Ti Panangmatmat ti Biblia

Agpabautisarkay Aya Manen?

MADANAGAN ni Lucila. Nupay dimmakkel kas Katoliko, nabiit pay nga inrugina ti maysa a napasnek a panagadal iti Biblia babaen ti tulong ti maysa a di-Katoliko a gayyem. Naadalna a naiduma ti salsalaysayen ti Biblia a bautismo ngem iti namulagatanna. “Kaipapanan kadi daytoy a rumbeng nga agpabautisarak manen?” sipapasnek nga inyimtuodna. “Madanaganak di la ket ta makabasolak iti Dios no aramidek dayta.”

Ginasut a milion a tattao, Katoliko man wenno Protestante, ti nabunyagan babaen ti pannakaiwarsi wenno pannakaibukbok ti danum idi maladagada pay laeng. Minilion a dadduma pay ti nabautisaran babaen iti naan-anay a pannakaitaneb iti danum idi nataengandan. Mangpataud daytoy iti saludsod, Ania kadi ti Nakristianuan a bautismo? Adda kadi aniaman a pamkuatan a pakaibatayan ti maikadua a bautismo?

Depinaren ti Pocket Catholic Dictionary ti bautismo kas “ti sakramento a, babaen ti danum ken sao ti Dios, ti maysa a tao ket madalusan iti amin a basol ket maipasngay manen ken mapagsanto ken Kristo nga agturong iti agnanayon a biag.” Maipapan iti panagbautisar manen, kuna met laeng daytoy a reperensia a “ti bautismo mangipaay iti di mapunas a marka iti kararua, a dayta, di mabalin, yantangay rumbeng a saanen, a maulit.” Kastoy kadi ti kunaen ti Biblia?

Mangaramidkayo Kadagiti Adalan, Bautisaranyo Ida

Idiay Mateo 28:19, 20, mabasatayo ti bilin maipapan ti bautismo nga inted ni napagungar a Kristo kadagiti adalanna sakbay a nagpalangit. “Inkayo, ngarud, ket mangaramidkayo kadagiti adalan iti isuamin a nasnasion; bautisaranyo ida iti nagan ti Ama ken ti Anak ken ti Nasantuan nga Espiritu, ken isuroyo kadakuada nga alagadenda dagiti amin a bilin nga intedko kadakayo.” (The Jerusalem Bible) Nalawag a ti bautismo ket maikalikagum kadagiti Kristiano nga adalan​—dagidiay nasursuruanen a mangalagad kadagiti pammilin ni Kristo​—saan a dagiti maladaga.a Maitunos daytoy iti kinapudno nga amin a bautismo a nadakamat iti Kasuratan inramanna dagiti adalan a nalawag a naan-anay a naitaneb idi iti danum. Nabatad a kastoy ti naaramid ken Kristo Jesus a mismo idi binautisaran ni Juan a Mammautisar. Kuna ti salaysay ti Biblia nga apaman a nabautisaran, ni Jesus “simmang-at manipud iti danum” ti Karayan Jordan. (Mateo 3:16, JB) Talaga nga ipakita dagiti Kasuratan a pinili a naimbag ni Juan dagiti lugar a pagitanebanna tapno masiguradona nga adda mausar a nawadwad a danum.​—Juan 3:23.

Kalpasanna, iti panangiladawanna iti pannakabautisar ti Etiope nga eunuko, kunaen ti Biblia kadatayo a “ni Felipe timmapog iti danum a kaduana ti eunuko ket isut’ binautisaranna,” sa kalpasanna “simmang-atda manipud iti danum.” (Aramid 8:38, 39, The New American Bible) Dagitoy a bautismo ket maitunos iti kadawyan a kaipapanan ti Griego a sao a ba·ptiʹzo, “mangbautisar,” manipud baʹpto, a kaipapananna “itaneb wenno irarem,” nga isu ti ramut ti Ingles a sao a “baptism (bautismo).”

Nainkasuratan a Pakaibasaran ti Panagbautisar Manen

Kasano ngayen dagiti minilion a tattao a nabunyagan idi maladagada pay laeng wenno di pay pulos nabautisaran? Maiparbeng kadi a mabautisaranda manen? Ti maysa a pasamak a nailanad idiay Aramid 19:1-7 tulongannatayo a mangsungbat kadagitoy a saludsod. Mabalin a tiempot’ kalam-ek idi 52/53 K.P. a sinarungkaran ni apostol Pablo ti narang-ay a siudad ti Efeso idiay Asia Minor. Nasarakanna sadiay ti sumagmamano nga adalan a rumbeng a mabautisaran manen. Kalpasan a naammuanna a dagitoy a tattao ket nabautisaranen iti bautismo ni Juan, binautisaran manen ida ni Pablo “iti nagan ni Apo Jesus.” Dina impapan a daydi nga inaramidna ket basol iti Dios. Nalawag nga inanamongan ti Dios ti panagrason ni Pablo, ket imbes a di naay-ayo iti daytoy a panangbautisar manen, daytat’ pinasingkedan pay ketdi ti Dios babaen ti parabur ti nasantuan nga espiritu.

No koma linaksid dagiti 12 a tattao ti pannursuro ni Pablo maipapan ti kaipapanan ti bautismo ken ti kinapateg ti Mesias a ni Kristo Jesus, di koma ida binautisaran ni Pablo. Dagidi a tattao masapul nga umuna a maikarida sakbay a mabautisaranda. Iti kasta, anamongan ti Dios ti pannakabautisarda manen.

No Kasano ti Pannakaikari iti Bautismo

Kasanotay a maikari a mabautisaran? Usigenyo ti kaadu dagiti nabautisaran idi aldaw ti Pentecostes 33 K.P. Kasanoda a naikari? Umuna, kas Judio ken proselita a Judio, inam-ammoda ni Jehova a Dios, ti pannakilangenna iti ilina, ken dagiti padto ti Biblia maipapan iti inkarina a Mesias. Maikadua, ginun-odda ti kanayonan nga umiso a pannakaammo kabayatan ti napaltiingan a panangasaba ni apostol Pedro iti daydi nga aldaw. Aniat’ resultana?

“Idi mangngegda daytoy, napaladingitan ti pusoda ket kinunada kada Pedro ken dagiti apostol, ‘Kakabsat, aniat’ rumbeng nga aramidenmi?’ ‘Masapul nga agbabawikayo,’ kinuna ni Pedro, ‘ken masapul a mabautisaran ti tunggal maysa kadakayo iti nagan ni Jesu-Kristo maipaay iti pannakapakawan dagiti basolyo, ket awatenyonto ti sagut ti Nasantuan nga Espiritu.’” (Aramid 2:37, 38, JB) Saan a barengbareng ti panangasaba ni Pedro. “Napaut a nakisarita kadakuada buyogen iti adu nga argumento.” Nakumbinsirda babaen iti pannakirinnasonna, ket inawatda ti imbagana ket nabautisaranda. “Iti daydi nga aldaw, agtallo ribo ti nainayon iti bilangda.”​—Aramid 2:40, 41, JB.

Dagiti umasping a pagannurotan ket maikalikagum met kadagiti anamongan-Kasuratan a bautismo itatta: (1) umiso a pannakaammo, (2) napasnek a panagbabawi, ken (3) pannakumberte, wenno panagsubli iti Dios ken iyaadayo iti “daytoy nakillo a kaputotan.” Kasta pay met a dagiti anamongan-Kasuratan a bautismo masapul a maaramid “iti nagan ni Jesu-Kristo,” a naibatay iti panangbigbig iti subbot a daton agpaay iti pannakapakawan dagiti basol ken panagpasakop kenkuana kas insaad Dios nga ari.​—Aramid 2:40, JB; Roma 5:12-19; 7:14-25.

Di rumbeng a pakadanagan dagiti napasnek a tattao a maitunos-Kasuratan ti pannakaikarida a mabautisaran a mapagurada ti Dios no agpabautisarda manen. Maisupadi ketdi, mangyeg ragsak iti Dios ti maitunos-Kasuratan a bautismo.

[Footnote]