Manipud Managbasatayo

Kalintegan dagiti Nagannak Kas maysa a doktor, kayatko nga iyebkas dagiti rikriknak maipapan iti artikulo a “Pinadas dagiti Dodoktor nga Ipanaw ti Anakmi.” (Oktubre 22, 1989) Daytoy nga artikulo ti mangpakaro laeng iti di pagkinnaawatan ken mamataud iti panangsaranget.

Kadagiti dadduma a kaso ti dara laeng ti nainkalintegan ken maitutop a pangagas, ket ti maysa a doktor [idiay Francia] ket legal ken maitunos iti naimbag a kababalin a mapilit a mangipaay iti dayta. Dagiti Saksi ngarud saanda koma a masaktan no ti maysa a doktor (1) (mangala iti maysa a bilin ti korte maipaay iti panangagas iti dara wenno (2) pilienna a saan nga agasan a pulos ti pasiente. Dagiti dodoktor dawatenda nga awaten dagiti Saksi ni Jehova ti pagbanagan ti pilida; a saanda nga ikabil ti bagbagida kas martir no di ket pagbalinenda ti takderda a nalawag. Kas pangarigan: “Diak kayat nga awaten ti dara agsipud ta kayatko a tungpalen ti linteg ti Dios (saan a gapu ta mabutengak iti AIDS wenno hepatitis).” Dawaten dagiti dodoktor nga agtignayda iti maitunos ken mapagtalkan a pamay-an ket dida padasenda nga ikalintegan ti pagimbagan ken pagdaksanna.

J. L. P., M.D., Francia

Apresiaren dagiti Saksi ni Jehova ti kinagaget ken dedikasion dagiti dodoktor. Ikagkagumaanmi ti makitinnulong kadakuada ket dawatenmi laeng a raemenda ti naibatay-Biblia a pangngeddengmi nga ‘umadayo iti dara.’ (Aramid 15:29) Nakasagana dagiti Saksi ni Jehova a mangsaranget iti pagbanagan daytoy a relihiuso a takderda. Nupay kasta, naipasdeken a naimbag a ti panangyalison iti dara mangawitda kadagiti adu a makapapatay a peggad, ket addada dagiti dadduma a pamusposan ti panangagas nga usaren ti mangngagas a saan a mangisarang iti maysa kadagidiay a peggad. No madi ti doktor a makitinnulong iti daytoy a pamay-an, rebbeng nga ilawlawagna daytoy iti pasientena. Iti kaso a masupsuppiat, ti doktor immanamong a raemenna ti pagayatan ti pasientena ngem kalpasanna di nagtungpal. Marikna ngarud dagiti nagannak a masapul nga agtignayda. Nupay kasta, ti artikulo dina pinaregta dagiti nagannak a saanda a mangipaay iti medikal a pannakaaywan. Imbes ketdi, dayta nagserbi a mangparegta kadagiti nagannak nga “agbalin nga ad-adda nga espisipiko iti panangimtuod iti doktorda no ania ti aramidenna iti sidong dagiti espisipiko a kasasaad.” Babaen iti panangipakita a masansan nga addada epektibo nga awanan-dara a panangagas, nagserbi met ti artikulo a mangipaganetget a ti panangiparit ti Biblia a mangipastrek iti dara ket nainkalintegan, uray pay iti medikal a panangmatmat.—ED.

Karera a Panagmodelo Inapresiarko ti artikulo nga “Agimtuod dagiti Agtutubo . . . Ti Ngay Karera a Kinamodelo ken Salip ti Kinapintas?” (Enero 8, 1990) Pudno a daytoy ti nangipakita kaniak kadagiti pakatnagan a nairaman. Itan mabigbigkon a nupay no napintaska iti pisikal wenno saan, napatpateg ti naespirituan a kinapintastayo.

S. W., Inglatera

Dagiti Kumbension ti Poland Naimpusuan ti panagyamanko iti panangipanyo kaniak (babaen iti isipko) kadagiti kumbension idiay Poland. (Disiembre 22, 1989) Bayat ti panangbasak iti artikulo, nagarubos dagiti luluak iti rupak. No dadduma dagiti pakadanagan iti biag ti mangpukaw kadatayo iti naindaklan nga ayat ni Jehova. Anian a naindaklan ti pannakakita iti kasta nga ayat a naipakita iti ummong dagiti pudno a Kristiano!

K. D., Estados Unidos

Nasukir nga Annak Agyamanak iti kasta unay iti artikulo nga “Agimtuod dagiti Agtutubo . . . Kasano a Maaramidda Dayta Kaniak?” (Nobiembre 8, 1989) Siak addaanak met iti in-inauna a kabsat a lalaki a nangpanaw iti organisasion ni Jehova. Namin-anon a daras a pampanunotek ti sakit ti nakem ken rigat nga impaay daytoy kadagiti dadakkelko, agraman kaniak. Makaparegta unay ti artikuloyo kaniak. Itan mabigbigkon a nupay no adda nagbiddutan dagiti dadakkelko, ti kabsatko a lalaki dina impangag ti panangsanayda.

L. R., Estados Unidos

Panagamak Indulinko ti maysa a kopia maipapan iti nakasaysayaat nga artikulo maipapan iti panagamak (Pebrero 8, 1987) iti nalaka a magaw-at a lugar. Inibturak ti atake ti panagammangaw iti adu a tawtawen. Ngem kankanayon a maparegtaak nga itultuloyko ti agibtur no kanayon a basaek dagiti parapo a mangisalaysay iti panagtultuloy nga agkararag ken Jehova.

M. B., Estados Unidos