Manipud Managbasatayo
Namalmalo nga Assawa a Lallaki? Mariroak iti impablaakyo a padamag a “Namalmalo nga Assawa a Lallaki” iti “Panangmatmat iti Lubong.” (Hulio 22, 1993) Ti “panangabuso,” a pakairamanan ti basta panangpangta, ket saan a maipada iti “panangmalo,” a daytat’ maysa a naranggas a krimen. No maipapan iti nangatngato a porsiento kadagiti babbai ngem kadagiti lallaki a mangamin iti panangabuso, ipakita dagiti panagadal a napudpudno dagiti babbai maipapan iti panangbigbig kadagita a banag ngem kadagiti abusado a lallaki, a masansan a mangilibak kadagiti tigtignayda.
K. K., Estados Unidos
Apresiarenmi dagitoy a kapaliiwan. Ti maiyim-imtuod a padamag ket maipapan iti maysa a panagadal nga agkunkuna nga 40 porsiento kadagiti babbai ti nangamin nga ab-abusuenda dagiti assawada, kontra iti 26 porsiento kadagiti lallaki a nangamin nga ab-abusuenda dagiti assawada. Nupay kasta, kas bigbigen ti padamagmi, inusar ti panagadal ti nalawa a kaipapanan ti “panangabuso” ket saanna laeng a linimitaran dayta iti pisikal a panangmalo. Gapuna ti paulo ti padamagmi ket medio makariro. No ania ti kasaknapan a kita ti panangmalo, impadamag ti Pebrero 8, 1993 a ruarmi manipud iti magasin a “Parents”: “Nasurok a 95 porsiento kadagiti naipadamag [a nakaro] a panangabuso iti asawa iramanna ti maysa a lalaki a mangmalmalo iti maysa a babai.”—ED.
Panagangot Kanayon a pampanunotek a no kasapulan a mapukaw ti maysa kadagiti sentidok, kaykayatko laengen a ti panagangot ti mapukaw. Ngem idi nabasak ti artikulo a “Ti Adut’ Usarna a Panagangottayo” (Hulio 22, 1993), makababbabawyennak. Dagiti artikuloyo maipapan iti nakaskasdaaw a bagitayo kanayon a tulongannak a mangpauneg iti panagayatko ken Jehova.
D. H., Trinidad
Anteohos Pagyamanan iti panangipablaakyo iti artikulo a “Panangsukimat Kadagiti Anteohos.” (Hulio 8, 1993) Naglaon dayta iti naimbag a balakad. Sakbay a binasak ti artikulo, nakairuamak nga idisso dagiti lens ti anteohosko. [Isu nga] adu ti garadgadnan. Pinadasko met dagiti contact lens ngem maulawak. Yantangay awan ti maaramidko no di ti aganteohos, aramidekton ti imbalakadyo!
T. C., Italia
Dagiti Bato iti Bekkel Nagsuratak tapno agyaman iti naintiempuan nga artikulo a “Dagiti Bekkel—Panangagas iti Kadaananen a Sakit.” (Agosto 22, 1993) Kalpasan unay a naawatko ti kopiak babaen iti koreo, adda gayam bato iti bekkelko idi naeksaminak. Gapu iti artikuloyo, naawatak a naimbag ti sakitko ken nakasaganaakon iti panagpaoperak.
V. T., Estados Unidos
Panangidumduma iti Pulí Kayatko laeng ti agyaman kadagiti nagsayaat a serye ti artikuloyo nga “Agkaykaysanto Pay Aya Dagiti Amin a Rasa?” (Agosto 22, 1993) Patiek a nagsayaat unay ti panangtamingyo iti daytoy a sensitibo a suheto. Siaannad ti pannakaputarna, ngem awan indaddadumayo a mailaksid iti siaagum a pannakaigamer iti naalas nga ibunga ti panangidumduma iti pulí.
D. G., Estados Unidos
Dati a Padi Pagyamanan iti panangipablaakyo iti kapadasan ni Alinio de Santa Rita Lobo a “No Apay a Pinanawak ti Kinapadi Agpaay iti Nasaysayaat a Ministerio.” (Setiembre 8, 1993) Ti pakasaritaan[na] ket naisangsangayan unay—ken babaen ti maysa a tao nga aduan iti nairingpas a nangato a kurso. Iti ministeriotayo kas dagiti Saksi ni Jehova, masansan nga in-inut nga ibangontayo ti maysa a pannakaawat iti kinapudno kadagiti estudiantetayo iti Biblia. Ngem iti daytoy a kaso, sungani ti inaramid dayta a tao—daytat’ saggaysa a panamagsisina kadagiti ulbod a sursuro, a nangilasin iti kinapudno kadagiti naibasar-iglesia a tradision. Makapabileg unay dayta iti pammati.
B. C., Estados Unidos
Iyaakar Pagyamanan unay iti artikulo nga “Agimtuod Dagiti Agtutubo . . . Umakarak Aya iti Nabakbaknang a Pagilian?” (Abril 22, 1993) Kanayon a pampanunotek a tapno umasensoak, kasapulan nga umakarak. Naawatakon a daytat’ maysa gayam a serioso unay a desision ken adu a banag ti rumbeng a maamiris. Inlawlawag met kaniak ti artikulo nga anagen dagiti pudno a kasapulak ket dagiti bambanag a talaga a kasapulantayo tapno agbalintayo a naragsak ket masarakan iti aniaman a pagilian.
M. R., Dominican Republic