Naapresiar ti Literatura ti Biblia iti Dati nga Union Soviet
Babaen ti koresponsal ti Agriingkayo! idiay Russia
IDI apagtapog ti 1991, ti dati nga Union Soviet ket buklen ti Russia ken 14 a sabali pay a republika. Nanipud idin, nagbalinen dagiti republika nga agwaywayas a pagilian. Nupay kasta, ad-adu ti populasion ti Russia ngem iti sabali a 14 a pagilian no agtitipon ken nasurok a tallo a daras ti masakupanna a daga ngem dagitoy. Idi Setiembre 1994, adda 117,276 a Saksi ni Jehova iti dati nga Union Soviet a mangiranranud iti kinapudno ti Biblia kadagiti kaarrubada.
Itatta, adu a magasin a Pagwanawanan ken Agriingkayo! iti pagsasao a Ruso ti maimalmaldit iti tunggal bulan a mausar idiay dati nga Union Soviet. Mainayon pay, adu a tract ken libro ti maiwarwaras sadiay. Nabatad a makita a maapresiar unay daytoy a literatura ti Biblia babaen kadagiti surat a naawat idiay opisina dagiti Saksi ni Jehova sadi Russia iti asideg ti St. Petersburg.
Napnuan Kolor a Magasin Naapresiar
Nagsurat ti maysa a lalaki manipud makintengnga a Siberia: “Naiparna unay a nakitak Ti Pagwanawanan nga iggem ti katrabahuak. Kiniddawko nga ipakitana kaniak. Umuna, basta miningmingak dagiti nakasudsudi, aduan-kolor nga ilustrasion. Kalpasanna awanen ti labsak a basaen . . . Sakbay a nakadlawak, nabasakon ti intero a magasin. Makapainteres, makapaganaygay, ken kasla makisarsarita ti pannakayimtuod dagiti saludsod.”
Inlawlawag ti sabali pay a lalaki manipud Siberia: “Naiparna a naawatko ti maysa a ruar ti magasinyo. Diak kayat ti mangpatiray-ok kadakayo, ngem daytoy pay laeng ti kasayaatan nga impormasion a nabasak maipapan iti pammati.”
Nagsurat ti maysa a nars manipud St. Petersburg, ti maikadua a kadakkelan a siudad ti Russia: “Pagyaman unay iti nagsayaatan a serye dagiti artikulo iti Enero 8, 1995, nga Agriingkayo! maipapan iti pannakapaksuy. Saan nga inikkat dagitoy nga artikulo dagiti problemak ngem impaayda ti saranay nga ur-urayek ken sapsapulek.”
Nagsurat ti maysa a 17-tawenna nga estudiante iti eskuelaan: “Agyamanak unay kadagiti amin a mangipabpablaak iti kasta a nagsayaat a literatura. Idi rumrummuarkamin kadagiti gagayyemko iti maysa a pagsinean, nakitami ti sumagmamano a magasin a nabati iti bakante a tugaw. Pinidutmi ida. . . . Bayat a binasak Ti Pagwanawanan, nasdaawak iti basbasaek. Talaga kadi a kastanto ti masanguanan? Ita basbasaekon ti Ebanghelio ken ikagkagumaak a maawatan ida. Naan-anay nga ilawlawag dagiti magasinyo ti mensahe ti Biblia.”
Kinuna ti maysa a 26-tawenna a lalaki: “Agyamanak unay iti artikulo a ‘Ti Kadi Panagpakamatay ti Sungbat?’ iti Abril 8, 1994, nga Agriingkayo! Gapu ta nalakaak a maldaang ken nayugalik ti masturbasion, namin-adun a pinanunotko ti agpakamatay. Ngem ti Sao ti Dios ken ti panagkararag ken Jehova ti nanglapped kaniak a mangipatingga iti biagko. Pinabileg daytoy nga artikulo ti pammatik iti kaasi ti Dios ken iti pammatik a tulongannakto ti Dios a mangparmek kadagiti parikutko. Makitana ti panagbabawik. Kayatna nga agbiagak. Agyamanak kenkuana iti saranay nga intedna babaen iti daytoy nga artikulo.”
Maipapan iti isu met laeng nga artikulo ti Agriingkayo!, inlawlawag ti maysa a 15-tawenna nga agtutubo a babai: “Dakkel ti epekto daytoy a magasin iti biagko. Idi agtawenak iti walo, nangrugin a mariknak nga awan serserbik. Awan ti tiempo dagiti dadakkelko a makisarita kaniak, ket pinadasko a risuten dagiti problemak a bukodko. Imputputongko ti bagik. Kanayon a makiapaak kadagiti kabagiak. Idin, napanunotkon ti agpakamatay. Anian a ragsakko a nakaam-ammo kadagiti Saksi ni Jehova!”
Kinuna ti maysa a babai manipud iti paset ti Europa a Russia: “Naminsan a natimudko ti panagsarita ti dua nga agtutubo a lallaki maipapan iti Biblia idiay pagsardengan ti bus. Naginteresak ket inasitgak ida. Inikkandak dagitoy nga agtutubo a lallaki iti maysa a kopia Ti Pagwanawanan. Buyogen ti ragsak ken panaginteres, binasak ti magasin, ket kayatko a maammuan ti ad-adu pay maipapan ti Biblia. Kayatko ti makiuman kadakayo babaen kadagiti magasinyo, ken kayatko ti makasursuro ken agadal a regular iti Biblia.”
Maapresiar ti Dadduma a Literatura
Nagsurat ti maysa nga agtutubo a babai manipud Caucasus: “Immay ti maysa a babai iti opisinami ket rinugianna ti nagsarita maipapan iti maysa a kita ti asamblea. Nakitak ti rag-o ken ti kinabarana, ket naginteresak. Iti sumaganad nga aldaw inikkannak ti libro a Mabalinyo ti Agbiag nga Agnanayon iti Paraiso a Daga. Binasak a dagus a sigagagar. Daytat’ nakaskasdaaw a banag. Mariknak a kalpasan ti panagkalkallautang iti kasipngetan, nasarakakon ti ruangan nga agturong iti lawag. Kalpasan ti panagsapsapul iti nakabaybayagen, nasarakakon dagiti sungbat ti amin a saludsodko iti maymaysa laeng a libro. Daytoy a rag-o ket imposible nga iladawan.”
Kinuna ti maysa a lalaki manipud Makintengnga nga Asia: “Pasurotnak ti ebanghelikal a Good News Church. Pagaammomi ti nakaro a kinakurang dagiti naespirituan a literatura. Sigaganat a dawatenmi kadakayo a patulodandakami kadagiti libro, broshur, ken bokleta a pagadalan ken maiwaras pay.”
Nagsurat ti maysa a lalaki manipud Armenia, iti asideg ti Nangisit a Baybay: “Nabasak ti broshur a Pudno Aya a Maseknan ti Dios Kadatayo?, ket daytat’ kasla makapabang-ar a presko nga angin. Nakasarakak met laeng kamaudiananna iti literatura a makatulongto kaniak a mangadal iti Biblia. Idawdawatko kadakayo a patulodandak kadagiti libro agpaay iti kasta a panagadal.”
Kinuna ti maysa a babai manipud Siberia: “Bimmisita ti maysa a Saksi ni Jehova iti balaymi ket nangibati ti maysa a kopia ti libro a Ti Katan-okan a Tao a Nagbiag Pay Laeng. Nupay maysaak nga ateista idi nageskuelaak, pinaregtanak ti nabasak nga agmennamenna a naimbag ken mangrugi nga agadal iti Biblia.”
Inyebkas ti maysa nga ina nga addaan dua nga annak ti panagyamanna iti daytoy met laeng a libro maipapan iti biag ni Jesu-Kristo ket inlawlawagna: “Maawatan dagiti ubbing dayta ken allukoyenna ti interesda. Tignayenna pay ti tarigagayda nga agadal ti Biblia ken agbasa kadagiti relihioso a literatura. Nagpintas ti pannakaipablaak ken pannakaaramid ti libro.”
Idi napan a tawen, impakita ti 34,608 a tattao manipud idiay dati nga Union Soviet ti panangapresiarda iti nasursuroda babaen ti panagbautisarda. Sapay koma ta dagiti naibatay-Biblia a literatura nga impablaak dagiti Saksi ni Jehova maaddaanda iti naan-anay ken nawadwad a pannakaiwaras iti daytoy a paset ti lubong, ken sapay koma ta rinibu pay a tattao ti umawat kadagiti linaonna a kinapudno ti Biblia!