Manipud Managbasatayo

Panangpasagid Inapresiarko ti artikuloyo nga “Agimtuod dagiti Agtutubo . . . Aniat’ Pagdaksan ti Panangpasagid?” (Setiembre 22, 1991) Daytoy ti maysa a banag a nakabasolak iti adun a tawtawen. Iti kaaduanna aramidek daytoy iti nasikap a pamay-an, ngem no lagipek makitak a daytoy ket maysa met a kita iti panangidepensa iti bagi, a pangabbong iti nabayagen a rikrikna iti panangipababa iti bagi. Nupay kasta, gaput’ nabasakon ti artikulo, panggepko nga ikkaten daytoy dakes ken no dadduma makadangran nga ugali.

C. T., Inglatera

Panangipangag ti Pakdaar ti Bagi Idi napan a tawen naospitalak iti tallo a bulan gapu iti sakit ti matris. Iti adu a tawtawen adda dagiti pakdaar a pagilasinan, ngem diak inkankano. Kamaudiananna napanak iti ospital ket naammuak a kasapulan ti dagus nga operasion. No nabasak koma ti artikuloyo a “Panangipangag ti Pakdaar ti Bagi” idin, mabalin a naaddaanak iti tured a napan iti doktor a nasapsapa.

M. U., Japan

Air Conditioning Ti artikulo a “Kasapulanyo Kadi ti Air-Conditioning?” (Hunio 22, 1991) inawisnak, ta nagtrabahoak kadagiti pagtarimaanan kadagiti air conditioner iti nasurok a 35 a tawen. Idi 1950’s, idi ad-adalek pay ti trabahok, masapul nga adalenmi ti topiko a Btu’s iti sumagmamano nga aldaw. Inlawlawagyo daytoy a banag iti nakasimsimple ken maawatan a pamay-an iti maysa laeng a parapo! Tinarigagayak nga adda koma daytoy nga artikulo idin.

A. D., Estados Unidos

Supiat iti Dara Kabasbasak ti artikuloyo maipapan ken ni Wyndham Cook, a napauluan iti “Ita a Rabii Mataykan.” (Agosto 22, 1991) Awan pay ti artikulo a nangpaladingit kaniak a kas itoy. Ikarkararagko nga aywananto ni Jehova dagiti dadakkelna ken sapay koma ta datay amin surotentayo ti natibker nga ulidan iti pammati nga impaay daytoy nga agtutubo a lalaki.

J. T., Estados Unidos

Kas maysa a 15-años, makaparegta a maammuan a dagiti agtutubo a Kristiano nangipakitada iti kasta a debosion iti Dios. Nakaluaak a nakabasa iti nagsayaatan a pannakidangadang ni Wyndham Cook iti pammati. Ikarkararagko nga iti umasping a kasasaad, mapaneknekanak a kasta ti kinamatalekna.

D. L., Estados Unidos

Wara Agyamanak iti artikulo a “No di Matengngel dagiti Wara.” (Agosto 8, 1991) Makidangdangadangakon iti daytoy iti kaaduan iti 44 a tawen ti panagbiagko, ket mabalin nga usarek ti aniaman a tulong a magun-odak. Pagyamanan iti praktikal unay a singasing.

C. R., Estados Unidos

Binasa ti asawak ti artikulo nga immuna ket impamatmatna a ti balaymi ket nawara! Kalkalpasmi pay laeng ti naan-anay a panadalus ket pagarupek a saan a simmayaat ti itsura ti pagtaenganmi. Kalpasanna sigagagar a binasak ti artikulo. Anian ti panagkatawak idi nabigbigko ti pudno a kasasaad ti pagtaengak! Ti artikuloyo tinulongannak a mangikkat kadagiti adu a wara. Agyamanak.

S. C., Estados Unidos

Kinaawan Trabaho Kayatko ti agyaman kadakayo iti naimpusuan gapu iti serie dagiti artikulo maipapan iti “No Kasano a Mapagballigian ti Pannakapukaw ti Trabaho.” (Agosto 8, 1991) Makatawenen ti napalabas kellaat a napukaw ti asawak ti trabahona ket saan pay a nagballigi a makagun-od iti maysa a kas iti dayta. Daytoy ket pudno a karit kadakami. Agyamankami iti kankanayon a panangipaayyo kadakami iti makaliwliwa a sao.

R. S., Brazil

Internasional a Konstruksion Maragsakankami a makaawat iti artikulo a “Basta Aramidem Dayta.” (Abril 22, 1991) Simmangpet dayta maysa laeng a lawas sakbay ti ipapanawmi nga agasawa tapno agserbi kas boluntario iti maysa a proyekto ti konstruksion iti Watch Tower idiay Colombia, Sud America. Ti artikulo ‘impakitana nga immun-una’ kadakami no ania ti inanamaenmi. Nakaipaimakami met ti adu a kopia kadagiti pamilia, empleado, interesado, ken kadagiti estudiante ti Biblia sakbay ti ipapanawmi. Tinulonganna ida a maaddaan iti nasaysayaat a pannakaawat iti trabaho isu a pribilehiomi a pakiramanan.

T. G., Estados Unidos