Manipud Managbasatayo

Tulong Agpaay iti Dandanin Matay Agyamanak kadagiti artikuloyo maipapan iti “Tulong Agpaay iti Dandanin Matay.” (Oktubre 22, 1991) Adda tumor ti utek ti kabsatko ket imbaga ti doktor kadakami a mabalinda a pawatiwaten ti biagna [babaen iti di kadawyan a panangagas] wenno bay-an laengen nga agtuloy ti sakit. Narigat dayta a pangngeddeng, ngem kamaudiananna pinilimi ti naudi. Kalpasan ti ipapatayna, nupay kasta, nangrugin a nariknak a nakabasolak. Nabang-aranak ngarud kalpasan a nabasak dagiti artikulo. Agyamanak iti kasta unay iti panangipaayyo ti liwliwa ken tulong kadakami iti umiso a tiempo!

A. L. M. A., Brazil

Pampamilia Agbalin a Nasinged Kayatmi laeng nga iyebkas ti panangapresiarmi iti nagpintas pannakaisuratna a serie a “Pampamilia—Agbalin a Nasinged Sakbay a Naladawen.” (Setiembre 22, 1991) Gaput’ nabiit pay a nagbalinkami a nagannak ti maysa a nakaay-ayat nga ubing a lalaki, tinagiragsakmi ti personal a komento maipapan iti panangpadakkel ti anak nga insalaysay dagiti nagannak iti aglawlaw ti lubong. Inanamaenmi ken ikarkararagmi a mapadakkelminto met ti baromi “iti disiplina ken panangiturong-panunot ni Jehova.”—Efeso 6:4.

R. S. ken J. L. S., Estados Unidos

Iti sumagmamano a tiempon, tartarigagayak nga iyebkas ti kasta unay a panangapresiarko kadagiti artikuloyo. Ngem kalpasan a nabasak ti bilang maipapan iti panangpabileg iti kinasinged ti pamilia, masapul nga agsuratakon tapno agyamanak kadakayo. Nagpasngayak sumagmamano a bulanen ti napalabas, ket ti asawak ken siak ikagumaanminto nga iyaplikar dagitoy a singasing.

S. D., Italia

Panagbasa Agtutuboak ket tagtagiragsakek unay ti agbasa. Nupay kasta, diak unay maawatan ti basaek, ket masansan a labsak dagiti naririgat a sasao. Ti artikulo nga “Agbasa Tapno Palawaen ti Pannakaammoyo” (Hulio 22, 1991) tinulongannak a rumang-ay iti daytoy a banag.

A. R. B., Brazil

Iti adu a tawtawen pinadasko a basaen dagiti amin a bilang iti Ti Pagwanawanan ken Agriingkayo! ngem diak nagballigi, nupay adda eskediolko a nairaman a mangbasa kadakuada. Ti artikuloyo tinulongannak a makabigbig a ti parikutko ket nakapuy nga ugali nga agbasa. Apresiarek dagiti singasing maipapan iti panangparang-ay iti panagbasak.

A. K. F. M., Brazil

Dagiti Ospital Palubosandak a mangipaay iti komento iti serie a “Dagiti Ospital—Kasanoyo a Sanguen?” (Marso 8, 1991) Idi napan a tawen naospitalak iti naminpat a daras. Mariknak nga awan gawayko ken awanan salaknib. No agimtuodak maipapan iti kasasaadko, ti pamay-an ti pannakaagasko, ken dagiti dakes nga epekto dagiti agas, ibilang dagiti doktor dayta a sekreto. Kunaenda pay, ‘Saan a masapul nga addaka ditoy. Agawidkan.’

R. A., Czechoslovakia

Ti panangpanunot iti kalintegan ti pasiente ket saan a sapasap a maawat, nupay dagita a kalintegan makagunggun-oddan iti pannakabigbig. Dagiti Hospital Liaison Committee nga imatmatonan dagiti Saksi ni Jehova nagballigidan a nanggun-od iti pannakitinnulong dagiti doktor. Ngem kadagiti lugar a sadiay ti kalintegan ti pasiente saan pay a maraem, mabalin a pasayaaten dagiti indibidual ti kasasaadda babaen iti panangsukayda iti mannakitulong, mannakaawat a relasion iti mangngagasda sakbay a mapasamak ti pannakaospital. Kanayon a nainsiriban para iti maysa a Kristiano ti makilangen kadagiti kameng iti ospital iti naasi ken nadayaw a pamay-an.—ED.

Panangliklik iti Pannakariribuk Inapresiarko ti artikulo nga “Agimtuod dagiti Agtutubo . . . Kasanot’ Aramidek Tapno Baybay-annak nga Agmaymaysa?” (Mayo 22, 1991) Nupay naipablaak ti artikulo a maipaay a nangnangruna kadagiti babbai, dakami a lallaki makasursurokami iti dayta. Itay nabiit sinarangetko ti umasping a parikut manipud iti maysa a babai a nanggargari kaniak a mangirisgo iti pannakipagayamko iti Dios! Ti artikuloyo dimteng iti umiso a tiempo ket tinulongannak a mangtaming iti kasasaad.

E. K. O., Ghana

Kitaenyo ti Oktubre 8, 1991, a bilang maipaay iti espesipiko a singasing a naiturong kadagiti lallaki a maipaspasango kadagita a kasasaad.—ED.