Delinkuente sa Nagbalin a Misionero

Agosto 6, 1950 idi. Agtaktakderkam ken nanang idiay Yankee Stadium, Siudad ti Nueva York. Timmabunokami iti internasional a kumbension dagiti Saksi ni Jehova. Saankam pay idi a Saksi ni Jehova. Minatmatak a sisisiddaaw dagiti umariwekwek, a nasurok a sangagasut a ribo iti uneg ken ruar ti estadium, ngem awan agdidinnuron, awan agsasaot’ dakes wenno aglalaban, awan ti agpupungtot. Malagipko ti kinunak ken nanang: “Karkarna daytoy. Dagiti organisasion a nakitak ken dagiti lugar a napanak kadarato adda aglalaban. Nanang, daytoy sigurot’ kinapudno!” Pinetpetanna laeng ti imak sa immisem, ta kabesadonat’ naglabasak a kas pagaammo unay ti maysa nga ina. Palubosandak nga agestoriat’ biit.

Nayanakak idiay Metropolis, bassit nga ili iti igid ti Karayan Ohio idiay umabagatan nga Illinois. Tawen 1930 idi, ket ti Great Depression pinarigatna toy lubong. Siak ti maika-9 kadagiti 11 nga annak. Pinatanordak a kas maysa a Lutheran. No mumalem masansan nga agtugaw ni nanang ket imbasaannak iti Biblia, ket tinagiragsakko dagita nga okasion. Insurona kaniak ti teksto iti Juan 3:16, a kunana: “Ta kasta la unay ti panagayat ti Dios iti lubong nga intedna ti Anakna a bugbugtong, tapno amin a mangalagad pammati kenkuana saan koma a madadael no di ket maaddaan biag nga agnanayon,” ket imbagana a diak koma liplipatan ti panagayat ti Dios kadakatayo. Kadarato malagipko dayta a teksto ket ulit-ulitek no maymaysaak, ngem diak met matarusan no kasanonatay nga inayat ti Dios ken no aniat’ kayuloganna dayta iti biagko. Malagipko ti innak panagsaludsod kadagidiay relihiusot’ kapanunotanda, ket nagdudumat’ sungbatda kaniak, a kas iti: “Inted ti Dios kadatayo dagiti kayo ken sabsabong”; “Ti Dios ikkannatay ti biag”; “Inted ti Dios kadatayo dagiti animal, dagiti napintas a bituen, ken ti tudo a mangpatubo kadagiti mula.” Sakto utoben: ‘Ngem dati met nga adda dagitoyen sakbay pay a naipasngay ni Jesus. Ti teksto inkarinat’ biag nga agnanayon, ngem natay met ti kabsatko a lalaki ken babai.’ Idi inimtuodko dayta, kunada kaniak: “A ket, maragpatmonto dayta inton matayka.” Gapuna, idi ubingak pay, natikawakon ket iti nasapa a panawen napukaw ti interesko iti relihion ken iti Sunday school.

Idi agsangapulot’ tawenkon, delinkuenteakon ket miembroak ti barkada dagiti maton nga ubbing, a no dadduma siak pay ti ulo-uloda. Kanayonak a maisagmak kadagiti polis. No adda kotse ti polis a makita ni tatang a mapan idiay ayanmi, ammona lattan a siak ti damagenda ket kunaenna: “Ayabanyon Robert. Adda man ti polisen.” Nakarot’ sinagaba dagiti dadakkelko gaput’ kinadelinkuentek, ket naynay nga agpakpakaasi ni tatang a baybay-ak koman dagiti barkadak. Nagluksaw unay ket nokuan kunana kaniak: “Adu unayen a sakit ti ulo nga intedmo kadakami ket inlak-ammo payen amin dagiti kakabsatmo, ket maipuon la dayta kadagiti barkadam.” Ngem, karkarna ta nokuan ni Nanang ibagana ken Tatang: “Agbalbaliwto dayta. Kitaem, addanto aldaw nga agbalin a ministro ni Robert.”

Binaliwannak ti Kinapudno a Nagtaud iti Dios

Idi kuan adda napasamak a dakkel unay ti epektona iti biagko. Inrugi ni manangko nga Evelyn ti nakiinnadal iti Biblia kadagiti Saksi ni Jehova idi 1948. Nupay kasta, ti laeng ammok idi maipapan kadagiti Saksi isut’ neutral a takderda kadagiti nasional ken politikal nga isyu. Naannayasak idi iti nasionalismo ket diak kayat a makinamin ni manangko kadagitoy a tattao. Napalalot’ panangbusorko idi kenkuana. Kaskasdi, nabigbigna a kinapudnot’ ad-adalenna ket dinak inkankano. Agingga ita isu ken kaaduan kadagiti annak ken appokona ket simamatalekda nga agserserbi ken Jehova a Dios. Ita agyamanak kenkuana ken iti Dios gaput’ kinasaet ni manangko ta adda maysa nga aldaw a naallingagko ti pagsarsaritaanda iti mangisursuro kenkuana iti Biblia idi nga addaak iti kusina ket naammuak dayta Paraiso a daga nga umayto ken ti posibilidad ti panagbiag nga agnanayon ditoy daga. Nalagipko ti Juan 3:16, ket kunak: ‘Isu daytoy ti ayat ti Dios kadatayo baeten ken Jesus.’ Kalpasan dayta, linawasen nga umimdengak idiay kusina. Idi agangay inawisdakon a makikatugaw kadakuada no agadalda. Gapuna naam-ammok ti naayat, pudno a Dios, a ni Jehova.

Nakiinnadal met dagiti dadakkelko, ket idi immalisda idiay Ypsilanti, Michigan, intuloyda nga inadal ti Biblia sadiay. Di nagbayag, timmiponak kadakuada sadiay. Idi 1950 damok unay a tinabunuan ti kumbension dagiti Saksi ni Jehova, maysa nga internasional a kumbension idiay Yankee Stadium, Siudad ti Nueva York. Daydi nakadomingo a pannakaiparangarang ti pudno nga ayat kinumbinsirnak a dagitoy ti kita ti tattao a kayatko a pakilangenan a sisisinged iti unos ti biagko. Iti daydi a kumbension indedikarkon ti biagko nga agserbi ken Jehova, ti pudno a Dios.

Idi nagawidkamin idiay Michigan manipud kumbension, naragsakankami a nakasarungkar iti Watchtower Bible School of Gilead, eskuelaan a pakasanayan dagiti ministro nga agserbi a misionero kadagiti sabali a daga. Idi, ti eskuelaan ket masarakan iti naimnas a lugar a kasla probinsia idiay asideg ti South Lansing, Nueva York. Iti daydi nga ibibisitami, inkeddengkon ti kalatko nga agbalin a misionero.

Idi Setiembre 10, 1950, nabautisaranak agraman dua pay a sabali iti waig idiay talon. Agtawenak idi ti 19. Nagbaliwen ti pakitimtimpuyogak, ket no masabatko dagiti dati a kakaduak, damagenda no aniat’ napasamak. Dagiti dadduma kunada nga agmauyongak. Ngem, talaga, iti unos ti biagko ita laeng a limpiot’ ulok! Nasdaaw ni tatangko ket napalalot’ ragsakna.

Idi 1951 inkasarko ni Earline Merlau Olson. Nagpaidumat’ kabibiagna kaniak, yantangay pinatanor dagiti dadakkelna a naan-anay a dedikadoda iti Dios. No bakasion ti eskuela kanayon a makiraman iti amin a tiempo a panangaskasaba ket nangnamnama iti inna panangpalawa iti serbisiona a kas misionera.

Panangragpat kadagiti Kalat Nupay Aduan Rigat

Gaput’ takderko iti Nakristianuan a neutralidad, naipasangoak manen kadagiti polis, ket damo unay iti biagko, naibaludak—gapu ta Kristianoak! Daydi aldaw ken rabii a kaaddak iti pagbaludan, nabatad a sinagrapko ti naayat a panangsaluad ti Dios kaniak. Maysa kadagiti preso, a napatak nga isut’ ulo-uloda, imbagana kadagiti dadduma a preso nga adda maangay a pananghuesio ket siak ti husgaranda. Ania itan ti aramidek? Sublianak kadi dagiti aramidko idi delinkuenteak pay laeng wenno agtalekak iti Dios? Immararawak ken Jehova tapno tulongannak nga agkammatalek ket ikkannak koma ti sirib ken kired. Apagapaman inasitgannak ti maysa a preso ket tinulongannak. Imbagana kadakuada nga isu laengen ti husgaranda ket, idi impalikudnak, kinunana: “Lumasatkay nga umuna kaniak sayonto maala.” Nairtengda amin idi iti sumagmamano a kanito. Idi kuan kuna ti ulo-uloda: “Huston. Awan balena dayta.” Nagyamanak iti Dios! Inruarnak ti abogadok iti kabigatanna, ngem ti asunto pimmaut iti tallo a tawen agingga a nalibreak met laeng nga agsoldado gapu ta ministroak.

Idi Mayo 1, 1955, inrugimin ken baketko ti karerami a mangaskasaba iti amin a tiempo, wenno payunir. Dua a tawenkami a nagpayunir iti kongregasion ti Ypsilanti, Michigan. Kalpasanna naawiskami nga agespesial payunir idiay Burlington, Vermont, a nangrugi idi Mayo 1, 1957, ket nangipaayak iti ad-adu pay a tiempo iti panangasaba. Bayat ti dua a tawenmi sadiay, timmulongkami a nangisubli iti kongregasionda. Ti damo a Kingdom Hallmi nagsaad iti mismo a sentro ti ili! Iti Domingo napauluan ti palawag publiko iti “Komunismo wenno Kinakristiano—Ania Kadagita?” Yantangay impangtada a lapdan ti mitingmi, napanko dinamag idiay polis no mabalinmi a namnamaen ti pannalaknibda no kasapulan. Impanamnamada nga isudat’ makaammo. Agarup 20 minutos sakbay ti miting, adda kotse a napnot’ lallaki a nagparada iti sanguanan ti Kingdom Hall. Kalpasan ti sumagmamano a minuto simmangpet dagiti polis ket kinasaritada dagiti lallaki, agingga a nagtalawda. Natalna ken adut’ timmabuno iti mitingmi.

Misionerokam Met Laengen!

Inawisnakami ti Watchtower Society a kas miembro ti pamilia ti hedkuarter idiay Siudad ti Nueva York, a mangrugi iti Mayo 1, 1959. Idi agrubrubuatkamin, simmangpet ti sabali pay a surat nga aw-awisendakami nga ageskuela idiay Gilead School tapno masanaykam a kas misionero, a mangrugi iti Setiembre 1959. Dua a grande a bendision iti maymaysa a tawen! Itan, makitkitamin ti kalatmi a kas misionero. Nagtultuloy a limmawa ti sagrado a panagserbimi!

Idi Pebrero 1960, kalpasan ti dandani innem a bulan a panageskuela ken pannakasanaymi, nagraduarkami iti maika-34 a klase ti Gilead. Naibaonkami idiay Bogotá, Colombia, ket simmangpetkam sadiay idi Marso 1, 1960.

Ti immuna a karit a sinangomi isut’ panagsursuro iti Español. Nagkakatawaanda unay no mapagsisinnukatko dagiti termino. Malagipko idi nagserbiak iti Rooming Department idi damomit’ nakikumbension distrito ket imbagak kadagiti kakabsat a bumulodak kadagiti kudson (colchones), ngem cochinos (baboy) ti sao a nausarko. Siaanusda nga insaludsod: “Ananuem ngamin?” Kinunak: “Pagiddaan dagiti kakabsat.” Kalpasan ti panagpapaggaakda, inyawatda dagiti kudson.

Bayat a tinagiragsakmi dagiti parsuat’ Dios nga adda kadagiti natural a kinaimnas ti natan-ok a natampokan-yelo nga Andes, dagiti kabakiran, ken tanap, aduankami kadagiti di malipatan a kapadasan. Ti maysa isu idi binisitami dagiti espesial payunir idiay Villavicencio, nga isut’ pangrugian dagiti llanos (tanap). Idiay ili ti San Martín, kinaduami dagiti Saksi a naggaput’ Granada. Daytoy ti damo a pannakangngeg dagiti taga San Martín iti mensahet’ Pagarian. Idi makisarsarita ni baketko iti maysa a babai a bumalay, adda barito nga immasideg kenkuana a nangdamag no aniat’ ar-aramidenna. Idi inlawlawag ni baketko, isu ket pimmanaw ngem nagsubli a kunana nga adda parokiano idiay parmasia iti ballasiw ti kalsada a kayatna ti makisao ken baketko. Dimngeg a siraragsak daytoy a lalaki iti mensahe ket innalana amin a literatura nga awitna. Idi intukon ni baketko ti isasangpet ti Pagwanawanan ken Agriingkayo! a magasin babaen iti koreo, kinuna ti lalaki: “Nasulinek unay ti ayanko ket saan a dumanun ti koreo sadiay. Kapilitan nga umayko alaen ti koreo ditoy San Martín, ket maminsan lat’ makatawen nga umayak mangala ti abastok.” Naiturturong, nga iti daydi a tawen naiparnat’ ibibisitami ti yaayna.

Tinagiragsakmi unay nga imburay ti kinapudno ti Saot’ Dios kadagiti taga Colombia iti unos ti 16 a tawen, a nagbiahekami kadagiti amin a kitat’ lugan: piragua (bilog), eroplano, bus, kotse, kabalio, ken asno. Amin a napananmi, nakabirukkami kadagiti mannakigayyem nga umili a siraragsak a dimngeg iti kinapudnot’ Biblia ket naam-ammoda ken pudno a natarusanda ti ayat ni Jehova ken ti ay-ayatenna nga Anakna.

Nasagraduan a Panagserbi Manen ditoy Estados Unidos

Idi 1976, gapu kadagiti personal a responsabilidad, nagsublikami ditoy Estados Unidos, ket intuloymi ti nasagraduan a panagserbimi kas payunir. Ket, idi 1980, nabaelak ti bimmisita kadagiti adu a kongregasion iti sirkito bilang agbambaniaga a manangaywan. Iti kasta, naibaonak nga agserbi kadagiti Español ti pagsasaoda. Nagragsakanmit’ makipagtrabaho kadagiti nabara, naayat, a naespirituan a kakabsat kadagiti sirkito nga adda kadagiti nadumaduma a paspaset iti Estados Unidos.

Idi ubingak pay imbaga ni nanang kaniak: “Dimo pulos liplipatan ti ayat ti Dios!” Agyamanak ken Jehova ta tinulongannak, baeten ti naindagaan nga organisasionna, tapno maawatak ti ayatna ken ti kaipapananna dayta iti sangatauan, agraman panangbalbaliwna kaniak, baeten iti Sao ken espirituna, a kas ubing a delinkuente nagbalinak a tao a nakaay-ayo kenkuana a maipaay iti nasagraduan a panagserbi. Imbukboknat’ pamendisionna, nga isut’ gapu a naragpatko dagiti kalat nga impasdekko bayat iti panagbiagko. Gapu kadagiti nabuslon a pribilehiomi iti nasagraduan a panagserbi iti Dios ken biag nga aglaplapusanan iti ragsak, ni baketko ken siak agyamankam ken Jehova, ken iti Anakna ken iti matalek nga organisasionna.—Kas sinarita ni Robert D. Reed.

[Ladawan iti panid 17]

Da Robert ken Earline Reed

[Ladawan iti panid 18]]

Aldaw a panaglaba ti asawak, ni Earline, idiay Colombia