Adda Kadi Dasigan ti Dios iti Isports?
AGPARINTUMENG ti naballigi a managtaray ket nagkararag, a nangipaay iti panagyaman iti naaramidanna. Ngem, ipapantayon a dadduma a nakisalisal nga agtaray nagkararagda met iti Dios maipaay iti balligi—ket naabakda.
Nagparintumeng ti dua a boksingero iti agsumbangir a suli ti pagboboksingan sakbay ti umuna a rikos ti panaglabanda. Agpadpadada a nanguros, maysa a kita ti naulimek a kararag iti Dios maipaay iti balligi. Kalpasanna tinumban ti maysa ti sabali. Iti sabali a rikos, maymaysa laeng a boksingero ti dumawat iti Dios iti panagballigi, ngem ad-adu ti pannakaabakna ngem ti panangabakna.
Kadagiti grupo a panagay-ayam, dagiti grupo ti agay-ayam mabalin nga agkararagda sakbay, bayat, wenno uray pay kalpasan ti panagay-ayam. Kas pangarigan, bayat ti maudi a segundo ti maysa nga American Super Bowl nga ay-ayam ti football, maysa a mangkugtar ti nakilinea agpaay iti nakapatpateg a field goal a mangipaay iti panangabak wenno pannakaabak ti grupona no dina maipastrek [iti goal] dayta. Kinuna ti nangkugtar kamaudiananna: “Inkarkararagko dayta.” Ngem dadduma kadagiti kalabanda a grupo ti mangikarkararag met—a maabakda.
Nupay agpadada a mabalin a nagkararag, masapul a maabak ti maysa. Uray pay ti nangabak a grupo a dagiti managay-ayam nagkararagda agpaay iti balligi mabalin a maabakda iti sumaganad nga ay-ayam. Kinapudnona, kamaudiananna, iti ngudo ti panagay-ayam, masapul a maabak dagiti dadduma a grupo, ta maymaysanto laeng ti kampeon iti intero a league. Kaskasdi, kaaduan kadagidiay a naabak a grupo ti addaan kadagiti managay-ayam a nagkararag agpaay iti balligi.
Iti maysa nga artikulo a napauluan “Pangngaasiyo Ta Dikay Lablabsen Dagiti Kararagyo,” nagsurat ti maysa a kolumnista iti isports: “Saan a gapu ta itangtangsityo ti kinasinged unay ti relasionyo iti Dios, kayatna a sawen a pudno dayta. . . . Idi Gubat Sangalubongan II, adda sasao nga impaisurat dagiti soldado nga Aleman iti hibilia ti sinturonda: Gott mit uns. Kaipapananna: ‘Adda ti Dios kadatayo.’” Kuna pay ti maysa a mannurat iti isports: “Saan a makidasig ti Dios kadagiti ay-ayam ti football. Dagiti naindagaan a bambanag a kas kadagitoy ket ikeddeng dagiti lallaki ken babbai, saan a ti Mannakabalin-amin.”
Nagsurat ni apostol Pedro: “Ti Dios saan a mangidumduma, ngem iti tunggal nasion ti tao nga agbuteng kenkuana ken agaramid ti kinalinteg makaay-ayo kenkuana.” Ti pannakiraman iti naranggas nga isports saan a ‘panagaramid iti kinalinteg.’ (Aramid 10:34, 35; Roma 14:19) No talaga a denggen ti Dios dagiti kararag dagidiay dumawdawat iti balligi ket madangran ti maysa a mannakisalisal wenno mapapatay pay, mapabasol aya ti Dios?
Kunaen ti Sao ti Dios: “No adda aniaman a dawatentayo a mayannurot iti pagayatanna, isu denggennatayo.” (1 Juan 5:14) Tapno masungbatan dagiti kararag, masapul nga ammuen ti maysa dagiti pagayatan ken panggep ti Dios, ket dagiti tignayna masapul a maitunos kadagita.—Idiligyo iti Mateo 6:9, 10.
Saan, saan a nainaig dagiti pagayatan ken panggep ti Dios kadagiti ay-ayam ti isports. Gapuna, no dagiti kararag maipaay iti balligi ket agpaay kadagiti ay-ayam ti isports, dumdumngeg aya ti Dios? Sigurado a saan.
[Picture Credit Line iti panid 31]
UPI/Bettmann