Manipud Managbasatayo
Panagkaykaysa Dagiti Rasa Dagiti serye ti “Agkaykaysanto Pay Aya Dagiti Amin a Rasa?” (Agosto 22, 1993) tinulongannak a nakaammo no kasano ti itataud ti panangidumduma iti pulí ken no kasano a naiyallatiw iti nadumaduma a kaputotan. Tinulongannak met a nakaamiris no apay adda pay laeng sagpaminsan a panangidumduma dagiti dadduma a Kristiano. Idi, makapaupay unay kaniak daytoy. Ngem maawatak itan a kasapulan ti tiempo a mangiwaksi iti dayta a dakes a pagannayasan. Segseggaak ti nalinteg a baro a lubong ti Dios, inton ti pulí ket saanen nga isyu.
C. W., Estados Unidos
Panangaramid iti Kard Pagyamanan iti artikulo a “Mangipatulodtayo iti Pangkablaaw a Kard.” (Agosto 8, 1993) Adun a tawen a mangar-aramid ni lolak kadagiti kard sana ipatulod kadakami nga appokona. Agtawenak iti 13 ket agdua tawen metten a mangar-aramidak kadagiti kard. Nagsayaat unay ti panangusar kadagiti napandagan a sabong, kas insingasing ti artikuloyo. Natakuatak a no ikkanyo ti bassit a pigket iti rabaw dagiti sabong sa warakiwakanyo dayta iti silapsilap, ad-adda pay a pumintas dayta.
J. B., Estados Unidos
Kinabaldado Manmano dagiti realistiko nga artikulo maipapan ti kinabaldado a kas ti artikulo nga “Agimtuod Dagiti Agtutubo . . . Kasano a Mapagballigiak ti Kinabaldadok?” (Hunio 8, 1993) Kalpasan ti panagserbik iti sumagmamano a tawen kas maysa a ministro idiay sanga nga opisina dagiti Saksi ni Jehova sadi Roma, Italia, nairamanak iti maysa a grabe nga aksidente iti kotse a nangdangran iti dorik. Kellaat a rimmigat dagiti nalaka a banag kas ti pannagna ken panangiggem iti sangabaso a danum. Kellaat a kasapulak ti mangbangon kaniak manipud katrek, mangpelles, mangiyuli iti agdan, ken dadduma pay. Kalpasan ti naunday a tiempo ti pungtot, leddaang, panangay-ay iti bagi, ken nalimed a panaganug-og, inaklonkon ti kasasaadko ken binigbigkon a masapul nga aramidek ti mabaelak iti aniaman a kasasaad. Babaen ti panangandingay ti maysa a dedikado a physical therapist, nagannak, ken gagayyem, simmayaaten ti kasasaadko, ket agserserbiak manen ditoy sanga [nga opisina]. Talaga a nupay baldado ti maysa, kabaelanna pay laeng ti agbalin nga aktibo ken manangtulong unay!
A. E., Italia
Panagkolekta iti Bato Kas maysa a doktor, binasak buyogen iti kasta unay a panaginteres ti artikuloyo a “Naisangsangayan a Kita ti Panagsapul iti Gameng.” (Hulio 8, 1993) Ngem nadlawko nga idi inlawlawagyo ti panangusar iti martilio, diyo nadakamat ti aniaman a pangsalaknib kadagiti mata. Napateg unay daytoy, yantangay nalaka laeng a mangpuling dagiti babassit a paset ti bato, ket makadangran unay dagitoy iti mata ti tao.
G. T. W., Inglaterra
Apresiarenmi daytoy a makatulong a singasing maipapan iti panagannad.—ED.
Panagangot Nagustuak unay ti artikulo a “Ti Adut’ Usarna a Panagangottayo.” (Hulio 22, 1993) Tallo a tawen ti napalabasen idi inaramidko ti maysa a proyekto iti asignaturak a science maipapan iti daytoy a suheto. Adu a tao ti dida man la mabigbig ti kinapateg ti sistema ti panagangottayo. Pagyamanan iti panangipaawatyo kadagiti adu a tao no kasano a talaga a nakaskasdaaw ti panagangottayo.
L. T., Estados Unidos
Sarsarita Maipapan Kadagiti Ayup Maysaak a Zulu nga agtawen iti 20 ket pagay-ayatko a maammuan dagiti nakaskasdaaw a parsua. Apresiarek unay ti artikuloyo a “Ti Naulimek a Managsippayot.” (Marso 8, 1993) Kadagiti Zulu, maibilang dagiti kullaaw kas billit ti dakes a partaan ket maipagarup a mainaigda iti panangkulam. No makakita dagiti tattao iti kullaaw, bugawenda dayta. Maipateg unay ti simple ken makaisuro nga artikuloyo.
Z. P. M., Sud Africa
Pagyamanan iti artikulo nga “Aglagto a Musiko Dagiti Insekto.” (Abril 8, 1993) Masansan a dagiti dudon maibilangda a peste. Ngem daytoy nga artikulo tinukayna ti pannakipagriknak iti daytoy nga insekto—ken pinarayrayna met ti panagraemko iti naannad ken masirib a Namarsuatayo.
V. P., Brazil