Aniat’ Ipaay Dagiti Bituen Kadakayo?
BABAEN TI KORESPONSAL TI AGRIINGKAYO! IDIAY BRAZIL
“NANGNGEGYO kadin a naipadto babaen kadagiti bituen, nga inton sumaganad a Hulio maidungparto ti Daga iti Mars?” Dagitoy a sasao ti naayug a kanta ni Cole Porter yebkasna a naimbag ti gagangay a kadaanan a pammati a ti masanguanan ti tao ket mainaig kadagiti bituen.a Ngem talaga kadi nga adda pakainaigan dagiti nailangitan a bambanag iti biag ti sangatauan ditoy daga? No pudno, kasano a maapektaran ti sangatauan? No saan, ania ngarud a panggep ti tungpalen dagiti bituen?
Di pakasdaawan a nakaad-adu a tattao ti interesado iti masanguanan no usigentayo dagiti nabiit pay a makapakellaat a pasamak—ti pannakarbek ti Pader ti Berlin ken ti napartak a pannakasinasina ti dati nga Union Soviet, ti kurang a panagtalek dagiti papangulo ti politika, ti rumrumsua a panaggiginnura dagiti tribo idiay Africa ken Europa, ti relihiuso a supiat idiay India ken Ireland, ti napartak a panagsaknap ti implasion a mangsaplit iti nakaad-adu a pagilian, ken ti yaalsa dagiti agtutubo. Sigun iti maysa a report manipud University of Hamburg, ti 1992 ti kakaruan ti riribuk a tawen nanipud panagpatingga ti Gubat Sangalubongan II, nga addaan 52 a naarmasan a panagdadangadang iti nadumaduma a pagilian. Dagiti managayat-talna a tattao kadawyanen nga imtuodenda: ‘Sadino ti pakasarakantayo iti kinatibker, talna, ken kinatalged?’
Nangituggod ti mapagduaduaan a masanguanan iti kellaat a yaadu ti nadumaduma a panagipadles. Nalabit ti astrolohia ti kalatakan. Naiduma iti siensia ti astronomia, ti astrolohia isu “ti panagipadles iti naipagarup nga impluensia dagiti bituen ken dagiti planeta kadagiti aramid ti tao ken dagiti pasamak ditoy daga babaen iti posision ken lugarda.” Itatta, di malapdan dagiti riniwriw a tattao a basaen ti horoscopeda a pangripiripan iti masanguananda.b
Dagiti dadduma pay a banag a padlesan dagiti astrologo iti masanguanan iramanna ti pagtungpalan ti di pagkinnaawatan iti panagasawa ken dagiti parikut iti salun-at, ti itataud ken pannakatnag dagiti pangulo iti politika, ti kasayaatan a petsa a pananglukat iti negosio, ken dagiti numero nga usaren tapno mangabak iti loteria.
Impadamag ti maysa a report ti Reuters a ti astrologo a ni Joan Quigley ti kankanayon a konsultaen idi ni Nancy Reagan no kaano ti panangipaay ti asawana, ti madama idi a presidente ti Estados Unidos, kadagiti palawagna ken no kaano ti panagluas ken panagdisso ti eroplanona. Impalgak ti New Catholic Encyclopedia a ti “astrolohia ti us-usaren ni Papa Julius II [1503-13] a mangikeddeng iti aldaw ti koronasionna ken ni Paulo III [1534-49] a mangikeddeng iti umiso nga oras ti tunggal Konsilio.” Ni Alfred Hug, direktor ti maysa a kompania a Sueko a mangus-usar iti astrolohia a mangbalakad kadagiti managipuonan iti stock market, ipanamnamana dagiti nagsayaatan a resulta. “Naikeddeng babaen kadagiti bituen,” patalgedanna.
Nalawag nga adut’ makarikna a dagiti bituen impluensiaanda ti biag dagiti tattao. Kasano ti panangrugi ti astrolohia? Adda kadi makuna ti kadaanan a libro, ti Biblia, maipapan iti astrolohia ken dagiti astrologo?
[Dagiti Footnote]
a “Iti kadaanan a China, . . . maipagarup a dagiti pagilasinan iti langit agraman dagiti gagangay a didigra ket iparangarangda dagiti umiso ken di umiso nga aramid ti Emperador ken ti gobiernona.”—The International Encyclopedia of Astronomy.
b Ti horoscope isut’ “diagrama ti relatibo a posision dagiti planeta ken dagiti pagilasinan ti zodiac iti naikeddeng a tiempo (kas iti pannakaipasngay ti maysa)” ket us-usaren dagiti astrologo iti panangpadasda a mangipadto kadagiti pasamak iti masanguanan iti biag ti maysa a tao.