Manipud Managbasatayo

“Naraman” nga Artikulo

Tarigagayak nga iyebkas ti panangapresiarko iti “Panagluto ti Natnateng​—Estilo ti Insik.” (Mayo 8, 1988) Nangisaganaak ti taraon a sinurotko dagiti singasing iti artikulo ket indaydayawdak ti pamiliak gapu iti dayta. Manginanamaak ti panangitultuloyyo a mangisagana kadagita a “naraman” nga artikulo.

R. G. O., Brazil

Panagtalaw

Iti artikulo a “Ti Kadi Panagtaray ti Sungbat?” (Marso 22, 1988), dikay liniklikan ti tradisionyo a mangusar iti narang-ayen a kagimongan kas pakaisentruan. Kaanonto a makagun-od ti saan unay a nainggundawayan a kagimongan a kas ti Africa iti atensionyo? Para kaniak, ti singasingyo iti solusion ket kurang ti panangmatmatna iti masanguanan ken manangidumduma. Dikay intudo a daytoy a makariro a kasasaad ket nagtaud kadagiti materialistiko a pagannayasan ken ambision dagiti dadduma a nagannak itatta. Daytoy a mannurat ket maysa a biktima. Sumagmamano a tawtawenen a napalabas idi adu pay ti kuartak, nagbalinak a paborito ti naganak kaniak, ngem idi dagiti kasasaad pinagbalinnak nga awanen ti kuartana, nalalaisakon. Iti ababa a pannao, ni nanangko ti nangdadael ti kasasaadko. Kondenarenyo koma nga awan ti panangidumduma ti materialistiko a kababalin dagiti dadduma a nagannak itatta.

T. T., Nigeria

Daytoy nga artikulo ket maikadua iti serie dagiti panagtalaw. Ti umuna (Pebrero 22, 1988) bigbigenna dagiti di nainkalintegan a kasasaad a pudno a mapaspasamak ket, no dadduma, dagiti nagannak ti mapabasol. Ikagkagumaan ti “Agriingkayo!” a taginayonen ti internasional a kasasaad. Ti topiko iti akkub iti Marso 8, 1987 nga “Awake!” ken ti Hunio 22, 1988 nga “Agriingkayo!,” espisipiko a tamingenna dagiti pakaseknan manipud kadagiti gubuayan nga Africano. Adu nga indibidual nga artikulo ti nangaramid met iti kasta.​—ED.

Inanamaek a tunggal agtutubo ket basaenda dagiti “Agimtuod dagiti Agtutubo . . . ” nga artikulo. Inapresiarko a nangnangruna ti “Pumanawak Aya iti Pagtaengan?” (Pebrero 22, 1988) Pampanunotek dayta, ket binalbaliwak ti panunotko.

C. H., United States

Naapresiar ti Agriingkayo!

Kas ti kankanayon a managbasa ti Agriinakayo!, dayawek ti kasta unay a nagsayaatan a pamay-an ti panangiparangyo kadagiti parikut tapno maawatan ti isuamin. Daytoy ket saan a gagangay iti makunkuna a mamasirib a kagimongan. Dayawek met ti kinamanagparaburyo, ti tarigagayyo a makatulong iti kinaragsak ti tao nga awan ti aniaman a gunggona kadakayo met laeng, ta dagiti publikasionyo ket maiwarwaras nga awan ti ganansia, ket dikay agkolkolekta a kas ti ar-aramiden dagiti adu.

J. B., M.D., France

Maysaak a 16 años, ket maysaak a Muslim. Nupay kasta, tagiragsakek dagiti makapainteres nga artikulo a maipaay kadagiti ubbing ken dagiti nagannak kadakuada. Tarigagayak nga ad-adu pay nga ubbing a kaedadko ket sukimatenda dagiti bambanag nga ibagbagayo. Dagiti liblibroyo pagbalinenda ti maysa a naliday a rabii a nalaklaka nga ibturan. Pagyamanan ti panangiramanyo kadakami nga ubbing.

F. R., United States

Apresiarek ti nauneg a pannakaawat nga ipapaayyo kadagiti amin a kita ti parparikut a tumataud iti biag, agraman ti nagsayaatan a balakad. Amin dagiti dadduma a relihion ket saanda nga agtutunos, ngem dagiti sursuro iti publikasionyo pulos a saanda nga agsusuppiat. Dagitoy nainkalinteganda ken, kangrunaan ngem amin, umisoda. Ti mamagragsak unay kaniak ket main-inot a mariknak a ti biagko ket ad-adda a matagiragsak bayat ti panagbalbaliwko manipud iti awan mamaayna a pamay-an ti panagbiag a sursurotek agingga ita nga agturong iti addaan pateg.

M. O., Japan