallaong
Tapno epektibo, gagangay a ti maysa nga anunsio ket siaannad a maiturong iti maysa a tallaong, ubbing man, assawa a babbai, negosiante, wenno dadduma a grupo. Maibagay ti mensahe iti kangrunaan a pakaseknan dayta a tallaong. Kalpasanna ti anunsio maipablaak iti media a kaepektibuan a mangdanon kadakuada.
Sakbay a maaramid ti anunsio, masirarak a naimbag ti grupo dagiti tattao a posible a gumatang ken mangusar iti produkto a mayan-anunsio. Masapul a maammuan dagiti aganunsio no siasino dagitoy a tattao, no kasano ti panagpampanunot ken panagtigtignayda, ania ti tarigagayan ken ar-arapaapenda. Insurat ti maysa a propesional a managanunsio: “Ikagumaanmi nga ammuen no siasino dagiti eksakto a puntiriami. Siasinoda, sadino ti pagnanaedanda, ania ti gatgatangenda, ken apay a gatangenda dayta. No ammomi amin daytoy, adda igammi a mangisurat iti makaguyugoy a mensahe nga aglako. Maguyugoyto dagiti puntiriami; saandanto a maguyugoy iti kinalastog wenno pammutbuteng, wenno pannakaseknanmi iti bagi, wenno kadagiti anunsio a maipablaak lattan nga awan ti puntiriana.”
Bambanag a Pakaguyugoyan
Iti panangaramid ti anunsio, nasken ti naannad a sasao. Gagangayen ti pananglamiong, wenno aglablabes a pammadayaw. Maysa a pamigat a cereal ti naibaga a “superior ti kalidadna,” ket ti maysa a kompania ti greeting card ibagana a gatangen dagiti tattao ti card-na no “kayatda ti mangipatulod iti kasayaatan a card.” Nupay narigat nga ilasin ti pananglamiong ken ti inggagara a panangallilaw, agannad koma dagiti aganunsio a saanda a masukalan nga agul-ulbod no mapaneknekan ti kinapudno. Adda linteg ti dadduma a gobierno a mangiparit iti kasta a panangallilaw, ken dagus nga agidarum dagiti negosio no agpeligro ti pagimbaganda babaen kadagiti makaallilaw nga anunsio dagiti karibalda.
No ti maysa a produkto ket dandani kapada ti sabsabali, limitado laeng ti maibaga ti aganunsio, isu a ti mensahe masansan a bassit laeng wenno awan pay ketdi ti maibagana. Adu ti mangilasin kadagiti produktoda babaen iti nasikap a replan. Dadduma a pagarigan ket: “Dikan agpanunot, gumatangkan” (replan ti tatak ti sapatos a pakilumba), “Pamigat dagiti kampeon” (pamigat a cereal), “Baybayadam, rumbeng a kasayaatan ti kalidadna” (kita ti kotse), ken “Ay-aywanandaka a naimbag” (kompania ti seguro).
Dagiti makita a mensahe, iti man magasin wenno iti telebision, addaanda kadagiti nabibileg a singasing a manglab-aw iti pudno a naibaga maipapan iti produkto. Ti pannakaiparang ti produkto nalabit makaipaay iti ideya a kas iti, ‘No gatangem daytoy a relo, raemendaka dagiti tattao’ wenno ‘Daytoy a marka ti jeans ad-adda a pagbalinennaka a makaay-ayo iti kasungani a sekso’ wenno ‘Apalan dagiti kaarrubam daytoy a lugan.’ Iti maysa kadagiti kalalatakan ken kababalligian a panagyanunsio, maysa a kompania ti sigarilio ti nanginaig iti produktona kadagiti ransero. Nailadawan dagiti ransero a napigsa, nabaneg, manangaywan. Ti di naisawang a mensahe ket: Agsigarilioka kadagiti sigariliomi, ket agbalinkanto a kas kadagitoy maidaydayaw a naalibtak a lallaki.
Malaksid kadagiti nasikap a sasao ken pannakailadawan, napateg met ti musika kadagiti komersial iti radio ken telebision. Gutugotenna ti rikna, papintasenna ti anunsio, pagbalinenna dayta a malaglagip, ken gutugotenna ti panaggusto dagiti aggatang iti produkto.
Kuna ti magasin a World Watch: “Dagiti kasasayaatan nga anunsio isu dagiti obramaestra—a kombinasion ti nakaskasdaaw a pannakailadawan, makapaalibtak, ken makagutugot a sasao a mangtignay kadagiti pagamkan ken pagayatantayo. Dagiti komersial a maiparang iti tiempo a kaaduan ti agbuya iti telebision kadagiti industrial a pagilian ad-adu ti ipaayda a singasing iti maysa a minuto ngem ti aniaman a naputaren idi.”
Gutugotenna ti Panagrason ken Emosion
Sisisikap a naaramid dagiti anunsio tapno awisenda dagiti espesipiko a tarigagay ken ipatpateg ti puntiria a tallaong. Nalabit ti maysa nga anunsio gutugotenna ti panagragsak, ti panagtarigagay iti kinatalged, wenno ti panagtarigagay nga aklonen ti sabsabali. Nalabit ti anunsio puntiriaenna ti tarigagay a mangimpluensia kadagiti sabsabali, agbalin a nadalus, wenno naiduma. Dadduma nga anunsio itandudoda dagiti produktoda babaen ti pananggutugot kadagiti pagamkantayo. Kas pagarigan, namakdaar ti maysa a kompania nga agar-aramid ti pagmulumog maipapan iti pagdaksan ti nabangsit a sang-aw: “Di pay ibaga kenka ti kadekketan a gayyemmo” ken, “Kanayon nga abaykanto laeng, dikanto agbalin a nobia.”
No dadduma, nalaka a basaen ken tarusan ti pangallukoy ti anunsio. Dadduma nga anunsio naiturong a nangnangruna iti ammotayo a nainkalintegan, lohikal a panagpampanunottayo. Direkta nga ipakaammoda ti produkto. Maysa a pagarigan ket ti karatula a mangipakaammo a kagudua laengen iti dati a presio ti presio ti ikan ita. Ti sabali a pamay-an ket mangiparang iti mangguyugoy nga argumento. Daytoy a kita ti anunsio mabalin a kunaenna a saanka laeng a makaekonomia iti kagudua iti dati a presio ti ikan no di ket paragsakenna pay ti pannanganmo ken pasalun-atennaka ken ti pamiliam.
Naaramid ti dadduma nga anunsio a manggutugot iti emosiontayo. Kas pagarigan, dagiti komersial a mangtukay iti rikna, manggutugotda babaen ti pananginaig iti makaay-ayo a ladawan iti produkto. Dagiti agpatpataud iti kosmetiko, sigarilio, ken arak agpannurayda a naimbag iti kastoy a pamay-an. Dadduma a komersial usarenda ti panangulit-ulit. Daytoy nga agresibo a pamay-an ket naibatay iti inanama a no kanayon a mangngeg dagiti tattao ti mensahe, mamatidanto ket gumatangda iti produkto, uray pay no dida magustuan ti anunsio! Dayta ti gapu a masansan a makitatayo ti anunsio a maulit-ulit a mangisingasing iti isu met laeng a produkto. Dagiti kompania nga agpatpataud iti agas a di makasapul iti reseta gagangay nga usarenda daytoy a pamay-an.
Dagiti mangdiktar nga anunsio gutugotenda met ti emosiontayo. Dagitoy nga anunsio direkta nga ibagada ti aramidentayo: “Inumem daytoy!” “Gumatangka itan!” Dagiti anunsio a mangdiktar maipagarup nga epektiboda kadagiti produkto nga ammo ken pagay-ayaten ti tallaong. Adu nga anunsio ti maibilang iti sabali pay a benneg. Dagitoy dagiti anunsio a mangawis iti panangtulad, wenno dagiti mangpaneknek. Mangipabuya dagitoy nga anunsio kadagiti nalatak wenno makaawis a tattao a mangus-usar wenno mangirekrekomendar iti produkto a kayat ti agan-anunsio a gatangentayo. Daytoy a pananggutugot naibatay iti ideya a kayattayo ti agbalin a kas kadagiti daydayawentayo a tattao. Ti agsigsigarilio a ransero ket maysa a pagarigan daytoy a kita ti anunsio.
Anunsio a Mangawis iti Atensionmo
Madlawmo kadi a mairuamka iti angot wenno arimbangaw ta dandani saanmon a madlaw dayta? Kasta met laeng ti mapasamak iti anunsio.
Sigun iti magasin a Business Week, ti gagangay nga Americano maisarang iti agarup 3,000 a komersial a mensahe iti inaldaw. Kasano nga agtignay dagiti tattao? Basta dida ikankano wenno dida pampanunoten. Kaaduanna, manmano nga ikaso ti kaaduan a tattao dagiti anunsio.
Tapno maparmek ti di panangikankano dagiti agbuybuya, dagiti anunsio masapul nga agawenda ti atensiontayo. Dagiti komersial ti telebision ipabuyada dagiti makapasiddaaw a buya. Maikagumaanda a makalinglingay, dramatiko, nakakatkatawa, makariro, wenno emosional. Mangipabuyada kadagiti natatan-ok ken nakaay-ayat a karakter iti cartoon. Adu ti mangawis iti atensiontayo, nalabit babaen ti panangipamaysa kadagiti pusa, uken, wenno kadagiti maladaga.
Apaman a naawisen ti agan-anunsio ti atensiontayo, pagpautenna ti panaginterestayo tapno mabigbigtayo ti produkto a maituktukon. Saan laeng a manglinglingay dagiti naballigi nga anunsio; allukoyendatayo a gumatang.
Iti ababa, kasta ti kinaepektibo ti anunsio. Kitaentayon ti pannakabalinna.
[Blurb iti panid 6]
Maisarang ti ordinario nga Americano iti agarup 3,000 a komersial a mensahe iti kada aldaw
[Kahon iti panid 5]
Dagiti Mangpaulimek, Manglabas, ken Mangpili
Ti remote control ti telebision ket maysa nga alikamen a maibusor kadagiti anunsio. Adu ti mangpaulimek iti anunsio babaen ti panangitalmegda iti buton a mangpaumel iti anunsio. Dadduma kopiaenda ti programa kadagiti videotape ket no buyaendan labsanda dagiti anunsio babaen ti panangitalmegda iti buton a fast-forward. Dadduma ti agpili, a kayatna a sawen agakar-akarda kadagiti channel tapno maliklikanda dagiti anunsio. Dagiti nalaing nga agpili ammoda no kasano kaatiddog ti komersial, ket sublianandanto ti programa a buybuyaenda no nalpasen ti anunsio.
Ikagumaan dagiti agan-anunsio a lapdan ti pannakapaulimek ti anunsioda babaen ti panangpataudda kadagiti anunsio a makasumra iti pannakapaulimekda—dagidiay dagus a mangawis iti interes dagiti agbuybuya ket buyaenda dayta. Ti silo iti panangpataud iti makaawis nga anunsio ket matandaanan dagiti tattao ti anunsio ngem malipatanda ti produkto a mayan-anunsio.
[Kahon iti panid 6]
Di Makatignay nga Anunsio
Idi arinunos ti dekada 1950, kinuna ni James Vicary nga inadalna ti maysa a pagsinean iti New Jersey, E.U.A., a sadiay apagdarikmat a naiparang iti iskrin dagiti sasao nga “Uminumka iti Coca-Cola” ken “Manganka iti Popcorn” bayat ti sine. Awan pay maysa a segundo a naiparang ti mensahe, apagdarikmat ta di maipasagepsep iti isip. Ngem sigun ken Vicary, immadu ti naglakuan iti Coca-Cola ken popcorn. Daytoy a kapanunotan nagbanag iti nasaknap a panamati a dagiti agan-anunsio matignayda dagiti tattao a gumatang kadagiti bambanag babaen ti panangiparang kadagiti “di makita a mensahe. Kalpasan ti naipadamag a panangpirmana iti kontrata a $4.5 milion kadagiti kapigsaan nga agpapaanunsio iti America, nagpukaw a kasla asuk ni Mr. Vicary. Dagiti agpapaanunsio naallilawda.
Naibutaktak nga ulbod ti panangaklon ni Vicary kadagiti sumaganad a panagadal. Kuna ti maysa a nabayagen nga agan-anunsio nga ehekutibo: “Saan a naballigi dagiti di makatignay nga anunsio. No naballigida, inusarmi koma idan.”
[Ladawan iti panid 7]
Nadisenio dagiti komersial a mangawis iti atensiontayo