Ti Kotseyo—Pagkamangan Wenno Silo?
“Kalpasan ti gistay tunggal didigra,” ipakdaar ti FEMA (U.S. Federal Emergency Management Agency), “masarakan dagiti mangarayat a timpuyog dagiti biktima a nakalasat koma no ammoda nga agtalinaedda wenno panawanda ti kotseda.” Wen, ti kamali a desision mabalin a gudasenna ti biagyo. Ammoyo kadi ti aramidenyo no adda didigra? Sungbatanyo ti sumaganad a quiz, kalpasanna idilig dagiti sungbatyo kadagidiay adda iti baba.
1. GINGGINED
□ Agtalinaed iti kotse
□ Rummuar iti kotse
2. TORNADO
□ Agtalinaed iti kotse
□ Rummuar iti kotse
3. BAGYO A YELO
□ Agtalinaed iti kotse
□ Rummuar iti kotse
4. LAYUS
□ Agtalinaed iti kotse
□ Rummuar iti kotse
DAGITI SUNGBAT:
1. Ginggined: AGTALINAEDKAYO ITI UNEG TI KOTSE.
Nupay ti sistema ti suspension iti kotse ti pakaigapuan ti napalalo a pannakadayyegna, nalabit a katatalgedan no addakay iti uneg—la ketdi no adayokayo kadagiti pasdek, overpass, wenno kable ti koriente.
2. Tornado: RUMMUARKAYO ITI KOTSE.
Nalabit kapepeggadan ti agyan iti kotse no adda tornado. Ngem kasanon no awan natalged a pagkamangan iti asideg? Kuna ti FEMA: “Agiddakayo iti maysa nga abut wenno dadduma a nagkalian nga ikabilyo ti takkiagyo iti ngato ti uloyo.”
3. Bagyo a yelo: AGTALINAEDKAYO ITI UNEG TI KOTSE.
Malaksid no makakitakayo iti natalged a pagkamangan iti asideg a lugar, nasaysayaat no urayenyo ti mangarayat. Mabalin a paandarenyo ti makina iti sumagmamano a kanito tapno makaipaay iti pudot, ngem pagtalinaedenyo a medio nakalukat ti tawa tapno malapdan ti panangsabidong ti carbon monoxide. Pagtalinaedenyo a nakasilaw ti uneg ti kotse kas pagilasinan dagiti mangarayat.
4. Layus: RUMMUARKAYO ITI KOTSE.
“No agsardeng ti kotse iti layus,” iballaag ti FEMA, “rummuarkayo a dagus ken umakarkayo iti nangatngato a disso. Mabalin nga umadalem ti danum, ken mayanud ti kotse iti aniaman a kanito.” Dikay makigasanggasat. Mabalin nga ad-adalem ti danum ngem iti itsurana, ken mabalin a kellaat nga umadalem ti danum.
Ibalakad ti FEMA a pagtalinaedenyo daytoy nga impormasion iti uyosen ti kotseyo. Ket isingasingna nga iti isuamin a kasasaad, “ti kapatgan a pagannurotan ket: Dikay matartaranta.”