Nasaysayaat Ngem Panangited iti Krismas

“IMBAGA kaniak ti innem-tawenna a ni Christopher, a kasla dayta ti gagangay unay a banag iti lubong, nga ‘awan a pulos’ ti magungun-odanna iti Krismas. Ngem isut’ pulos a saan a maupay. Ni Alexander (8) inyebkasna ti kasta met laeng, a kunkunana: ‘Saksikami ni Jehova.’”

Kastat’ panangrugi ti diario nga Aleman a Kölner Stadt-Anzeiger iti maysa nga artikulo maipapan iti maysa a pamilia a kunaen ti diario a “di mangikankano iti Krismas agsipud ta saan a dayta ti petsa ti pannakaiyanak ni Jesus ken daytat’ pagano ti nagtaudanna.” Ngem saan kadi a nakakaasi da Christopher ken ni Alexander? Nikaanoman, yantangay, kas intudo ti artikulo, ipakita dagiti estante ti ay-ayamda a di binaybay-an dagiti nagannak dagiti ubbing a lallaki.

Nupay kasta, dadduma a nagannak a tumabtabuno iti panagsasarita dagiti nagannak-mamaestro idiay makin-abagatan nga Alemania ibagada a ti di panangited dagiti Saksi ni Jehova kadagiti sagut iti Krismas kadagiti annakda ket mangiparikna kadakuada a kasda la pimpiman. Ngem, saan a pudno daytoy, kas napaliiw ti maestroda. Kinunana a “dagiti annak dagiti Saksi ni Jehova iyebkasda a siwayawaya ti bagbagida, natimbengda unay, ken naan-anay a kabaelanda nga ilawlawag ti pammatida, banag a saan a maaramid dagiti dadduma nga ubbing.”

Kinapudnona, pinullo a ribo a pamilia iti intero a lubong ti nangsukaten iti panangited iti Krismas iti nasaysayaat, ti panangikagumaan a mangited kadagiti sagut kadagiti annakda iti intero a tawen. Daytoy ket napaneknekan a gubuayan iti rag-o dagiti isuamin.

Maysa a pagimbagan ket agbanag dayta kadagiti adu a nararagsak nga okasion iti tawen, ket ad-adda a maapresiar dagiti annak ti tunggal sagut. Ti sabali pay a pagimbagan ket ammo dagiti annak a dagiti nagannakda ti mangipapaay kadagiti sagut gapu iti ayat, ket maiturong kadakuada ti panangapresiarda. Saan nga aggasgasto ken agbambannog dagiti nagannak iti kasta unay a ti pagyamananto laeng dagiti annakda isu ti maysa a mapampanunot laeng a Santa Claus wenno pagbalinenna ida nga ingrata, a mariknada a rebbengen ni Santa ti mangiyeg kadagiti regalo ket saan a rumbeng ti agyaman.

Ti Sagut a Nakapatpateg

Masansan a ni Dominik, agtawen iti sangapulo, ken ni Tina, agtawen iti innem, makagun-odda kadagiti sorpresa kadagiti nagannakda—maysa a tsokolate iti rabaw ti punganda, maysa a pluma wenno kuaderno a mausarda idiay eskuelaan, wenno maysa a maitutop nga ay-ayam a mamagbalin kadakuada nga okupado bayat dagiti bulan ti kalam-ekna. Ngem ania ti ad-adda nga apresiarenda? Sumungbat dagiti nagannakda: “No mangbusboskami ti tiempo a kaduada—kas pangarigan, panagay-ayam iti niebe.”

Adu a sabsabali a nagannak a Saksi ni Jehova ti umanamong. “Iti daytoy okupado unay a lubong,’’ ilawlawag ni Edelgard, ‘‘ti tiempo ti kapapatgan a maipaayko kadagiti annakko.” Ket umanamong dagiti agtutubo! Kuna ni Ursula nga ibilang dagiti annakna ti tiempo a nabusbos nga agkakadua iti iruruar ti pamilia kas “ti kasayaatan a sagut kadagiti isuamin a sagut.” Uray ti tsirman iti union dagiti mamaestro idiay Alemania nabiit pay a kinunana a ti kasayaatan a sagut iti Krismas a maited dagiti nagannak kadagiti annakda isu ti tiempo ken anus.

Di pagduaduaan dayta, ti panangipaay iti bagi—ti tiempo, pannakaseknan, ken atension—dayta man ket maipaay iti pamilia wenno iti gagayyem, ket maysa a sagut a pudno a nakapatpateg. Nabatad ngarud a dagita a sagut saanda laeng a maipaay kadagiti naituding nga al-aldaw iti tawen.

Makapnek a Narag-o a Panangited

Usigenyo dagiti ulidan dagiti Saksi ni Jehova a makiraman iti nasaysayaat a banag ngem ti panangited ti Krismas. Kinuna da Wilfried ken ni Inge a taga Alemania: “Kaaduanna mangitedkami kadagiti sagut no mapanunotmi ti mangted, nupay iplanomi ti mangited kadagiti daddadakkel a sagut.” Umasping iti dayta, ikagumaan da Dieter ken ni Debora ti mangted kadagiti sagut iti baritoda iti intero a tawen. Ilawlawagda a “saan a napateg ti kadakkel wenno gatad ti sagut, ket mammano dagiti dadakkel wenno nangina a sagut.”

Inanamaen dagiti adu nga ubbing dagiti sagut iti tiempo ti Krismas, gapuna mapukawen ti sorpresa. Kuna ni Helga a “dagiti annakna naragragsakda no makagun-odda kadagiti di ninamnama a sagut ngem no makagun-odda kadagiti sagut kadagiti okasion a namnamaenda ida.” Umanamong ni Natascha, maysa a 15-años, a “nasaysayaat ti umawat ti sorpresa a sagut nga agtaud iti puso ngem ti maited iti naituding a tiempo gapu laeng ta kaugalian dayta.”

Umasping iti dayta, napateg nga alertotayo iti kita dagiti sagut a tagiragsaken dagiti ubbing. Maipapan iti daytoy, ipadamag ni Fortunato nga agnanaed met idiay Alemania: “Dagiti sagut nga itedmi kaaduanna isu dagiti banag nga impamatmat dagiti ubbing a kayatda a tagikuaen. Ngem ikagumaanmi nga ipaayan ida kadagiti kanito a dida namnamaen. Makitayo ti rag-oda!”

Masarakan met dagiti nagannak a ti panangited ti sagut kadagiti ubbing no nakaiddada a masakit idiay pagtaengan paragsakenna ida. Dadduma mangtedda kadagiti sagut sakbay ti bakasion ti eskuela tapno mataginayon nga okupado dagiti ubbing. Kas pangarigan, sakbay ti bakasion, naikkan ni Stefan ti maysa a mikroskopio. “Naited dayta a sorpresa,” kuna ni tatangna, “ket literal a limmagto gapu iti rag-o.” Kinapudnona, ti kanayon, di mapilpilit a panangited mangyeg iti ragsak agpadpada iti nangited ken ti umawat.

Pudno, adda dagiti bukod a tarigagay dagiti ubbing. Ilawlawag da Jörg ken ni Ursula: “No ibaga ti anakmi no ania ti kayatna, makisaritakami kenkuana maipapan iti dayta. Nainkalintegan kadi ti tarigagayna? Maitutop kadi ti banag iti edadna? Adda kadi lugar a pangikabilanmi iti dayta idiay pagtaengan? No dikam maipaay a dagus ti tarigagayna, basta laglagipenmi dayta ket ikagumaanmi nga ipaay iti maitutop nga okasion kamaudiananna.” Siempre, saan a nainsiriban a panuynoyan dagiti ubbing babaen ti panangpennek iti tunggal pagayatanda, isu a mangikkat iti rag-o nga iyeg ti panangawat iti sagut.

Dagiti nagannak a manangited iyallatiwda kadagiti annakda ti espiritu a maiparangarang a buyogen iti rag-o. Kuna ti sangapulo ti tawenna a ni Sebastian: “Di masapul nga urayen dagiti holiday tapno paragsakek dagiti nagannak ken kakabsatko. Basta masapul laeng a nasayaat ti riknak ken adda sumagmamano a sinsilio iti bulsak.”

Dagiti pamilia dagiti Saksi ni Jehova masarakanda met a dagiti sabali a kita ti sagut ket nasaysayaat ngem ti panangited iti Krismas. Dagitoy ket naiplano a panagbiahe wenno ekskursion, mabalin nga iti zoo, maysa a museo, maysa nga eksibision, wenno maysa a lugar iti away. Dagitoy a sagut ket agpadpada a makaisuro ken pudno a makaparagsak kadagiti agtutubo.

Ti Bendision iti Naragsak a Panangited

Babaen ti panangiyaplikar kadagiti prinsipio ti Biblia iti panangited, maliklikantayto ti rigat ken pannakapaay a maikuykuyog iti panangited iti Krismas. Ket laglagipenyo, ti panangited iti tiempo ken abilidadtayo a mangpakired ken mangpabileg kadagiti sabsabali iti mental ken espiritual ket maysa a sagut a napatpateg ngem dagiti material a regalo. Daytoy a nagsayaatan a pannangted pabilgenna ti singgalut ti pamilia, pasingedenna ti pannakipagayam, ken mangiyeg ti pudno a rag-o iti intero a tawen saan laeng nga iti umawat no di ket nangnangruna iti nangited.—Aramid 20:35.

Gapuna imbes a ti nakairuaman nga inkapilitan a panangited iti Krismas iti daytoy a tawen, apay a dikay padasen ti naiduma a pamay-an? Apay a dikay padasen ti nasaysayaat a pamay-an?

[Kahon/Ladawan iti panid 12]

Ngem Saan Kadi a Maikawa Dagiti Ubbing iti Dayta?

Rebecca, 16: “Diak maikawa iti Krismas, tangay makagun-odak kadagiti sagut iti intero a tawen. Tagiragsakek nga ad-adda iti sorpresa a sagut ngem ti napilpilit.”

Tina, 12: “Pudno a tagiragsakek ti makagun-od kadagiti maitutop a sagut, saan nga iti naikeddeng a tiempo, no di ket iti aniaman a tiempo bayat ti tawen—ket saan a dagiti sagut a pagyamanak ngem iti kinapudnona diak pay ida kayat.”

Birgit, 15: “Awan ti mamaay dagiti amin a sagut iti lubong no adda dagiti parikut iti pamilia. Dayta ti makagapu no apay nga aramidenmi a sangsangkamaysa dagiti adu a banag kas maysa a pamilia.”

Janosch, 12: “Datayo nga annak ay-ayatentayo dagiti nagannaktayo uray no dida mangted ti aniaman a regalo kadatayo. Ti ayatda ket maysan a naindaklan a sagut.”

[Ladawan iti panid 10]

Maysa a napintas a sagut—ti tiempoyo!