Inton Saanen a Pagamkan ti AIDS
Idi rabiii iti Oktubre 3,1984, ni agtutubo a Kyle Bork naipasngay a pito a lawas a di nadanonan. Dagiti babassit a barana ket saan pay a naan-anay ti pannakabukelna ta di agandar a siuumiso, gapuna isut’ naiyakar iti 56 kilometros ti kaadayona iti Children’s Hospital iti Orange County, a sadiay ti pakagun-odan iti alikamen a mangaywan iti kasta a nakaro ti sakitna nga ubbing.
Inlawlawag ti doktor a ti dara ni Kyle masapul a masukatan babaen iti panangiyalison iti dara; ta no saan mabalin a matay. Nupay no narigat para kadagiti nagannak, nagtalinaedda a natibker iti naibatay-Biblia a pangngeddengda a saan a mangipalubos iti panangawat ti anakda iti panangiyalison iti dara. (Genesis 9:4, 5; Levitico 17:10-14; Aramid 15:28, 29) Mannakaawat ti doktor ken mannakitinnulong. Kaskasdi, kinunana, no agbalin a nakarikrikut ti kasasaad, isut’ mangala iti bilin ti korte ket ipaayna ti panangyalison.
Nakaskasdaaw, nagtultuloy a simmayaat ni Kyle, ket idi maikasiam nga aldaw, isut’ naikkaten iti respirator. Dua nga aldaw kamaudiananna inyawiden dagiti nagannak kenkuana, ket dimmakkel a naragsak, nasalun-at nga ubing, kas ti makitayo iti ladawan. Ngem saan a dayta ti nagpatinggaan ti estoria.
Idi napan a tawen maysa a padamag ti telebision ti nangibaga nga adu nga ubbing nga adda idiay Children’s Hospital iti Orange County idi tiempo a kaadda ni Kyle sadiay ti nakaala iti AIDS manipud iti panangiyalison iti namulitan a dara. Padpadasen ti ospital nga awagan ti dandani 3,000 nga ubbing tapno masubokda a maipaay iti virus ti AIDS.
Dagdagus nga immawag dagiti dadakkel ni Kyle iti ospital tapno siguraduenda nga isut’ di nayalisonan a dida am-ammo. Iti nabiit pay, immawag ti ospital a mangipasigurado kadakuada nga isut’ saan nga immawat iti aniaman a dara isut’ gapuna a saan nga agpeggad iti pannakaalana iti AIDS. “Pudno a nagparintumengkami ket nagyamankami ken ni Jehova,” inlawlawag dagiti nagannak, “iti panangipaayna kadagiti nalinteg a linlintegna ken ti bileg a nangsalimetmet iti kinatarnaw iti sango ti kasta a pannakasuot.”