Pagsasaritaan a Mabalinyo a Kanen
DULSE? . . . DULSE! . . . Nagplanokayo kadi iti maysa a pannangan agpaay kadagiti bisita ket kalpasanna imtuodenyo ti bagiyo, ‘Aniat’ idasarko a dulse?’ Nalabit daytoy gagangay a parikut ti nangtignay kadakayo a mangsukimat kadagiti amin a libroyo kadagiti putahe ken panagluto a mangsapsapul ti maitutop a dulse agpaay iti panagtitiponyo.
Kayatyo kadi a padasen ti fondue? Daytat’ saan laeng a gagangay a pagsasaritaan no di ket nadaras ken nalaka met nga isagana. Ania ti fondue? Simple laeng, daytat’ naglalaok a ramen a runawen iti chafing dish [maysa a paglutuan a mamagtalined a nabara iti kanen]. Kalpasanna, dadduma a taraon, a naganentayo ti “isawsaw,” ti maisawsaw iti naglalaok a ramen sa kanen. Nagtaud ti sao a fondue iti Pranses a sao a fondre a kaipapananna “runawen.” Kas pagarigan, iti tsokolate a dulse a fondue, ti naglalaok a ramen ket basta narunaw a tsokolate, ket dagiti isawsaw isu dagiti pasteleria ken presko a prutas.
Tsokolate a Dulse a Fondue
Iti kanigid, adda putahe a tsokolate a dulse a fondue. No dikay pay napadas, masdaawkayto ngem maragsakan!
Runawenyo ti tsokolate iti maysa a pariok. Inayonyo (dagi)ti nabati a ramen. Kiwarenyo ti naglalaok a ramen agingga a pumalet. Yakaryo ti naglalaok a ramen iti paglutuan ti fondue, ket pagtalinaedenyo dayta a nabara babaen iti naalay-ay nga apuy.
Sakbay a rugianyo ti agsawsaw iti fondue, nalabit kayatyo ti mangikiwar iti dua a kutsarita a nalaka a marunaw a kape wenno maysa a kakapat a kutsarita a cinnamon. Tapno saan a ngumisit dagiti isawsaw a prutas gapu iti pannakaanginda, warsianyo ida iti tubbog ti lemon a nalaokan iti danum. No nasayaw unay ti nalaok a tsokolate, nayonanyo ti tsokolate. No napalet unay, laokanyo ti gatas.
No aglutokayo babaen iti de koriente a paglutuan ti fondue wenno iti maisaang iti dalikan a paglutuan ti fondue, mabalin a lutuenyo ken idasaryo met laeng babaen iti dayta a paglutuan. Ikabilyo ti paglutuan ti fondue iti tengnga ti lamisaan a nalaka a magaw-at ti tunggal maysa. Ti maysa a paglutuan umanayen iti innem wenno walo a tao.
No adda mabati a sawsawan, idulinyo a naimbag iti refrigerator ket nagsayaatan dayta nga iparabaw iti ice cream.
Swiss Cheese Fondue
Kayatyo kadi a padasen ti keso a fondue? Iti kanawan adda ti putahe a mabalin nga abri-gana wenno kangrunaan a kanen.
Gusugosanyo ti uneg ti pariok iti nagudua a bawang, kalpasanna ibellengyon ti bawang. Bukbokanyo ti arak ken tubbog ti lemon ti pariok, ket papudotenyo dayta iti kalalainganna. Agluag ken agsaknap dayta. Dikay ipalubos nga agburek ti arak.
Iti malukong paglaokenyo ti cornstarch wenno arina ken ti nagadgad a keso, ket kiwarenyo.
Bayat a kanayon a kiwarenyo ti nalaokan nga arak, nayonanyo iti sangarakem a keso. No narunawen ti keso, nayonanyo pay iti sangarakem a keso, ket kiwarenyo agingga a marunaw. Itultuloyyo a kiwaren agingga a marunaw amin a keso. No kayatyo, laokanyo iti puraw a pimienta ken nutmeg wenno paprika ken nagiling a bawang.
Yakaryo dayta iti paglutuan ti fondue, ket isaangyo dayta iti naalay-ay nga apuy. Tunggal tao addaan iti bukodna nga atiddog ti pakawanna a tinidor ti fondue, plato, ken tinidor a mangan. Basta tudoken ti maysa nga isasawsaw babaen ti tinidor ti fondue ket isawsaw nga irikusrikos iti fondue. Ikabilyo ti insawsawyo iti platoyo, ket kanenyo dayta babaen iti tinidoryo.
No nasayaw unay ti fondue, nayonanyo iti ad-adu pay a keso. No napalet unay, mangikiwarkayo iti naipapudot nga arak. No rumabaw ti arak, isaangyo manen iti napudot nga apuy, kiwaren, kalpasanna alay-ayan ti apuy. Saan koma nga aglasin dagiti ramen no kiwarenyo dayta iti isasawsaw tunggal adda isawsawyo.
No kaykayatyo a saan nga arak ti laok ti fondue, isaganayo ti kadawyan a putahe a keso a sawsawan. Paglaoken ti uppat a kutsara a mantekilia ken arina. Lutuenyo dayta iti naalay-ay nga apuy. Nayonanyo iti dua a tasa a nalamiis a gatas, alay-ayanyo a pagbureken, ket lutuen ti timplada iti dua a minuto. In-inutenyo a nayonan iti maysa ken kagudua a tasa a nasanger a (nagadgad) a keso ket kiwaren agingga a marunaw dayta. Timplaan ti asin ken pimienta. Isawsawyo kas naibaga nga immuna.
Adda Dulse Kamaudiananna
Inton sumaganad nga agparikutkayo iti idasaryo a dulse, mabalin a padasenyo ti dulse a tsokolate a fondue. Wenno para iti pangmalem, nalabit mangidasarkayo iti fondue a baka.
Awan duadua a daytoy a paglutuan iti naimas a raman agpautto a pagay-ayatyo ken dagiti gagayyemyo. Makaawis ti maymaysa a paglutuan. Agsawsaw ti tunggal maysa, isu a mangpataud iti nabara a panaggagayyem, a ti kangrunaan a ramen isu daytoy pagsasaritaan a mabalinyo a kanen!—Naipatulod.
[Kahon iti panid 22]
Resipe ti Dulse a Tsokolate a Fondue
170 gramo nga awan asukarna a tsokolate
1 1/2 tasa nga asukar
1 tasa a nasayaw a gatas
1/2 tasa a mantekilia
1/8 kutsarita nga asin
wenno basta:
340 gramo a tsokolate nga adda bassit asukarna
pedaso ti tsokolate wenno nasam-itan a tsokolate
1/2 tasa a gudua-gudua (krema ken puro a gatas)
Pasteleria nga isawsaw:
Angel food cake, dagiti ladyfinger, doughnut, pound-cake cubes
Dagiti Prutas nga isawsaw, aniaman kadagitoy wenno amin:
Dagiti mansanas, saba, cherry, dates, ubas, dalanghita, melon, papaya, peach, peras, nagalgalip a pinia, strawberry
[Kahon iti panid 23]
Resipe ti Swiss Cheese Fondue
1 ngipen a bawang, a nagudua
1 1/2 tasa a nasam-it, nalitnaw nga arak [ti ubas]
1 kutsara a tubbog ti lemon
1 1/2 aginggat’ 2 kutsara a cornstarch wenno arina
435 gramo a Swiss a keso, nagadgad (wenno kombinasion a Swiss ken Gruyère a [keso])
2 aginggat’ 3 kutsara nga arak a kirsch (uray awan)
Puraw a pimienta ken nutmeg wenno paprika ken maysa a ngipen a bawang, no kayat
Dagiti isawsaw:
2 a pan a nasarangsang a French bread (wenno Italian bread wenno atiddog a nagbubukel) a naputputed iti sag-3 centrimetro kubiko, a tunggal maysa adda mabati a rabaw ti pan
Naluto a manok, ham, ken pasayan
Naata wenno naluto a natnateng
[Kahon iti panid 24]
Pagsawsawan a sarsa:
Sarsa a Marunggay
3 kutsara a naisagana a marunggay
1 tasa a dairy sour cream
1 kutsarita a tubbog ti lemon
1/8 kutsarita a paprika
Paglalaoken dagiti ramen
Mayonnaise ken Curry a Sarsa
1/2 tasa a mayonnaise
1/2 tasa a dairy sour cream
1 kutsarita a tubbog ti lemon
1 kutsarita a curry powder
Paglalaoken dagiti ramen
Pangparaman nga asin ken pimienta
Sarsa a Mustasa
3 kutsarita a naisagana a mustasa
2 kutsara a natadtad a sibuyas
1 tasa a dairy sour cream
Paglalaoken dagiti ramen
Pangparaman nga asin ken pimienta
Resipe ti Baka a Fondue
1 kilo a saan a nataba a baka, tenderloin, wenno awan tulangna a sirloin
manteka a nagtaud iti mula
Pakaammo: Ti paglutuan ti fondue masapul a cast iron, suer, wenno steel. Dagiti ceramic a paglutuan saan a nasayaat para iti namanteka a fondue. Napudot unay ti manteka, ket mabuong ti paglutuan
[Ladawan iti panid 23]
Dulse a tsokolate a fondue
[Ladawan iti panid 24]
Swiss cheese fondue