Negatibo a Rikrikna—Maparukmayo Kadi Ida?
“NIKAANOMAN! Nakabilbileg dagiti negatibo a rikna. Awan maaramidak no di ibturan ida agingga a mapalabesda.”
Kastat’ panagtignay dagiti adu iti panggep a mangparukma kadagiti rikna a kas iti panagdanag, buteng, pungtot, pannakapaay, basol, panangaasi iti bagi, ken panagleddaang. Ngem dagidiay a rikna mabalin a parukmaen. Imbes a sumukokayo kadakuada no rumsuada, masursuroyo a parukmaen ida, nalabit pukawen pay ida.
Siempre, adda dakkel a nagdumaan ti gagangay a negatibo a rikrikna a mapadpadasan ti tunggal maysa ken ti nakaro a panagleddaang. Ti naud-udi mabalin a kasapulanna ti panangagas ti propesional. Ti immuna dina kasapulan, ket dagitoy dagiti rikna a masursurotayo a parmeken.
Kinapudnona, saan nga amin a negatibo a rikna ket makadangran. Kas pangarigan, no makaaramidkayo ti serioso a biddut, mabalin nga agrurodkayo a maitutop iti biddut. No tignayennakayo daytoy a mangkorehir iti dayta ken mangliklik iti dikay panangulit iti dayta iti masanguanan, ngarud ti rikna addaan napaut a positibo nga epekto. Wenno ti gagangay a pannakaseknanyo maipapan iti maysa a parikut mabalin a tignayennakayo a mangtaming iti dayta a sipapasnek ken sapulen ti nainkalintegan a solusion. Dayta ket nagsayaatan met a panagtignay.
Nupay kasta, no ngay inaramidyon ti inggat’ kabaelanyo a mangkorehir iti biddut, ngem kaskasdi a mariknayo ti biddut wenno kinaawan ti mamaayna, a nalabit agpaut kalpasanna? Wenno ania ngay no kalpasan ti panangrisutyo iti parikut agingga iti kabaelanyo, agtalinaed ti panagdanagyo ket kumarkaro pay? Ngarud pagbalinennakayo a nakakaasi. Kasano, ngarud, a maparukmayo dagidiay a rikna? Ti sekreto mabalin a masarakan iti panangtengngel ti panagpampanunottayo.
Matengngeltayo ti Panagpampanunottayo
Adu nga agtartrabaho iti tay-ak ti mental a salun-at ti agkuna a dagiti riknatayo ket patauden dagiti pampanunottayo. Kas pangarigan, itudo ni Dr. Wayne W. Dyer: “Awan ti mariknam no dika umuna nga agpanunot.” Kunaen pay ni Dr. David D. Burns: “Tunggal dakes a rikna ket resulta iti tiritir a negatibo a pampanunot.”
Makapainteres, ipabiang met ti Biblia ti adu kadagiti riknatayo kadagiti pampanunotentayo, gapuna ipaganetgetna a masapul a tenglentayo ti pampanunottayo. Paliiwenyo dagiti sumaganad a bersikulo:
“Amin nga al-aldaw ti naparigat dakesda; ngem ti siraragsak ti pusona kankanayon a daya kenkuana.”—Proverbio 15:15.
“Ket dikay umabuloy itoy lubong no di ket agbalbaliwkayo, gapu iti pannakapabaro ti isipyo; tapno mapaneknekanyo no ania ti nasayaat, makaay-ayo ken naan-anay a pagayatan ti Dios.”—Roma 12:2.
“Kayawanmi amin a panunot tapno agtulnogda ken Kristo.”—2 Corinto 10:5.
“Ikkatenyo koma ti maipapan iti napalabas a panagbiagyo . . . ; mapabarokay koma iti espiritu ti isipyo, ket makawesankay koma iti baro a kinatao a naparsua a maitunos iti pagayatan ti Dios iti pudno a kinalinteg ken kinasungdo.”—Efeso 4:22-24.
“Dagiti aniaman a bambanag a napudno, dagiti aniaman a bambanag a nasken, dagiti aniaman a bambanag a nalinteg, dagiti aniaman a bambanag a nadalus, dagiti aniaman a bambanag a makaay-ayo, dagiti aniaman a bambanag a naimbag ti damagda, no adda aniaman a kinasingpet ken no adda aniaman a kinadayaw, itultuloyyo a pampanunoten dagitoy a bambanag.”—Filipos 4:8.
“Panunotenyo dagiti bambanag sadi ngato, saan a dagiti bambanag ditoy daga.”—Colosas 3:2.
Yantangay dagiti riknayo ket nangnangruna a maigapu iti panagpampanunotyo, ti sekreto iti panangparukma kadagiti negatibo a rikna isut’ panangtengngel kadagiti panunot a mangpatpatalged kadakuada. Babaen iti umdas a panangikagumaan ken tiempo, masursuroyo a tenglen nga ad-adda ti panagpampanunotyo. Ngarud nainkalintegan a maaramidyo met ti kasta kadagiti riknayo.
Pudno, nalaka laeng a sawen a maparukmatayo dagiti negatibo a riknatayo. Ngem pudno a sabali a banag ti panangaramid iti dayta. Kasano, ngarud, a makapagballigitayo kadagitoy a rikna a mabalin a mangparparigat iti kasta unay kadatayo?
[Blurb iti panid 4]
Saan a makadangran dagiti amin a negatibo a rikrikna