Manipud Managbasatayo

Dagiti Trabaho Kalpasan Panageskuela Pudno a tinagiragsakko dagiti artikulo maipapan iti trabaho kalpasan ti panageskuela. (Nobiembre 22 ken Disiembre 8, 1990) Nupay diak pay nakasagana nga agtrabaho, dagiti artikuloyo impakitada ti kinapateg ti mangsalimetmet iti kuarta maipaay iti masanguanan. Tinulongandak met a makakita a no makagun-odak iti trabaho, kasapulak ti eskediol a mangiraman iti tiempo a maipaay kadagiti naespirituan nga ar-aramid. Laglagipekto dagitoy nga artikulo iti masanguanan.

J. S., Estados Unidos

Ti kalatko ket agbalin a maysa a payunir [amin-tiempo nga ebanghelisador]. Pampanunotek no umuna pay a mangalaak iti trabaho ket agurnongak ti kuarta. Tinulongandak dagiti artikulo a makakita a ti panangaramid iti kasta ti mamagbalin kaniak a matnag iti materialismo. Gapuna inkeddengko ti agtrabaho—agtrabaho iti panangibangon iti naespirituan a pamuonko—tapno agbalinak a nalaing ken sisasagana a maipaay iti serbisio a kinapayunir.

G. J., Estados Unidos

Dagiti Rain Forests Dagiti artikuloyo maipapan iti rain forests (Marso 22, 1990) ket adda iti nakatantan-ok a sientipiko a tukad. Tunggal maysa ammona a ti aglawlaw ket madaddadaelen ket masapul nga adda maaramid. Ngem kas maysa a koresponsal ti diario ditoy Poland, pampanunotek no asinot’ maaddaan iti tured nga agsurat maipapan kadagiti kangrunaan a rason iti pannakaliway ti aglawlaw. Dakayo dagiti immuna a nangaramid iti kasta babaen ti panangitudoyo iti panagimbubukodan ken ti panagtarigagay iti ganansia kas dagiti pudpudno a rason. Nagsayaatan!

W. S., Poland

Nadara a Pelikula Maysa a pelikula a kayatko a buyaen, Die Hard 2, ket nadakamat iti damdamag iti “Panangmatmat iti Lubong” a “Nadara a Pelikula.” (Disiembre 22, 1990) Nakisaritaak payen kadagiti gagayyemko maipapan iti panangbuyami iti dayta. Ngem idi nabasak daytoy a damag, inkeddengko a ti panangbuya itoy a pelikula ket kas iti panangbuya iti sine a horor ket inkeddengkon a di buyaen. Kinapudnona, kayatko pay laeng ti mapan, ngem gapu iti bukodko a naespirituan nga irarang-ay, diak agbuya.

M. T., Japan

Arsisio Agyamanak iti kasta unay kadagiti artikulo a “Ti Maaramid ti Arsisio Kadakayo.” (Oktubre 22, 1990) Tunggal adda pisikal nga edukasionmi idiay eskuelaan, masapul nga agtaraykami iti maysa a milia, ket kankanayon a kagurak dayta! Impakita ti artikuloyo a pudno a magunggonaan ti arsisio dagiti tattao.

L. B. D., Estados Unidos

Agyamanak iti artikuloyo. Idi Setiembre, gapu iti regular a programa ti arsisio, nakasardengakon nga agag-agas maipaay iti alta presion. Kalpasan ti siam a lawas a pannakaimbagko iti minitrampoline, imbagak iti doktorko a padasek nga isardeng ti panagagasko. Insuronak no kasano nga in-inotek a kissayan ti tomarek. Itan normalen ti presionko, maragsakanak, ket ti asawak maim-imbaganen a padpadasenna nga ibaba met ti presionna!

G. Y., Estados Unidos

Masapul a bigbigen koma dagiti managbasa a no addaanda iti nakaro a parikut iti salun-at, wenno no natataengandan, nainsiriban ti panangkonsulta iti kualipikado a mangngagas sakbay a rugian ti makabannog a programa ti arsisio. Ti panangkonsulta iti kasta a mangngagas ket nainsiriban met no mangaramid iti aniaman a pangngeddeng maipapan kadagiti mairesita nga ag-agas.—ED.

Panagbakasion iti Pagtaengan Ti artukuloyo nga “Apay Di Padasen ti Agbakasion Idiay Pagtaengan?” (Hunio 22, 1990) isingasingna ti panagkolekta kadagiti atap a sabsabong. Nupay ar-aramidek dayta kadagiti napalabas a tawtawen, nanipud idin naammuak ti paglintegan iti ruar: ‘Dikay mangala iti aniaman malaksid kadagiti retrato; awan ibatiyo nga aniaman malaksid kadagiti tugot.’ Iti pagnanaedak pananglabsing ti linteg ti agpuros kadagiti sabsabong. Ngem ti nagsayaatan ti pannakaiparangna, nasayaat ti pannakaipukosna a retrato iti atap a sabong mabalin a tagiragsaken iti adu a tawtawen!

W. K., Estados Unidos

Ti panangala iti retrato ket pudno a praktikal a pamay-an iti panangtagiragsak iti naturalesa kadagiti lugar a sadiay ti panangpuros ti sabsabong, wenno dagiti umasping nga ar-aramid, ket maibusor iti linteg wenno mabalin a makapataud iti pannakadadael ti ekolohia. Pagyamanan iti singasingyo.—ED.