Dagiti Pamilia ti Agsolsolo a Nagannak—Agus-uso
BABAEN TI KORESPONSAL TI AGRIINGKAYO! ITI BRITANIA
AD-ADU dagiti agsolsolo a nagannak a pamilia idiay UK ngem ti aniaman a sabali a pagilian idiay Europa,” ipadamag ti The Times iti London. “Dagiti agsolsolo a nagannak . . . ti mangidadaulo ita iti dandani maysa iti lima a pamilia iti UK nga addaan ti kurang a 18 ti tawenna nga annak, no idilig iti maysa iti pito a pamilia a Danes ken maysa iti walo iti Alemania ken Francia.”
Iti tunggal sangapulo nga agsolsolo a nagannak idiay Britania, siam ti babbai. Ti kadawyan, wenno makuna a pamilia a buklen ti ama ken ina agraman annakda ket basta maysa laengen a “mapampanunot a kaipapanan ti pamilia” kadagiti dadduma [a kaipapananna] ita. Ngem apay nga ad-adu ita ti kita [ti pamilia] nga agsolsolo a nagannak ngem idi?
Ti diborsio ken panagsina ti umuna iti listaan dagiti pakaigapuan. Ditoy, sumaruno ti Britania iti uso ti Estados Unidos, a sadiay agarup kagudua kadagiti amin a panagasawa ti agpatingga iti diborsio. Kasta met, nagbalbaliwen ti inanamaen dagiti tattao maipapan iti panagasawa. Sigun ken Zelda West-Meads iti Relate, maysa nga organisasion a mangiwanwan iti panagasawa, 20 wenno 30 a tawenen ti napalabas, “ti rebbengen dagiti babbai ken lallaki ket nakalawlawag a maibinsabinsa. Ti lalaki ti agsapul iti pagbiag; ti babai ti mangaywan.” Ngem ania ngay itatta? “Itatta dagiti panagasawa ti ad-addan a pakatignayan ken pakaragsakan, ngem agbalinda met a nakarigrigat. Ad-adu ti tarigagayan dagiti babbai iti panagasawa ngem ti ninamnama dagiti inna ken lolada. Tarigagayanda ti panagpada, ti managayat, naimbag a gayyem, gundaway iti karera agpaay kadakuada—ken kasta met ti annak.”
Ti pannakidenna iti asinoman a kayatna a maipabpabuya iti lubong ti paglinglingayan pataudenna ti pannakalais ti kadawyan a pamilia. Dagiti agtutubo a makidenna a nakaub-ubing pay ket masansan a dida ammo dagiti mabalin a pagbanaganna. Kadakuada ti panagasawa iparangarangna ti pakarigatan, a maksayan ti personal a wayawayada, ken di kasapulan a pakarigatan iti biag.
Dadduma ti agsolsolo a nagannak gapu ta pinilida; dadduma nagbalinda a kasta gapu iti kasasaad. No kapilitan nga agsolsolo ti maysa a nagannak, adu a naasawaan a tattao ti di naragsak iti wayawaya a mangiturong a bukodda. Mairaman kadagitoy dagiti tattao a naragsak ti panagasawada ngem natay ti kaparehada.
Iti kasumbangirna, adda met dagidiay a ti panagasawada ket napno kadagiti nakaro a panagsusupiat. Mabang-aranda no bukbukodanda a padakkelen ti annakda. Adu kadagitoy ti agkomento maipapan iti nasinged a relasion a napataudda iti annakda.
Nupay adu dagiti pakaigapuan ti agus-uso nga agsolsolo a nagannak a pampamilia, no maipapan kadagiti rebbengen ken karit iti inaldaw a panagbiag, adda dagiti naisangsangayan a pakaseknan dagiti agsolsolo a nagannak. Ania dagitoy? Ken kasano a sibaballigi a maibaklay ti agsolsolo a nagannak dagiti rebbengenda?