“Mangipatulodtayo iti Pangkablaaw a Kard”

“ANIAN a nakaay-ayat a ngudo ti lawas daydi!” Iti panagawid idiay balay kalpasan ti isasarungkar kadagiti gagayyem, malagipyo dagiti naragsak a tiempo ti panagaliwaksayyo. Ania ketdin ti kinamanagpadagus dagiti nangpasangbay kadakayo! Tapno iyebkas ti panangipategyo, kunaenyo iti pamiliayo: “Mangipatulodtayo iti pangkablaaw a kard.”

Isu a mapankay gumatangen iti kard kadagiti tiendaan iti lugaryo. Nakaad-adu ngem diyo ammot’ pilienyo. ‘Ania ngata a kard ti piliek?’ ‘Ania ngata ti addaan kadagiti umno a balikas?’ Narigat ti agpili! Isu nga apay dikay mangaramid iti bukodyo a kard?

Panangaramid Kadagiti Bukodyo a Kard

Nalaka laeng daytoy ngem ti ipagarupyo. Kasapulanyo laeng ti maysa a papel wenno naingpis a kard, pagsurat, ken, siempre, ti mensahe. Babaen ti bukodyo a disenio, mapapintasyo pay dayta. Kasano? Adtoy ti dua a singasing.

(1) Mangpilikayo iti ladawan a pagay-ayatyo. Mabalin a daytat’ maysa a buya manipud iti maysa a magasin, sa kartibenyo ken ipigket iti kardyo. Sinorpresa ti maysa nga asawa a babai ni lakayna iti maysa a novel a kard tapno selebraran ti maika-25 nga anibersario ti panagkasarda. Nangkartib iti dua a babassit a retratoda ken lakayna sana impigket iti simple a kard tapno iyebkas ti ragsakna iti panagasawada.

(2) Usarenyo dagiti sabong. Datin a nasayaat ti pannakadisenioda. Kalpasan ti panangipandag ken panangpagango kadakuada, mabalin nga ipigketyo ida iti kardyo tapno ad-adda a pumintas ken makaay-ayo.​—Kitaenyo ti kahon.

Aniaman a dekorasion ti pilienyo, sigurado a ti mensahe ti kapatgan. Ti panangaramid iti bukodyo a kard ti mangyeg gundaway kadakayo a mangputar kadagiti sasao a pudpudno a mangiyebkas kadagiti rikriknayo.

Maitutop a Mensahe

Ni Ari Salomon idi ugma, “sinukimatna tapno sarakenna dagiti maawat a sasao, ken ti naisurat idi nga umiso a sasao ti kinapudno.” (Eclesiastes 12:10) Ti kasta a panagpili iti sasao ti mamagbalin iti naisurat a mensaheyo a “kas la mansanas a balitok a nabungon iti iniket a pirak” para iti umawat.​—Proverbio 25:11.

Mangpilikayo kadagiti makaay-ayo a sasao. Mabalin a nasaysayaat no iramanyo ti dadduma kadagiti naipaltiing a sasao idiay Biblia tapno iyebkas dagiti pudno a rikriknayo. Dagitoyto ti kangrunaan a maipateg.

Mabalin met a makayallatiw ti mensahe ti pamay-an ti panangisuratyo kadagidiay a sasao. Ti naurnos ken nasayaat a panagsurat dakkel unay ti maibagada maipapan kadakayo kas nangipatulod.

Dagiti Okasion Para iti Panangipatulod Kadagiti Kard

Dagiti panagkasar ket naragsak nga okasion a mabalin a kayat a pangawisan dagiti nagkallaysa kadagiti gagayyem ken kabagianda. No adda padayada kalpasan ti seremonia ti kasar, maiyebkasda ti pannakaseknan kadagiti dumar-ay a taga adayo babaen ti panangiraman iti imbitasion ti pakaammo iti oras ti panangrugi ken panagngudona.

Ti pannakaipasngay ti maysa nga ubing ket sabali pay a tiempo para iti panangipatulod iti kard. Daytoy ti mangipakaammo kadagiti nagannak ti ubing a makipagrag-okayo kadakuada.

Malaksid pay kadagita nga okasion, anian a panangipateg no iyebkas ti panagyaman kadagiti kinaimbag nga impakita dagiti tattao kadakayo. Maliwliwayo met ti masakit ken dagiti naiyospital, nga ipanamnama kadakuada ti ayat ken pannakaseknanyo. Ti mangkomusta a kablaawyo ken ti makaay-ayo a ladawan nga iyanninaw ti kardyo ket makatulong a mangep-ep iti panagleddaang ken panagdanag. Kinapudnona, kas kunaen ti kadaanan a proverbio, “ti maysa a sao iti maitutop a tiempo, anian a nagsayaat!”​—Proverbio 15:23.

No adayo wenno asideg ti ayanyo, iyebkasyo ti pannakipagladingityo kadagidiay naulila kadagiti ing-ingungotenda. Mabalin met a mayannatup ti pangipalagip iti nakaskasdaaw a namnama a panagungar nga ididiaya ti Biblia.

Gapuna, no kayatyo nga iyebkas ti rikriknayo iti sabsabali, apay a diyo patulodan ti kard? Ngem siempre, di maartapan ti direkta a pannakisarita iti dayta a tao no ipalubos ti gundaway. Kaskasdi, maysa a kanayonan a gundaway ti agbalin a nasingpet.

[Kahon iti panid 26, 27]

Maysa a Naisalsalumina a Dekorasion

Dagiti napandagan a sabsabong kas dekorasion papintasenda dagiti kardyo. Simple daytoy, nalaka a pamay-an a panangaramid iti kardyo iti naisalsalumina nga estilo. Bassit laeng a kagawaan ti masapulyo.

Panagkolekta Kadagiti Sabong

◻ Siguraduenyo nga adda pammalubosyo a mangala kadagiti kayatyo a sabong.

◻ Dikay mangala no agtudtudo.

◻ Dikay mangala iti nagangon a sabsabong wenno bulbulong.

◻ Diyo sayangen dagiti sabong.

Saan unay a nasayaat a mapandagan ti dadduma a sabong no napuskol ti petalda (dagiti bluebell, lirio, orkidia) wenno saan a nasayaat ti sukogda (dagiti daffodil, lilak, dadakkel a rosas, kaskasumba).

Panangpandag Kadagiti Sabong

◻ Iyipityo dagiti sabong iti nagbaetan ti papel a naiyipit iti dua a pedaso ti plywood. Ti panangnayon iti sumagmamano a suson ti diario ti makatulong a mangagsep iti agneb. Inaldaw a pairutanyo dagiti pangipit bayat a magango dagiti sabong.

◻ Urayenyo ti makalawas sakbay a lukatanyo ti pinandaganyo.

◻ Apagbiit a sukimatenyo no napandagan met laeng a naimbag, ket no kasapulan, ipandagyo manen iti nagbaetan ti dua a namaga a papel.

◻ Siiirut a pandaganyo manen ti sabong, ket ikabilyo dayta iti napudot, namaga a lugar iti dua inggat’ tallo a lawas sakbay nga alaenyo ida.

Panangipigket Kadagiti Sabong

◻ Usarenyo ti kalalainganna a pangpigket.

◻ Siaannad nga iggamanyo dagiti sabong, nalabit babaen ti panagusar iti tweezer.