Manipud Managbasatayo
Kolor Agyamanak iti artikulo a “Nayonanyo ti Kolor ti Biagyo.” (Oktubre 8, 1990) Nagsayaatan ti naipaay a panangiwanwan ket tinulongannak iti kasta unay iti panagpilik iti kawesko. Marigatanak a mangiparis kadagiti kolor, ket agannayasak laeng a mangisuot iti nangisit ken puraw. Itan naiduman dagiti bambanag!
D. M. D., Brazil
Resistensia Agsuratak gaput’ panangapresiarko kadagiti artikuloyo maipapan iti resistensia. (Nobiembre 22, 1990) Nagadalak iti immunology sumagmamano a tiempon ti napalabas kas paset iti kasapulak iti graduate studies. Anian ti panagtarigagayko a ti propesorko nalawag koma ti panangilawlawagna a kas kadakayo. Pudno a makalawlawag a kurso! Agyamanak iti panangilawlawagyo iti immunology iti sumagmamano nga ababa a sasao.
O. O. O., Estados Unidos
Kayatko laeng ti mangpadayaw kadakayo iti kasayaatan a sientipiko nga artikulo a nabasak pay laeng maipapan iti resistensia. Nangnangruna a tinagiragsakko ti “Naespirituan a Resistensia Agtungpal iti Moral a Pannakadadael.” Anian a pannakaawat!
R. K., Estados Unidos
Trabaho Kalpasan ti Panageskuela Ti edadko ket 17 años ket maragsakanak nga umawat iti artikulo nga “Agimtuod dagiti Agtutubo . . . Ti Kadi Panggedan Kalpasan ti Eskuela Tulongannak nga Agmataengan?” (Nobiembre 22, 1990) Nangalaak iti trabaho bayat ti bakasion iti kalgaw itoy a tawen, ta kayatko ti makasursuro iti lubong dagiti nataengan. Masapul a makilangenak iti napalangguad nga amo, di makaay-ayo a parparikut kadagiti katrabahuan, ken dadduma pay. No nabasak koma a nasaksakbay daytoy nga artikulo, pagarupek a pinilik koma ti panagsuro maipapan iti biag iti nalaklaka a pamay-an. Maragsakanak unay ta maawatanyo dagiti kasapulan dagiti agtutubo.
T. F., Japan
Saksakit iti Pannangan Bayat iti pito a tawen nakidangadangak iti bulimia. Imbagak ken nanang, ket kinunana a daytat’ maysa laeng a paset ti biag a madakkelakto. Innem a bulan kalpasanna diak met nadakkelan dayta. Gapuna nagipudnoak iti dua a Kristiano a babbai, ket kankanayon a sipsiputandak. Namnaminsan laeng a nagsubliak nanipud idin. Ti kaadda dagiti dadduma a tattao a mangsuportar ket dakkel a tulong, ngem ti pudno a pakatignayan isu ti panagbuteng a mangupay iti Gayyemko, ni Jehova. Nagbasaakon kadagiti adu a libro maipapan iti tema, ngem dagiti artikuloyo (Disiembre 22, 1990) ti kalalawagan ket tinamingna a direkta ti sakit.
E. S., Estados Unidos
Idi 13 añosakon, napataudkon ti ugali a mangan ken mangisarwa iti dayta. Iti nakurkurang a maysa nga oras, kanek ti normal a mangbussog iti sangapulo a tattao. Babaen iti tulong ti maysa a propesional a manangbalakad a paglainganna dagiti saksakit iti pannangan, nagbalbaliwak. Itan maysaakon a nabautisaran a Saksi ni Jehova. Agyamanak iti kasta unay iti panangipaayyo kadakami kadagita a nagsayaatan ti pannakasirarakna ken natimbeng nga artikulo maipapan kadagita a komplikado a parparikut.
N. I., Japan
Sangalubongan a Panagkakabsat Iti pangrugian ti Nobiembre, dinawat ti mannursurok a mangisuratkami iti maysa a salaysay maipapan iti tema a “Masapul aya a maipato ti maysa a sibilisasion a natantan-ok ngem iti sabali?” Dagiti artikulo maipapan iti sangalubongan a panagkakabsat (Disiembre 8, 1990) apag-isu ti idadatengda! Dinamag ti mannursurok no sadino ti nangalaak iti impormasion, ket intedko kenkuana dagiti artikulo ti Agriingkayo! Nakagun-odak ti iskor a 18 puntos (iti 20) maipaay itoy a salaysay!
L. Q., Francia
Glaucoma Immaynak binisita ti katugangak a babai ket imbagana kaniak a makakitkita iti asul ken duyaw a kolor ken ti nagtimbukel iti ruprupa dagiti tattao. Sinapulko ti artikulo a “Glaucoma—Traidor a Mannanakaw ti Panagkita!” (Mayo 8, 1988) Gapu itoy nga impormasion, naaramid ti nasapa a pannakaresita, ket dandanin maagasan ti katugangak a babai. Anian a panagyamanko iti Agriingkayo!
G. S., Inglatera