Manipud Managbasatayo
Pannakisarita Pagyamanan iti artikulo a “Ti Pannakisarita Ket Maysa nga Arte.” (Abril 8, 1995) Nabayagen a makidangdangadangak iti kinamanagbabainko. Ngem ita naamirisko a saan la a sisiak ti tao nga adda kastoy a problemana. Iyaplikarkonto a naimbag dagiti singasingyo.
A. L., Estados Unidos
Talaga nga epektibo ti singasingyo a basaen dagiti artikulo iti Pagwanawanan ken Agriingkayo! Masdaawkanto a nagadu gayam ti mapagsasaritaan sadiay no aramidem dayta!
V. M. J., Estados Unidos
Kampo Konsentrasion Nabasa ti maysa a gayyemko ti artikulo a “Nagbalin nga Ayat ti Gurak.” (Enero 8, 1995) Imbagana a maikontra iti kinuna ti artikulo, awan ti pagilasinan nga “Arbeit Macht Frei” (Ti Trabaho Mangwayawaya) iti kampo a Buchenwald.
H. J. Z., Alemania
Pangngaasiyo ta dispensarenyo ti kamali. Ti karatula iti pagserkan ti Buchenwald ket makita idiay agingga ita nga aldaw, ken aktual a ti mabasa ket “Jedem das Seine” (Umawatto ti Tunggal Maysa Maitunos iti Gunggonana). Dagiti kampo ti Auschwitz ken Sachsenhausen ti addaan iti karatula nga “Arbeit Macht Frei.”—ED.
Autismo Pagyamanan unay iti artikulo nga “Autismo—Panangsaranget Kadagiti Karit ti Narikut a Sakit.” (Pebrero 8, 1995) Kamaudiananna, maawatakon ti sakit a mangsapsaplit iti balasangko ken ammokon a saan a resulta dayta ti panangpadakkelko kenkuana. Ti panagserbik ken ni Jehova ti mangpabpabileg kaniak a mangandur iti kasasaadna.
M. H., Switzerland
Adu nga inaanito a makagapu ti naipabasol iti autismo, kas iti lunod manipud kadagiti inapo wenno dusa manipud kadagiti naglabas a naaramidan. Ti insuratyo ti tumulongto a mangparnuay iti nasaysayaat a pannakaawat iti daytoy a sakit. Pagyamanan kadagita a makaisuro nga artikulo.
M. A., Nigeria
Dagiti Orkidia Pagay-ayatko dagiti orkidia. Kinapudnona, addada orkidia iti hardinko ken retratoda a koleksionko. Pagyamanan iti panangipablaakyo iti artikulo a “Panangsapul Kadagiti Orkidia Sadi Europa.” (Enero 22, 1995) Inanamaek a saan a daytat’ maudi nga artikulo nga ipablaakyo maipapan itoy a tema.
R. M., Pilipinas
Natalged a Panagmaneho Agtawenak iti 45 ken pulos a di maipalubos idi nga agmanehoak maigapu iti kissiw. Kalpasan ti pannakaopera ti utekko, nagun-odak ti pammalubos manipud iti neurologist-ko a mangalaakon iti lisensiak nga agmaneho! Ti artikulo a “Natalgedkayo Kadi nga Agmaneho?” (Pebrero 8, 1995) ti timmulong kaniak a mangapresiar iti kinapateg ti kaadda ti umiso a kababalin iti panagmaneho. Dimteng dayta kalpasan la unay a naalak ti lisensiak!
G. S., Estados Unidos
Din Mapakawan a Basol Pagyamanan iti artikulo nga “Agimtuod Dagiti Agtutubo . . . Nakaaramidak Kadi iti Din Mapakawan a Basol?” (Nobiembre 8, 1994) Agsangsangitak a nangbasa iti dayta agsipud ta uray siak ket makigubgubal iti narugit nga ugali a panagmasturbasion. Sinurotko dagiti ulidan da Marco ken Alberto a nadakamat iti artikulo, a tunggal maysa kadakuada ket naaddaan iti tured a makisarita iti panglakayen. Dakkel ti naitulong daytoy kaniak.
A. M. C., Brazil
Ti masturbasion ket maysa kadagiti karirigatan a pakidangadangan ti maysa nga agtutubo a Kristiano. Namin-adun a nariknak a nakapimpiman ken nakakaasiak. Ti artikulo ti nangparegta kaniak nga itultuloyko ti makigubal tapno mangabakakto iti daytoy a dangadang.
F. G. M., Mexico
Nakiramanak iti nalulok a kababalin iti baro nga inanamaek idi a pakiasawaak; daytat’ nangdadael iti relasionmi. Nakaro ti panagleddaangko ket adu nga aldaw ken rabii nga agsangsangitak. Talaga nga impagarupko a saanakon a mapakawan. Ti panangbasa kadagitoy nga artikulo ti nangpabaro iti pammatik ken ni Jehova ken ti abilidadna a mamakawan ken manglipat.
L. C., Australia